广播专辑 弄堂茄山胡186 海宁路老早影院多

海宁路老早影院多  
 
吴兴意  
 

　　上个世纪四十年代到五十年代，我曾经垃拉海宁路（四川路口）浪向住过十二三年，对搿里勿要忒熟悉哟。正如大家所晓得格，四川路海宁路搿搭曾经是上海三大商业街之一。搿搭市面闹猛，人口众多，尤其是电影院、戏院比较集中，交关多。

　　就垃拉海宁路四川路口，阿拉长源里弄堂口西面原先有一个海光电影院，解放前专门放外国原版电影，我因为近水楼台先得月，有三四年辰光，每个礼拜侪要去海光看场电影。但是由于我个英语勿来三，所以片中英语对话一眼眼也听不懂，当然看看风景、人物也开心个。搿爿电影院解放后呒没几年就拆脱了。

　　由阿拉弄堂长源里向东走百把米就是国际电影院啦。里向只有底层，勿设楼厅，底层观众大厅顶部四周壁灯围成三四圈，一圈套一圈，邪气有气派，迭是一家首轮影院，也就是讲专门放映新片子。再向东垃拉海宁路乍浦路搭仔北海宁路交叉口浪向有座小型电影院，叫胜利电影院，国产片、外国片侪放格。胜利电影院属于二三等影院。

　　由胜利电影院往南，马路对过转弯角浪向矗立着一座建筑，迭就是虹口大戏院了。关于伊个过去，说起来还有一段蛮长个历史哩。虹口大戏院伊最早叫虹口活动影戏园（院），清光绪三十四年（1908年）由西班牙商人安·雷玛斯垃拉搿个地方搭建了一座简易个铁皮拱顶房子，可容纳250个观众，就垃拉搿年12月22日第一次放映美国影片《龙巢》，成为中国第一家正规个电影院。10年后，即1918年影戏院改建为钢筋混泥土结构，1919年最终改名为虹口大戏院，专演越剧，1998年因海宁路拓宽而被拆脱了。

　　沿乍浦路再往南三四十米还有一座影剧院解放以前叫文化会堂，迭个辰光我还小拉里，曾经垃拉里向看过一场美国科幻电影《海底电国》，战争场面浩大壮阔，使用武器交关先进，打仗侪靠按按电钮，超前意识老强个，迭部片子就是乃到现在来放映也是赞得不得了个。解放后文化会堂改名为解放剧场，主要放电影，兼作音乐厅，我拉读大学个辰光蛮喜欢到搿搭去听音乐会个，其中1962年一年里向，单单上海音乐学院开只音乐会我就听了四趟介多了。

　　如果范围再放大点，从解放剧场向南一里多一眼眼，过乍浦路桥还有一家曙光电影院，专门放映新闻记录片。而自四川北路海宁路口一直往北一里多有群众剧场（解放前称虹光剧院），继续往北一站路过横浜桥就是交关有名个鲁迅电影院（之前叫永安电影院）。

　　另外四川路海宁路西面一里多个山西路和老北站东面还有山西电影院和泰山电影院，去看电影个观众大多数侪是住了附近个居民。

　　上面所讲个海宁路四川路上介许多个电影院、剧场后来大多关脱了。尤其是近十年来勿是拨拆脱就是改作他用，留拨阿拉个只是一段永久美好个回忆。