广播专辑 弄堂茄山胡120 刻花样 剪花样

广播210 弄堂茄山胡 刻花样 剪花样

2012-11-07 17:17来源：新民晚报         新民网编辑：田诗雍    作者：郑树林

　　
　　上海市非物质文化遗产保护(上海花样经 民间文学)代表性传承人
　　读书个辰光，我下仔课最欢喜做个事就是刻花样。花样个图案就是小人书浪个连环画。埃个辰光精彩个连环画花样，呒没几天就会拨拉阿拉流行起来，迭些花样个图案侪是从连环画高头扯下来个，搿个辰光呒没复印机，只有动脑筋拿欢喜个图案扯下来，然后再用铅笔描一眼连老个线条，装订蜡光纸再用刻刀刻出来。刻刀也是自己做个，一般是用钢锯条，先用榔头敲打尖尖头三角形，然后垃拉砂轮浪磨磨快，老早勿晓得用刻板，常常垃拉玻璃浪刻，一张张个刻纸花样就是迭能刻出来个。
　　刻连环画花样垃拉伊个辰光是邪气流行的，阿拉男同学也常常拿刻花样来别苗头，刻了好是老扎台型个，刻花样已经是阿拉业余生活个重要部分。从刻花样到剪花样，我晓得了迭个花样经就是阿拉现在熟悉个剪纸，只不过迭个行当到了上海以后，阿拉上海人欢喜拿伊叫“花样”。迭个跟上海开埠之后，交关民间艺人从各地流浪逃难到上海有关。搿些北方来个民间艺人会得剪窗花、绣花样等工艺品个设计。当时辰光最多个是为上海妇女剪鞋样花、服饰浪向绣花，就是阿拉熟悉个旗袍花样，当然还有枕头花，床单，台布咾啥各种花样，统统是阿拉上海女人欢喜个，要绣得搭别人花头勿一样，就要有人设计新个花样，也就是阿拉民间剪纸艺人讲个花样，所以讲一部分剪窗花个人为适应大家个要求，改行剪绣花样，又称粉本，以维持生计。剪纸艺人穿街走巷，交关上海女人会招呼搿些艺人“剪张花样”，慢慢叫花样灵个样子成了剪纸花样，花样就是上海个剪纸，一直流传至今。
　　“剪花样”个人也属于民间艺人，上海最初个剪花样艺人分布上海各区县，大多数垃拉闹市区寺庙等闹猛地方，伊拉背一只专门个方木箱或用纸包夹子，然后寻一块地方地摊出售，就是现在阿拉讲个地摊小贩。当然手艺高拨拉开店个老板看中，请伊垃拉店堂里向开专门花样柜台。专门剪花样批发、零售还可以带徒弟，剪各种花样描拉拷贝纸浪，供大家选择。老早底有家叫富华花样店，就开垃拉城隍庙个绿波廊边浪向，剪花样个从业人员有江苏人、安徽人、浙江人咾啥。还有主要聚集垃城隍庙、八仙桥（大世界）、提篮桥、玉佛寺、龙华寺迭些区域。再有一个奇特现象，就是传子勿传女个传统，上海剪花样个人中百分之九十以上侪是男人