广播专辑 弄堂茄山胡154 辣上海讲“到上海去”

广播244 弄堂茄山胡 辣上海讲“到上海去”

2014-04-21 14:27 1来源：新民晚报        新民网编辑：田诗雍    作者：许晓铭


　　阿拉新村是解放后辣乱坟岗浪建造个，地处杨浦区和宝山县（现在是区啦！）个交界处，属于偏僻落乡个“下只角”，当年阿拉新村门口只有一条55路公交线路哦！ 
　　迭个新村是某大学教职员工个家属宿舍，居民来自五湖四海，北方人多于南方人，真正个本地上海人更是少得可怜。告咾伊个辰光新村个大人、小囡差勿多侪用勿标准个普通话交流，上海闲话讲勿来个。 
　　住辣落乡个下只角，又讲勿来嗲悠悠、甜蜜蜜个上海闲话，阿拉老有自知之明个做着“乡巴子”。节假日，要是阿拉坐公交车去闹猛个外滩、南京路、淮海路咾啥个地方，就会老骄傲个跟人家讲：“我要到上海去啦！” 
　　对比市中心个繁华摩登，阿拉就更感觉自己是生活辣乡下头个乡下人。 
　　有次，班浪有个同学呒没完成周六老师布置个作业，老师问为啥体勿做功课？星期天辣做啥？同学回答：爷娘带我到上海去了！迭个闲话让老师邪气生气：到上海去？难道侬勿是辣上海吗？搿里是苏州、杭州啊？后来，老师终于搞清爽迭个是阿拉个语言习惯，老师特为花几分钟时间辣班级教育开导阿拉：外地人来上海可以讲“到上海去”，生活辣上海，迭搭里就是组成上海个一部分，哪能可以搿样讲呢？ 
　　几十年过去了，阿拉迭个落乡地方个变化老大老大个：马路宽了，公交线路增加了好几条，尤其是地铁十号线个开通，让阿拉个出行变得方便快捷。商业区也日渐发达，逛街、购物、休闲、娱乐，应有尽有。 
　　前些日脚阿拉几个老村民聚会，叙旧中提到了当年埃句大家侪讲过个“到上海去”，嘻笑中达成共识：迭句闲话印证了当年阿拉迭搭块个落后脱阿拉个自卑告小小个愚昧。现在，社会进步了，经济繁荣了，阿拉个上海闲话也讲得老地道了，再也勿会用勿标准的上海闲话讲：“到上海去啦！” 
　　伊一页，已经彻底翻过去啦！