荠菜小馄饨味道赞
文/吴 毓
前几天同老公一道去松江醉白池白相，中浪向走进街边小吃店，就看到门里响一个戴了口罩个小姑娘一门心思辣了包荠菜小馄饨，小小薄薄个雪白皮子，辣伊手里一摊一合一捏，一只只“小肚皮”鼓鼓囊囊，影影约约透出青绿色个小馄饨一下子拿我个胃口吊起来了，春天最最念想嗰就是一碗荠菜小馄饨。
坐下来一歇歇，一只老大个瓷碗就送到面前，热腾腾地直冒热气，碗里向浮浮落落个小馄饨像一朵朵竞相开放个睡莲，每一只小馄饨侪是一肚皮实墩墩个荠菜拌进肉糜，让雪白个馄饨皮透出嫩嫩个翠绿，看起来居然有点像翡翠，一股麻油和香菜个混合香气扑鼻而来，让我胃口大开。我迫勿及待拿起勺子撩起一只小馄饨就送进嘴巴里，结果舌头就被烫了一记，忍着热烫咬下去，一股鲜香味道顿时辣嘴巴里蔓延开来，真是邪气灵光。我一口连一口，十几只小馄饨一歇歇就侪进了肚皮。辣迭个波澜勿惊个暖春里，我与一顿美餐勿期而遇。
回到屋里向，我仍旧对荠菜小馄饨念念勿忘，决定第二天自家动手做做看。我先去菜场买了一斤猪肉，三块洋钿馄饨皮，一斤多荠菜，然后就是洗菜、烫菜、剁馅。辣拌馅个辰光我灵机一动，又辣馄饨馅里加入鸡蛋和虾皮，以及生抽、胡椒粉、糖等调味品。最后我学着那个小姑娘，拿起皮子一摊一合一捏，一只只“小肚皮”突起个小馄饨就做好了。
搿天夜里，阿拉屋里就拿小馄饨当夜饭，老公一下就吃了廿几只，竖起大姆指：“有创意，邪气赞！”儿子平常最喜欢吃小馄饨，听说我包了荠菜小馄饨，马上从伊屋里赶过来，我拿荠菜小馄饨装满两只保鲜盒，畀伊带回去尝尝味道。
假使讲鲜肉小馄饨是高档次个阳春白雪，葛末荠菜小馄饨就是素馅唱主角个下里巴人，但绝勿能小看迭个荠菜，伊勿但是美味灵光个蔬菜，还有老多医用价值，有凉血止血、清热利湿、消食清肠、降压明目等作用，民间还有“春吃荠菜赛仙丹”个讲法。除脱用来做时令炒菜，荠菜交关多是当作点心馅料，比如馄饨馅、饺子馅、汤圆馅，现在还有作生煎馅嗰，侪邪气好吃。
又到周末，我约好闺蜜来屋里向，老大个基围虾和色拉是前菜，然后我就拿出亲手包个荠菜小馄饨，一歇歇，漂漂浮浮个小馄饨就辣汤锅里跳起了舞，我冲好汤料，加点麻油、葱花、薄盐、生抽，一碗满满个小馄饨送到闺蜜面前，伊尝一口就眉开眼笑，好吃，老赞嗰！虽然只是一碗家常荠菜小馄饨，但因为我个亲力亲为，老鲜个味道里向更有一种姐妹间个情谊，绵绵勿绝。
用户评论