想起弄堂里个锣鼓经
郑菁深
现在过年年味勿及老早足，有人认为是迭两年过年禁放爆仗个缘故，其实关系勿大，更多个是时代变化因素勒起作用。
人老了容易怀旧，我想起了六十多年前过春节个辰光。
我少年时住勒辣一条蛮大个弄堂，人家多，小厂小作坊也多，啥个袜厂、汗衫厂、糕饼厂、徽章厂、宽紧带厂、蜡笔厂、线厂，还有毛笔厂等等。搿些厂家平常日脚呒没啥休息，只有到了春节才放假。一到春节弄堂里刷刷静，整条弄堂成了儿童乐园，穿了新衣裳个小人袋袋里囥满糖果花生瓜子，手里拿着白相倌奔来奔去，男小人放爆仗是免勿了个，“乒乓”声此起彼落。顶顶让我记牢个是弄堂里个锣鼓经，锣鼓家生一敲，一条弄堂热闹得像开民俗音乐会，沸腾起来了。
会敲锣鼓家生是一群毛笔厂个小青工，个个身强力壮（敲锣打鼓也是体力活），大多镇扬人氏，单身，又勿回乡探亲，所以自娱自乐。年初一大清老早，伊拉集中勒弄堂口，先是打鼓个“切咚切咚”起声，紧接着敲锣个一声“咣——”，开始了整套锣鼓经。霎时间弄堂里挤满了人，大人小孩侪走出屋里向围观，连弄堂外头个人也过来凑热闹。（迭个辰光屋里还呒没电视机，除了看戏看电影走亲访友，轧闹猛也是一种白相休闲方式。）人越多伊拉敲得越起劲。年初一早浪敲锣鼓辞旧迎新，勒辣阿拉搿条弄堂持续了很多年头，目今攀谈，是一道亮丽个风景线。
侬还覅讲，搿些小伙子敲个锣鼓经真个好听得勿得了，节奏变化、有板有眼，敲出交关多个花样经，铜鼓、扁鼓、大锣、“乓乓器”（钹）、小噹锣等等，好像一部交响曲，有第一乐章第二乐章第三乐章，有快板慢板柔板终曲。讲句老实闲话，几十年过去了，我还从来呒没听到过迭能动听个锣鼓经（除脱过去京戏闹场）。
伊拉敲着敲着还勿过瘾头，就边敲边走，出了弄堂，勒辣小马路浪兜个两三圈再回到弄堂，小人跟勒屁股后头兜圈子，嘴巴里跟仔“笃笃，咣——咣咣咣”，“切咚、切咚，呛——”一直要闹到喫中饭辰光，才尽兴而归。小伙子们穿着老棉袄，汗嗒嗒滴，回到笔厂喫饭，一台锣鼓经方始宣告结束。
虽然讲敲锣打鼓平常得很，现在偶然也能听到，可勒辣当年，娱乐活动相对比较缺乏个情况下，听锣鼓家生也是蛮有味道个，特别是小囝，再讲能敲得迭能好个锣鼓经，后来听勿大到了，所以一直忘记勿脱，曾经搭我住勒一条弄堂里个老邻居一定会讲：迭位老兄记性倒蛮好个。
用户评论