广播专辑 弄堂茄山胡318 毛蓝布·芝麻呢·劳动布

毛蓝布·芝麻呢·劳动布  
 
郑菁深  
 
　　讲起穿衣裳个布料，真个是名目繁多，绸个丝个麻个呢个化纤个等等，当然最多个是棉布了。辣辣老早子，穿衣裳讲究清爽整洁，顶好衣裳勿要破损，穿辣身浪比较体面，特别是搞活动、出客，好像搭眼门前个辰光大异其趣。现在有眼学生、青年，赛过穿得越破越风光、越时尚、越休闲，一条裤子裤脚毛拉拉，上上下下侪是洞洞眼，真有点千疮百孔个味道，尤其是膝盖部分，简直就像碉堡个枪眼，大得让人瞠目结舌。可见得一个时代有一个时代个审美观，勿是阿拉迭种“老古董”所能理解个，自然勿能一概而论。

　　想起我个年轻辰光，衣裳勿光要穿得清爽整洁，还要牢，特别是男小囝，因为平常比较皮，所以衣裳容易穿破脱，大人买布料个辰光总要挑结实一点个老布。我就回忆起小辰光穿个毛蓝布、芝麻呢，以及劳动布，搿三种料作现在基本看勿见了。

　　讲到毛蓝布，是青靛色，布面比较粗糙，价钱便宜，当时侪用来裁做立领学生上装，三只贴袋，风纪扣扣好，样子倒蛮干练神气，迪个辰光蛮流行个，穿个人也蛮多，特别是中学生，笔者伊个晨光也是穿过个。

　　芝麻呢是一种比较厚实个布料，黑白纱线紧密交织，形成一粒一粒黑点，看上去像芝麻，所以叫芝麻呢。叫末叫呢，其实是布。芝麻呢一般用来裁剪男式长裤，不翻裤脚贴边，牢扎劲穿，也蛮随意，只是汏起来交关吃力。伊个辰光呒没洗衣机，汏迭种料作个衣裳要先用板刷刷，再绞干晾辣竹竿浪，相当费劲，这种体验是眼下青年呒没经历过个。

　　再有一种大众布料就是劳动布，顾名思义，劳动布一般做个裤子，只是平常上下班穿穿，特别是工厂里工人。劳动布颜色蓝兮兮，赛过现在个牛仔裤料，只是呒没迭能厚实。据回忆，当年穿个劳动布裤子价格便宜，耐穿，不光上下班穿穿，后来经过裁缝师傅设计改良，拷钮、贴袋、斜插袋，短裆、低腰、小裤脚管修身，慢慢交变成时髦个穿着，白衬衫、劳动布裤子，配上皮鞋，也是当年时尚青年个打扮。不过伊个辰光迭种料作几乎侪是男个穿，女人不穿个，因为看起来有点“武腔”，勿像现在个牛仔裤男女咸宜、老少皆穿。我感觉劳动布呒没传承下来邪气可惜，否则绝对可以搭牛仔衣裤一比高下。由此想到，交关老物事其实有可以发掘个潜力，如果能加以创新，生活或许会变得更加多姿多彩。