广播专辑 弄堂茄山胡322 难忘小辰光打康乐球

难忘小辰光打康乐球  
 
杨剑龙  
 
　　阿拉小辰光，街头或弄堂口，常常有摆康乐球个摊头，是一张小八仙桌一样个球盘，用交叉个木架支撑，大概差勿多到胸口高。一般个康乐球盘是用五格板做个，最好个是用红木做个，红木做个盘子，红木做个球子，打起来刮辣松脆。康乐球一般有32只球子，分1、2、3、4号，每号八只球子，另外有一只大一点个子，称为“老板”，是用来击打其他球子个。有四根球杆，一头粗一头细，有点像现在个台球杆，但是稍稍细一点短一点。

　　据讲康乐球出现辣桌球之后，六洞长条个桌球是印度殖民统治时期英国军官发明个，近代传入中国成为了四洞正方形个康乐球，康乐球个名称一说是因为英文Corner Bool而名，一说是因早年老北站附近康乐路上一家木器店老板制作了康乐球而称。

　　康乐球球盘四角挖有四只小碗大个洞，底下头有四只小盒子，拿盘上个子打入就得分。盘上当中画有一只大圆圈，四周画有四只小圆圈，小圆圈是发球区。康乐球一般有两种打法，一种是打排子，拿同一号个七个子靠盘边整齐排列，盘角上也各放一只子，游戏者打对面个子，先打完个就赢。另一种是打团子，也叫打分数，拿32只子放辣盘子当中，拿子打进洞得分，以子上个数字为分数。康乐球可四个人白相，也可两个人白相。

　　放学背书包回家，阿拉常常立辣拉康乐球桌旁边，看人家打康乐球。有辰光有机会，也会去打一盘。康乐球老板常常是个高手，打排子常常是一枪光。常常有弄堂里勿卖账个寻上来，与老板打康乐球赌输赢，讲定一个数字。迭个辰光，康乐球盘边上常常围了交关看个人，好像看个比打个还要紧张。

　　打康乐球有交关多个诀窍，有经验个常常会“看三四”，就是看康乐球子个位置搭用枪个方式，以便于一枪打进洞。打康乐球本事大个人，被叫做“有枪势”，“迭个人枪势足来”，后来被延伸到夸一个人有噱头有本事有功架等。打排子老板进洞要罚，罚个方式是拿一只康乐球子放辣对面中间，“有枪势”个可以一枪拿子打进洞，搿叫“磕子”，一枪中的个，叫做“磕子当麻球”。打排子一枪光个人勿少，就是每一枪都打进子，连续将八个子全打进洞。打排子打到对方个子，罚一子，老板进洞，罚一子，老板跳出盘，停一枪；一次打进两只子叫“双花”，可以连续打两枪，“三花”，可以连续打三枪。打团子更要动脑筋，勿能让对方得利。开局时，勿能贸然将中间个子打散，大多用老板轻轻碰碰，等有了合适个机会再下手拿子打进洞。打康乐球面对位置偏个子需要削薄弹，对于位置勿灵个甚至需要用“回力弹”，就是将老板用力打辣拉对面个盘壁上，利用回力将子打进洞，迭个必须要看枪势、有枪势。

　　由于经常打康乐球，阿拉个水平提高勿少，枪势慢慢足了，有辰光打排子也能一枪光了。因为迷康乐球，放学回屋里向晏了，老娘常常骂东骂西，甚至扯耳朵。

　　“文化大革命”康乐球被当作“四旧”废除了。原来弄堂里摆康乐球个老板，去东北参军了，弄堂里当年一道打康乐球个朋友们，后来大部分上山下乡插队落户去了，只有几个进了工厂当工人。

　　现在个小朋友大多数是白相电子游戏长大个，几乎呒没人晓得康乐球了。阿拉小辰光打康乐球是老有意思个，现在想来还想动手打一盘呢！