广播专辑 弄堂茄山胡328 一分为二看缺点

一分为二看缺点  
 
畸笔叟  
 

　　辣辣最近个阅读中，我忽然发现了一个新词汇，叫做“性格残疾”。

　　何谓“性格残疾”，呒没寻到详细定义，想来也勿会有多高深。按我个理解，大概像我搿能个性鲜明、优点缺点侪比较突出个人就是“性格残疾”个典型了。搿能一想，难怪有辰光做网络小测试，总归得分尴尬。

　　据说，“性格残疾”并勿妨碍个人发展，唯一障碍就是辣辣人际关系浪向。而人际关系方面个障碍，最终难免引起周围其他人对“性格残疾”者个“性格歧视”。

　　想想也是。往远处说，老叟从小学开始，每学期品德评语浪向，老师侪会留下“克服骄傲自满，注意团结友爱”之类个训诫。往近处说，有位听说我曾“治军狠严”个小朋友居然说，唉，好可惜，竟然没赶上被你“骂”个辰光。现在跟你说话，很难想象大家讲个那种“狠”。

　　坏就坏辣迭个“众人口中”。传说，流言，似是而非个评价，无疑就是人们对“性格残疾”者实施“性格歧视”个最惯用手段了。

　　“搿个人凶来兮。”“搿个人老难弄个。”“搿个人脾气怪来兮。”“搿个人本事有一眼，但是……”

　　侬可能很难有机会当面听到搿眼闲话，但就像心理学家福柯提出过个那种“心理上的惩戒凝视”，仍然会让侬浑身不适宜。

　　覅以为只有对侬不满意个人才会搿能讲。俗话说：“众口铄金，积毁销骨。”久而久之，连亲近个朋友也不免人云亦云。举个例子。我上世纪80年代工作过个单位里曾经流传一句“吐槽”，单位里交关人侪讲最早是我讲个。

　　后来，搿句闲话传到我一个已经当了领导个朋友耳朵里起了。伊也是好心，想规劝我，而且选择私下请我吃酒搿种“恰当时机”。伊当时个讲法也极其婉转：“其他传言我侪不相信，但这句闲话太像是你讲个了。”

　　我感觉既然已经被别人“认定”了，我再否认又有啥意思呢。

　　进入21世纪后，辣辣交关年轻个80后看来，对于伊拉工作浪向个普通批评好像也变成了“骂人”，面对搿种新个“性格歧视”，我更是百口莫辩了。

　　勿过，我倒也从来没有因此而气馁。因为我从廿几岁起就下定决心，只要不与自己个“三观”有冲突，就不随便改正自己个缺点。我个理由是，用“一分为二”观点看，万事侪有利有弊，所以每改正一个缺点，就有可能泯灭一个优点，等到缺点全部改光，优点也就基本消失，我也就变成了一个毫无特点个庸人了。

　　我爱优点，于是我愿意容忍缺点。哪怕“性格残疾”也能接受，哪怕“性格歧视”也能忍受。

　　事实浪向，虽然“性格歧视”现象辣辣生活当中很普遍，但也不是所有人侪有搿种倾向。

　　记得十几年前，一个朋友对我讲，伊就是要聚起一群个性很强、缺陷也很鲜明个人，给他们发展空间。搿群人里就有我。

　　对于迭味朋友对我讲个搿句闲话，我当时并呒没听懂。我甚至觉得，搿位朋友又点自讨苦吃，硬紧要拉扯搿能介一群人去实现伊本来就很难实现个目标，吃力不吃力啊，何苦呢。

　　现在我晓得了，搿就是因为伊呒没“性格歧视”。想到搿搭，就不由有些感激了。

　　有一天，我拿我对搿个新词汇个理解告诉伊。伊听了以后就笑了，解释道，伊之所以呒没“性格歧视”，恐怕是因为伊本身也有点“性格残疾”。

　　搿一记，阿拉两个人侪笑了。