一张包书纸个变迁
周钰栋
对交关学生来讲,新学期开学第一桩事体就是用包书纸把新发个课本包起来。迭个是一种爱书个表现。勿过,迭张小小包书纸几十年来个变化也是蛮大个。
记得上世纪50年代,我刚刚上小学,搿个辰光阿拉还想大勿着要包书。一来是屋里向经济条件勿算好,勿会为了保护书本再增加额外个经济负担;二来是大家相当珍惜读书个机会,侪邪气爱惜课本,哪怕勿包书,书也保存得相当好。后来勿晓得从啥辰光开始流行起了包书,但包书纸大多数是旧报纸或者商店里包物事个牛皮纸,考究一眼个就用盒装饼干、糖果个包装纸,假使能用上旧画报里个铜版纸,就算相当挺刮了。书包好以后,再用毛笔写上书名、班级、姓名。
到我上中学个辰光,同学当中个信息资源多了起来。有同学打听到有两爿纸张商店可以卖到蜡光纸或平板纸个边角料,纸张邪气挺刮,而且价钿邪气便宜,几分洋钿可以买一大叠花花绿绿个蜡光纸或平板纸。一家店辣福州路浙江路口,另外一家店辣延安东路江西路口。于是,同班同学侪约好一道利用礼拜天到搿两爿纸张店里去淘包书纸。
又过了几年,市面浪向开始流行挂历,有眼光个人就倷用过个挂历纸来包书。用挂历纸包书邪气好,因为搿种纸头厚实,勿容易磨损,用正面包书,书封面就是色彩鲜艳个画片,邪气好看;用反面包书,封面雪白,显得素雅;大家可以根据爱好各取所需。
可以讲,对交关同学来讲,包书逐渐变成了一种乐趣。包书纸材质、色彩哪能选?四只书角个包法是直角还是三角?侪体现个人品位和个性。包书个过程中,大家既享受到自己动手个快乐,又提升了动手能力。
现在勿一样了,文具店里有现成个塑料封套。对学生来讲,用塑料封套包书邪气方便简单;对老师来讲,用塑料封套包书可以让教室里显得整齐划一,但是从环保和学生动手能力个培养等方面来看又如何呢?迭个就见仁见智了。
声音简介
音频列表
- 2022-09
- 2022-09
- 2022-09
- 2022-09
- 2022-09
- 2022-09
- 2022-09
- 2022-09
- 2022-09
- 2022-09
查看更多
声音主播
用户评论