老早子个乡村小镇
邵天骏
小辰光个童年记忆，乡村小镇是一个始终抹勿去个难忘印象。
老早子，我经常走辣洋泾古镇个碎石小路浪，感受古巷民居个精彩。当时个洋泾电影院虽然勿能搭市中心个大光明电影院相提并论，但辣伊个年代，已经是相当勿错个娱乐场所了，每天放映两三部电影。电影院旁边还有洋泾活动室，勿仅可以辣里向读书看报、打牌下棋、练歌学舞，还经常有戏曲表演可以看。因为电影院和活动室侪吸引了勿少人来白相，周边也就自发形成了一个娱乐白相个集市，有打气球嗰，有掼铁圈嗰，有卖梨膏糖嗰，还有表演乡村文艺节目嗰，邪气闹猛。
平常呒没啥事体，我就会来到搿搭看一场电影，或者听一段沪剧。有一次我去看露天舞台浪个文艺表演，或许是座位离舞台比较近个缘故，感觉台浪演员个舞姿特别优美，勾人心魄。记得后来天浪开始落小雨，但是舞台浪个演员仍旧演得邪气认真，勿但一点呒没受到影响，还经常与台下个观众互动，现场气氛邪气热闹，至今想来仍旧记忆犹新。
居住辣小镇浪向，平常要买点物事，就会去一条老街看看。搿条老街东西走向，路面勿宽，脚踏车、机动车只能缓行。当中还有一座小桥，桥下流水潺潺，桥浪行人勿少。因为桥下需要行船，桥就建得比较高，小桥两边靠近河边个店铺侪会低于路面，虽然进出店面有点勿便当，倒也呒没哪能影响生意，时勿时就会有人进店购物。至于搿几家店具体经营啥个生意，现在已经记勿得了，只记得有几爿店面门口有朱红色个雕花门窗，看起来邪气精致。有辰光店门口会有补碗匠、补锅匠、磨刀匠，或者修棕绷个老师傅摆摊头，就有居民拿仔屋里坏脱个家生去修修补补。
对我来讲，记忆最深个店铺是一家新华书店和一爿文具用品店，新华书店个门面勿大，里向个连环画小人书是阿拉搿点小朋友最欢喜看嗰。放学路过书店，我经常会进店看看，看到有呒没看过个小人书，心里就痒痒嗰。至于文具用品店，留拨我个印象里主要有高高个台阶，以及练习簿散发出来个油墨香气……
记忆中个小镇，是烟雨江南个一道美丽风景。搿搭个民居、店铺、小桥、碎石小路，侪让我回味无穷。
用户评论