广播专辑 弄堂茄山胡485 人间五月好味道

人间五月好味道


沈一珠


 人间五月天，清新又婉约。勿知勿觉，立夏已经过去好几天了，樱花落尽，樱桃满枝。扑面吹来个风，已经暖烘烘了；马路浪，常常有人穿仔短衫短裤，看上去邪气清爽相。


 还辣牵记上一家去过个饭店，伊拉菜单浪，居然有水芹炒香干。汏汏麻烦煞，成本高，点一碟，也就二三十元，肯烧搿只菜出来，算是贴心饭店，或者讲，是有一颗为人民服务个心。


 前两天，朋友又讲了一声，水芹已经老了，现在迭只小菜改成茼蒿香干了。也是，水芹实际是冷天里个时鲜，现在已经是初夏天气了。迭能做生意，相信回头客会越来越多嗰。


 热天有热天个味道。比方讲：香乌笋，去叶子，削老皮，只留绿莹莹、水嫩嫩个芯子，切薄片，用细盐捏一捏，腌三五分钟，用白开水冲一冲，掿干，


 摆好糖、葱花，浇一点点热油，拌一拌，就是热天里顶顶赏心悦目个佳肴，盛一碗白饭摆辣旁边，像翡翠配白玉。


 买仔基围虾，一只只活蹦乱跳。一边烧水，一边剪脱须、脚，清水过两遍；水烧开了，摆点盐、葱、姜下去，虾倒下去，看虾肉白里透出一点点橘红来，盛出来，冷透，用糟卤糟一两个钟头；用手指头一只只捉牢，剥壳，去沙筋，再吃；最后手指头吮吮，也是又鲜又香。


 灶披间窗外有树，树浪有鸟，叽叽咕咕，听勿懂意思，听得出安逸。


 灵机一动，就拿汏好个鸡脚爪，厾辣煮过虾个水里，重新大火烧开，再中小火煨个三四十分钟；拎出来，冷水里冲一冲，沥沥干，摆辣用柠檬汁、冰糖、陈皮、酱油搭仔醋合好个汁里，浸一两个钟头再吃，又鲜又糯，咂咂味道，好像有点蟹味；顶顶适合一边啃鸡脚爪、一边看电视里老娘舅调解家庭纠纷个节目，感叹一句，人生美好，多多珍惜。


 最后就是一碗汤了。所以，搿天饭台子浪就迭能了：橘红个是虾，绿玉一样个是冷拌香乌笋，淡咖啡个酸甜鸡爪，一碗碧绿生青个干贝枸杞藤汤。


 干贝枸杞藤汤个原料：干贝十几粒、枸杞藤一小把（3两左右）、盐、料酒、油各少许。


 做法：先拿干贝仔细汏清爽，用温水料酒泡软备用；枸杞藤剪脱老梗，同样汏清爽备用；镬子里摆适量清水，干贝倒下去，大火烧开，再用中小火笃半个钟头左右；枸杞藤摆下去，大火烧开，关火；摆盐调味，最后淋点色拉油就搞定了。