写错地址寄对人
文/钱红春
老李有天夜快点到楼下头拿报纸，发现信箱里有只大信壳。信壳浪贴张比自来火盒子大点个白纸，纸头浪是打印个收件人地址姓名。因为当时光线暗，字又小，看勿大清爽，当仔又是啥地方寄来个广告或者宣传品，就同报纸一道拿回来了。
吃好夜饭，伊戴好老花眼镜看脱一歇报纸，正要打开电视机，突然想起还有只大信壳。拆开来一看，是今年第一期个某某杂志，就随手翻开来看看。搿是一本图文并茂个老年杂志，有保健养生、娱乐旅游；有家庭生活、时事评论；也有诗歌散文、书法绘画，内容交关丰富，蛮对胃口嗰，但自家呒没订过，哪能会辣自家信箱里呢？伊拿起信壳到灯光下头一看，乃末大吃一惊。地址倒是一眼勿错，但收件人是住辣伊楼下个老张。
伊一记头戆脱，勿晓得哪能办好。
三年前头，伊辣此地买了一间二手房。装修个辰光，楼下头老张本来就拨从早到夜个装修噪声弄得勿开心，后来发觉自家屋里卫生间顶浪漏水了，就跑到楼浪寻伊，讲仔呒没几句吵起来，闹得双方侪勿开心。虽然经过物业搭仔居委干部多次调解，事体终于得到解决，但两家头也就此成了冤家。平常碰着覅讲打招呼，连看也勿会多看一眼。现在老张个杂志塞到伊信箱里，觉着邪气尴尬。想重新塞到老张个信箱里，但信壳已经拆开，呒没看清爽就随随便便拆人家信是勿作兴嗰。又想横竖横让伊去，反正勿偷勿抢，是辣自家信箱里拿嗰。但总有穿帮个日脚，等人家发觉寻上门来就太坍台了。想仔半日，最后觉着勿管哪能讲总归是自家邻居，还是同老张讲清爽还拨伊。
主意定了，心也定了，伊捧牢杂志读到老晏才困觉。
后头才晓得，搿本杂志是老张参加杂志社征文活动辰光，获得个全年赠阅。勿晓得是老张写地址太潦草，还是杂志社工作人员忙中出错，拿房号搞错脱了。弄清爽了来龙去脉，老张紧张面孔放松下来。分手辰光，老李对老张讲：“拨杂志社打只电话，快点改过来。”
一个月后，老李又辣自家信箱里发现杂志社寄来个大信壳，一看，地址姓名侪呒没变。正觉着奇怪，老张正好从外头进来，就拿杂志随手递拨老张，问：“侬地址哪能还呒没改过来啦？”老张笑笑讲：“改点啥啦？寄拨侬也一样嗰，让侬先看。”讲好就拆开信壳，抽出新一期杂志递拨伊。“侬个杂志，哪能好我先看呢？”“有啥客气啦，啥人先看侪一样。”老张讲好，就抢先一步揿了电梯开关，拉仔伊一道走进电梯。
原来，老张从老李手里接过第一本杂志，发现几页有折痕，晓得老李也欢喜看，觉着地址虽然写错了，但拨伊先看也呒啥关系，呒没必要再改了。
用户评论