叫卖声里忆往昔
许德华
搿段辰光经常约仔几个朋友一道辣上海附近个乡镇景点一日游，一天去松江天马山白相，辣山脚下个路边听到电喇叭个声音：“回收手机、打印机、冰箱、彩电、长辫子长头发！”原来是一个骑仔电动车收旧货个小贩。搿种行当辣市区里向基本看勿见了，就算有做搿类生意个，也很少会出声吆喝，大多是辣路边寻一个角落，面前放块写有回收物品清单个板子，坐等生意上门。
突然看到迭个小贩倒是让我想起了老底子个事体。上世纪六十年代，我住个弄堂里常常有挑担子、推板车、骑脚踏车个流动摊贩来兜生意，伊拉每个人侪有特别个吆喝方式，譬如喊“洋纱线棉纱线”个小贩，一般就是卖针头线脑、鞋子滚条、头绳发夹嗰。大家辣屋里一听，就晓得啥人来了，有需要个就出门招呼一声。我记得有一个扬州阿姨，人长得高高瘦瘦，吆喝辰光口音比较重，“洋纱线棉纱线”辣伊嘴巴里变成了“洋苏西米苏西”。伊个价钿比较公道，还经常会送点饶头，弄堂里个阿姨阿奶侪欢喜寻伊买物事。我有一根红颜色个玻璃丝头绳就是外婆从伊手里买嗰，记得伊拿竹尺量好剪断拨我，讲：“小姑娘红绳子扎头发好看。”
“箍桶箍桶”“爆炒米花”也是常有个吆喝声。当时阿拉国家化工业勿发达，塑料制品比较少见，大家屋里侪有交关木桶、木盆。木桶、木盆用一段辰光以后容易渗漏，就需要请箍桶匠修理。至于有人来弄堂里爆炒米花、捏面人、吹糖塑，更是阿拉搿点小朋友最开心个事体。每次听到窗外有人用笛子吹出一段熟悉个调子，我就晓得是吹糖塑个来了。我特别欢喜看匠人吹糖塑，简直百看勿厌。
埃歇辰光弄堂里有人辣天井里养鸡，所以经常有人来收鸡毛，还有专门“马敦鸡”个人来寻生活。据说公鸡“马敦”过以后就不打鸣了，而且长得快，肉嫩好吃。搿歇想来被“马敦”个公鸡蛮作孽嗰。
埃歇辰光小姑娘大多侪会留辫子，可以称重量卖钞票。经常有人挑仔担子，一边摇铃，一边吆喝“长辫子长头发”。记得姐姐秀芳就有两根好看个长辫子，伊一直勿舍得剪，有一年妹妹秀兰参加跳舞排练，需要一双白跑鞋，秀芳就剪下黑油油个长辫子，为秀兰买了一双鞋子，真是一个好姐姐！
现在年轻人只好辣老照片里看箍桶、补碗了，马路浪披长发个女生多过编长辫子嗰，超市里各种塑料器具价廉物美，面塑、糖塑成了民间艺术，收旧货嗰也“鸟枪换炮”用上了电动车和电喇叭。大家个生活水平确实提高了，但是珍惜物力、节约粮食、量入为出、勤俭持家仍旧值得提倡。
用户评论