弄堂里个苏北奶奶
来来
阿拉弄堂里个苏北奶奶姓洪，大家侪叫伊洪奶奶。本来伊一直住辣南京，前两年因为辣了上海个小儿子养二宝了，伊就到上海来帮忙照顾照顾。
洪奶奶身材勿高，大概1米60；但是手轻脚健，红光满面。据居委会张书记讲，洪奶奶曾经打过仗，还立过功，具体哪能也讲勿清爽。不过伊到了阿拉弄堂以后，从来勿讲自己哪能，倒是大家个事体伊交关热心，啥个垃圾分类、啥个弄堂清扫……伊侪抢了前头。
有一趟早浪向，洪奶奶辣勒弄堂旁边公园里散步，突然发现一个老伯伯掼倒辣勒地浪向，好像是心脏病发作。洪奶奶冲上去，邪气熟练个为伊做心脏按摩，足足十几分钟；等到救命车来了，迭位老伯伯已经缓过来了，到了医院以后，经过医生抢救，脱离了生命危险。医生讲，幸亏得前头处置得当，假使唔没前头个心脏按摩，迭个老伯伯就危险了。
前两日弄堂里向发现有人感染了新冠病毒，整个弄堂临时封闭，居民做核酸检测。洪奶奶像平常一样，当起了志愿者，辣勒弄堂口值班。
隔天早浪，一部面包车“嘎”一记头停到弄堂口，从车子浪下来三四个小青年，手里拿仔装修工具，要想朝弄堂里向跑。洪奶奶上去劝阻，搭伊拉讲小区临时封闭，勿好进去。领头个小青年讲，阿拉今朝是来做生活嗰。
“你们到辣块做生活？”
“八三、八四。”
“啥叫八三八四，我看你们有点八三八四，像来寻吼势。”
“老阿奶勿要瞎讲。阿拉到83号、84号做生活，装修卫生间。”
“装修卫生间？今朝勿来三。”
“老阿奶，阿拉有合同嗰。今朝生活勿做，钞票啥人拨？”
“迭个么得问题，特殊情况，你们老板也要服从，伊要是不把你们钱，你们来找我。”
“老阿奶，侬口气老大嗰。帮帮忙来，阿拉今朝一定要进去嗰。兄弟们，上！”
“站住，今天有我在，你们哪一个都勿要想进去！”
“老阿奶，侬看看介大年纪了，阿拉冲上来，侬拦得牢口伐？”
只看见洪奶奶双手一拦，问迭个小伙子，“平型关大捷，侬晓得口伐？”
“迭个啥人勿晓得，抗日战争打日本鬼子。”
“对，我家爹爹打嗰。”
“噢，侬祖父参加嗰？”
“嗯呢。上甘岭晓得口伐？”
“晓得嗰，抗美援朝打美国鬼子。”
“对，我爸爸打嗰。”
“奥，侬爸爸参加嗰？”
“嗯呢。老山战斗晓得口伐？”
“搿哪能勿晓得，自卫反击打得好！”
“我打嗰。”
“啊，侬参加嗰？”
“嗯呢。当时我是卫生员，大部队打到辣块，阿拉就跟到辣块。头浪向炮弹‘飞飞’，耳朵旁子弹‘飞飞’，阿拉眼睛也呒没眨一眨，跟仔部队往前冲！”
“好！老阿奶，侬勿要讲了，侬一家门三代忠烈、祖孙英雄，阿拉买账、服帖。今朝听侬嗰，阿拉跑路，搿个钞票阿拉勿赚了！”
“慢，小伙子，钞票还是要赚嗰；过几天，阿拉搿搭解封了，你们再来。八三、八四两家人家跑勿脱嗰，到辰光我带你们上门。”
“老阿奶，侬讲闲话要算数。”
“放心，我在，阵地在！”
洪奶奶豪爽地笑起来。
两个装修个小青年，也笑起来了……
用户评论