一跤掼到撒哈拉
文 / 许德华
年轻辰光欢喜看三毛写个《撒哈拉的故事》，书里向对撒哈拉沙漠里向个人、骆驼、汏浴等描写活灵活现，我当时就想：以后一定要去一趟！我还拿书里“每想你一次，天上飘落一粒沙，从此形成了撒哈拉”搿句闲话贴辣床头柜和冰箱浪，提醒自家覅忘记搿桩事体！呒没想到，真个去成功已经是退休两年以后了。
今年2月份个春节里，我终于跟旅行团去了一趟撒哈拉。阿拉到沙漠里个辰光已经是夜快头，红通通个太阳挂了西面个天浪向，地浪向个黄沙看起来好像粉红色，走辣上头感觉暖洋洋嗰。天色越来越黑，半圆形个月亮慢慢升起来，星星嵌辣天空浪一闪一闪，气温也越来越低，身浪向冷飕飕，大家侪拿出羽绒服披辣身浪向，沙漠里向个气候就是搿能样子嗰。
离阿拉住个帐篷不远，有一大群单峰骆驼，驼倌辣边浪忙忙碌碌。导游讲搿眼骆驼就是阿拉第二天进沙漠个代步工具。
第二天老清老早起来集合，一道去昨日骆驼困觉个地方，有一头骆驼还辣睏痴懵懂就被驼倌拍醒过来，伊“嘎啦”叫了一声，听起来就像小毛头发出来个声音。碰巧个是，搿头骆驼就是驼倌分配给我个坐骑。刚刚骑上去，就感觉搿只骆驼动来动去，像煞要拿我摇下来，我就对驼倌讲：“嗨，调一只老实点嗰！”勿过，驼倌听勿懂中国闲话，朝我笑了笑就忙其他事体去了，旁边人听了侪哈哈大笑。我朝周围看了看，发现其他游客骑个骆驼侪老老实实，像我室友杭州人丽雅，伊坐辣两米高个骆驼身浪，又是叫人家帮伊拍照片，又是叫我胆子大点覅吓，真是让我眼红。唉，呒没办法，只好搿能样子了。
驼倌用绳子拿骆驼连辣一道，每5只骆驼一队，我排辣阿拉迭只队伍最后。哒、哒、哒，驼队进沙漠！眼看搿头骆驼老是用鼻头蹭前头骆驼个屁股，看起来特别活跃，我心里就勿踏实，勿过，我又想到埃及双峰骆驼、国内沙坡头、腾格尔骆驼我侪骑过，眼门前搿头单峰骆驼应该勿会出啥事体口伐？为了壮胆，我轻轻叫搭伊讲：“骆驼娘娘小宝贝，侬乖噢。”伊像煞晓得我个心情，起步表现还勿错，我也开始抬头欣赏沙漠日出。
走走停停，我东张西望看野眼，周围高高低低个沙丘就像海浪，怪勿得骆驼被称为“沙漠之舟”，真是蛮形象嗰！忽然，搿只骆驼嘴巴里发出“吭哧、吭哧”个声音，身体摇来晃去，我虽然心里一直有所防备，但实在呒没想到伊会突然发脾气，顿时掌握勿牢平衡，“咕隆咚”，搿只头皮撬个骆驼就拿我厾辣沙地浪向。
掼下来辰光我脑子蛮清爽嗰，双手紧紧抱头，身体也努力团起来，生怕伊蹄子踏伤我。不幸中个大幸，沙地比较软，骆驼还呒没踏伤我，只是右小腿破皮出血。
听到我哭出乌拉个声音，驼队停了下来，领队和驼倌看我半天爬不起来，以为我骨头跌断脱了，侪老紧张了。还好我勿是辣末生头掼下来，骨头呒没断，就是身体像捏面粉一样被恶狠狠搓了一圈，浑身酸痛。伊拉一听放心交关。驼倌抱我起来，呜哩哇啦讲了好几句闲话，勿过我一句也听勿懂。我通过领队对伊讲：“勿骑骆驼了，实在吓煞脱了！”
驼倌看我坐辣沙地里发抖，就讲给我烤火取暖。看伊两手空空哪能变得出火来？想到伊谋生不易，我就拿出20个第纳尔（摩洛哥货币）给伊。驼倌顿时感动了，连连讲“恰那（China），果德（good），三克油(thank you）!”乃末我佝头缩颈、一跷一跷，实在走不到沙漠最好看个地方了，只好靠领队帮忙，慢慢退出沙漠。
接下去五六天，我侪蛮苦嗰，睏下去爬起来侪要用手辣床头柜借力，勿敢咳嗽，勿敢打喷嚏，也勿敢笑，否则身体里就会闷痛。搨了药膏，头颈感觉好点了，但是腰伸不直。亏得我带了登山杖，走路可以借力但是终归慢吞吞嗰。到菲斯老城观光个辰光，我一个人辣城门口等伊拉。哎，出了介西多铜钿乘飞机到北非来晒太阳！不过，城门口西洋镜也蛮多嗰，最稀奇个是小毛驴驮液化气罐头。咖啡店里还有不少像我一样个外国游客，还有做游客生意个当地导游，当伊拉问我，“是否需要陪同”时我邪气老练个用英文讲：“阿拉是团队，我辣辣等人！”
回到上海第一桩事体就是到医院拍片子，骨头呒啥问题，吃药舒筋散痛。总归要捱脱一抢辰光，就是买汏烧只好歇搁了。
朋友讲我一跤掼到撒哈拉，下趟勿好再瞎走八走了。女儿讲：“姆妈侬全世界沙漠侪走好辣呀！”我回答伊：“阿拉迭次走个地方离三毛住个阿雍镇差了六七十公里，下趟我想自由行去伊面看看。”
看我笑也不敢笑个尴尬样子，女儿忍不住哈哈大笑！
用户评论