广播专辑 弄堂茄山胡677 祛寒小茴香

祛寒小茴香


从热火朝天日脚里出来，贪恋秋风秋雨个清凉，迭个辰光，顶容易着冷。所以，老天爷懂经，会有小茴香新新鲜鲜上市，碧绿生青。看上去软绵绵细嫩嫩，偏偏伊暖脾胃、散风寒，还防流感；特别是一到冷天手脚偏冷、体质虚寒个人，吃点，暖烘烘，合时令。


新鲜小茴香是绿叶菜，结个种子也叫小茴香，纯纯是调料；小茴香味道跟八角（或者叫伊大茴香）是一个类型，勿过，相对八角味道个强势，小茴香味道比较温和，淡淡交。


绿叶子小茴香顶简单个吃法是冷拌。汏清爽，去根，切碎段，口味清淡点个，加点生抽，加点糖，熬点热油淋上去，拌透就好；口味重点个，加一点辣椒酱；或者炒蛋，也算简单个，跟春天里香椿炒蛋差勿多方式，只勿过，勿用焯水，直接汏清爽切碎，跟蛋一道打匀，合好料，再用油炒熟就好。


搿两天早饭，月饼吃厌脱了，就用伊煎厚蛋烧；三两只蛋，加点盐加点牛奶打好；取小茴香叶子切碎；蛋液煎到将结未结辰光，小茴香碎末铺进去，蛋皮一层层卷起来，戤勒镬子边上，烘一烘，蛋皮有一点点焦黄就好。小茴香迭种比较低调个香气，齐巧解脱一点点蛋腥气，老好吃。


北方人欢喜拿伊包饺子，阿拉包馄饨也别有风味个。搿天，半斤夹精夹油腿肉，斩成肉末，淋点料酒、生抽，合好咸淡；一把小茴香汏好，勿用焯水，一根根排整齐，横过来细细交一刀刀切下去，就是细细交个碎末了，跟肉一道拌匀；下好个馄饨，吃上去有一点点爽口，一点点弹性，邪气轻爽相。