广播专辑 弄堂茄山胡119 柴爿馄饨个噱头

广播209 弄堂茄山胡 柴爿馄饨个噱头

  作者：黄顺福 

　　柴爿馄饨小调

　　“三钿一碗菜馄饨，
　　只只包得小猪恁，
　　像只元宝水上氽，
　　明星吃仔唔哪能，
　　小囡吃得眯眯笑，
　　姑娘吃得心火跳。”
　　小个辰光，一日三顿，两粥一饭。大人讲，夜到末吃仔勿做事体睏觉，粥烧得薄点。天色热，乘风凉到八九点钟，肚皮饿煞哉。搿个辰光，呒没喧嚣烦人个夜排档，也呒没吃夜宵个讲究，勿过，阿拉勿急，爷娘早就塞拨拉我手里一角洋钿。一歇歇一副馄饨担吱吱嘎嘎挑进来，停垃拉弄堂里。
　　馄饨担一头是炉灶，柴爿垃拉炉膛里噼啪溅火星，红红火舌像关勿牢个小兽朝外蹿，镬子浪水汽氤氲蒸腾；另一头是货物架，三四格抽屉，分别放仔调料、馄饨皮、菜肉馅、碗、调羹咾啥；扁担两头搭仔两只长凳。迭个就是馄饨摊个厨房搭餐厅，放下长凳，就是顾客餐桌椅；拉开抽屉，就是摊主操作台。小本生意，买勿起木炭煤球，用拾来个废旧木爿竹爿作燃料，大人小囡侪叫伊“柴爿馄饨”。
　　覅看小本生意，竞争邪气结棍。伲弄堂里，十字路口，白杨树下，人来人往，是块风水宝地，有个小贩太阳刚刚落山就拿点心担摆拉垃此地。但是，只要毛胡子黄家【gak】里个柴爿馄饨一到，别人就乖乖让位。黄家里服务态度好勿讲，搿个支架造型特别，支架浪常常挂仔照片，有王丹凤翘起兰花指捏仔调羹，像拉垃吃馄饨；有赵丹扮办义学个武训，拿把扇子像煞有介事搧炉灶。黄家里一到就唱山歌：“三钿一碗菜馄饨，只只包得小猪恁【nen】，像只元宝水上氽【ten】，明星吃仔呒哪能，小囡吃得咪咪笑，姑娘吃得心火跳。”伲晓得伊来哉，捏仔一角洋钿呼啦一下从藤躺椅浪蹿下来。搿个馄饨鲜美覅起话伊，最吸引阿拉个是舀馄饨吃个调羹。老早点呒没塑料迭种材料，店家也呒没一次性餐具。黄家里倒有一次性调羹，用旧木爿制作，邪气道地，底浪还刻拉海动物生肖。你八岁，属马，伊就拨侬一把刻马个调羹；属蛇呢，当然就用有蛇个图案个调羹。吃完馄饨，调羹就归侬。伊还讲，假定积满十二生肖调羹，以后吃馄饨就勿收钞票。馄饨好吃，调羹好白相，吃馄饨勿收钞票又诱人，伲小囡侪喜欢伊个柴爿馄饨。勿过，我属蛇，伊总拨我蛇调羹。我要别个图案，伊摇头：“勿急勿急，侬看搿个小阿弟大侬一岁，拿龙调羹，等侬明年搭伊一样大，就拨侬龙调羹。”
　　夜风习习，肚皮饱饱，汗水收干，阿拉眼睛酸哉。黄家里拿地浪收捉得清清爽爽，吱嘎吱嘎走哉。吃仔伊几年柴爿馄饨，拿到个侪是蛇调羹，心里殟塞，同小朋友交换，也收集勿满十二生肖。问爷娘，伊拉笑煞。长大再晓得黄家里个柴爿馄饨生意好，是因为伊拉垃生意中彰显一种文化意识，而所谓吃馄饨勿收钞票，其实是生意人摆个噱头势。