《盐咸蛋，包粽子》
作者：开心权世界
改编、朗读：麦小姐
[上海话改编]
我农村个老房子旁边有条小水沟，里向长满了阔叶箬竹，伊个叶子，就是阿拉所熟悉个粽叶了。每年端午节前头，家家人家侪忙了包粽子，我屋里个搿片箬竹林，正好可以提供原材料，为左右乡邻带来了交关便利。
箬竹根系发达，生命力强，勿仅是老好个水土保护植被，外加还是一笔取之勿尽个“天然财富”，被江南老百姓成为“绿色银行”。老姆妈还会拿呒没用光个粽叶晒干了备用，一到枯叶期，搿些晒干个粽叶也成了宝贝。
农村里有养鸡养鸭个习惯。一来是因为农村水系发达资源丰富，为鸡鸭个生长提供了有利条件；再来末，因为农村人省吃俭用做人家，养眼鸡鸭改善伙食，既有了蛋，也有了肉。基本浪向，是每家每户侪会养几只个，碰着屋里来了重要个客人，板会杀鸡杀鸭来招待，临走个辰光，主人还会迭为准备好一份自产个鸡蛋鸭蛋，送拨客人当做礼物，由此可见农村人淳朴脱客气个品质了。
我记得每年一到端午节气，屋里向总归是要盐咸蛋个。姆妈会得先差我去拿储备个鸭蛋全部拿出来，打点井水汏一汏，用清爽个布头揩干，还要交关当心个拿蛋摆辣一只棕色个甏里。然后，姆妈会根据蛋个只数来决定用盐个多少。盐呢，要先倒辣冷开水里，用手搅拌到全部烊开来，再倒进甏里向，水呢，要正正好好拿蛋盖没脱。挨下去只动作蛮关键个，伊还会辣盐水里倒个几两高度烧酒。最后，用塑料薄膜脱绳子拿甏口封紧。乃末，开始等，差勿多要靠十来天，等粽子包好，就可以拿搿些蛋脱粽子一道摆辣镬子里煠了。
哎呀，搿等个日脚好像是过了特别慢一样，好勿容易等姆妈包好了两大家生个粽子，我期待个时刻也终于要到了。灶头浪向蒸汽呼呼，镬子里向煠了粽子还有咸蛋，粽香、米香、肉香、酱香混合起来，整个厨房间里飘满了馋人个味道。
等煠了差勿多了，姆妈一边[扌梟]开镬盖一边问我：“侬要吃啥个粽子呀？缚白颜色绳子个呢，是赤豆粽；缚黄草个呢，是肉粽；三只结辣一道个呢，是白糖粽。”其实搿个辰光我想到个是，先吃只咸蛋再讲。乃末，就去搲。啥人晓得搿蛋烫了要命，捏勿牢，手一甩，蛋落到地浪向，蛋壳个刮缝里漏满了金黄色个油脂。介好个物事，哪能舍得浪费呢，我要紧拾起来，寻块清爽个布头揩揩，拿蛋壳剥脱，再一掰两，直接用嘴巴咬了吃。搿味道真是嗲啊，勿淡勿咸，鲜香扑鼻。我极吼拉吼个吃脱了一只咸蛋加一只肉粽，感觉还勿煞瘾，又吃了四、五只，乃末终于膯牢了。
唉，我邪气怀念小辰光个味道，尤其是姆妈亲手盐个咸蛋还有包个粽子。就辣前两日，我自家也试做了一趟咸蛋，只等了端午节搿天开甏尝鲜，当然咾，到辰光肯定是要脱屋里人一道分享个，我特别想让我姆妈来鉴定一下，顺带便也点评一下我“偷师学艺”个成果。
用户评论