广播专辑 弄堂茄山胡67 三月三 荠菜上灶山

广播161 弄堂茄山胡 三月三 荠菜上灶山
2012-03-13 10:37   来源：新民晚报   作者：黄顺福   新民网编辑：王玲

　　【新民晚报·推荐】小辰光住垃拉浦东高桥，村里呒没人家种荠菜个，勿过，搓圆子、做羹汤、卷豆腐皮咾啥个，侪少勿了荠菜，要吃末，就到田野里去挑。

　　早春二月，细雨轻轻拂过田野，草啦、花芽啦，侪闻到了生机勃发个气息，勿几日，铺地个绿油油一片。我阿奶就拿我叫到跟前，拨拉我一把小铲刀，一只小竹篮，讲：“小郎啊，三月三，荠菜上灶山，灶山头交关辰光勿闻荠菜香哉，灶君老爷要勿开心哉。”迭个辰光假定我勿接小刀、小篮，伊会噜里噜苏讲出一大套个道理：王宝钏身居寒窑，思念出征个薛平贵，就拉垃伊离家个日脚头戴荠菜花，炒荠菜吃。今朝是荠菜生日，迭个一日吃仔荠菜末，会像王宝钏一样想啥有啥。其实，我不过垃拉伊跟前发发嗲，心老早就飞到田野里去了。

　　河畔、田埂、坟脚，侪是三五成群挑荠菜个小伙伴，奔跑追逐大自然赐予个野趣。搿搭一声尖叫，一条冬眠刚刚醒来个青蛇懒懒个从脚边浪爬过去；伊搭一阵欢呼，一只灰色个小兔窜出枯草丛逃窜脱；啥人看见河浜边浪一个烂泥洞，有人讲是老虫洞，有人讲是水蛇洞，有人吓得躲拉仔人背后，性急个已经垃拉扒土挖洞了。“蛇！”扒土个大叫一声，举起手，手指浪向吊仔一只小乌龟。伊缩头缩脑看阿拉，小眼睛里侪是问号：天还呒没暖热，真吃伊拉勿消，迭些人介开心做啥啦？田野里介有趣，我只晓得白相，啥个荠菜勿荠菜，山东人吃麦冬，一懂勿懂，挑到篮里侪是菜，亏得小朋友帮忙，总算凑满仔一篮。

　　太阳落山，我到屋里，拿篮头交拨阿奶手里。阿奶一面拣一面教我，迭个是打官司草，迭个是太阳花草，伊个再是荠菜；荠菜要拣勿开花个，开花个忒老勿好吃。讲末搿能讲，一棵老个也舍勿得掼脱，拿花摘下来，还朝头浪插，满满插仔一头，像顶仔一头星星，还挑出一根白茅草根放垃拉嘴里嚼，一抖一抖个。迭个辰光，我觉得阿奶真个又年轻又漂亮。伊讲：“三春头戴荠菜花，金子银子一把抓。”伊讲：“荠菜花，眼明花，女人勿插呒钱花，插满头浪米哗哗。”伊讲：“荠花赛牡丹，种稻又养蚕。”侬看，伊侪讲荠菜花个好处，还问我做啥咾拿老荠菜挑回来。