广播专辑 弄堂茄山胡83 勿茄勿适意

广播专辑 弄堂茄山胡83 勿茄勿适意

2013-11-04 11:23来源：新民晚报          新民网编辑：田诗雍    作者：周镇兰

　　本来仔早浪锻炼好身体我就回到屋里去了。现在活络好筋骨还要垃小区个小公园里向茄一歇山河，每日搿能个，已经五年多了。假使一日天勿去茄山河，人就觉着勿适意。
　　茄山河个话题交交关，有得世界大事，加上国家要事，还有身边新事，大家关心啥就一道来讲啥。茄山河个人十来个左右，岁数顶大个八十九，顶小个六十刚刚出头，我么勿大勿小，齐巧【正好】八十。搿几年伲迭眼【这些】人个岁数一年年大上去，茄山河个兴趣一眼也呒没降下来。
　　葛末为啥阿拉介欢喜立垃小公园里茄山河呢？主要是开心。老年人聚垃一道，讲个是小青年拉也关心个事体，有辰光还会得讲几个时尚个词语，大家就觉勿着老，觉着搿颗心还跟得上时代，搿就特别有劲。阿拉有个勿成文个规矩，必须传播正能量，告咾常庄是一人引题大家议，可以七嘴八舌大家讲，但是勿好随便打断人家个闲话，勿好瞎讲消极泄气个风凉闲话。有个人一本书看好了，就讲讲历史，讲讲现在个变化，大家侪讲“是个是个”。听到邻居拉差一眼上当汇出钞票，就有人讲眼安全防范知识，提醒大家识破“电信诈骗”。碰着气候变冷了，就讲讲哪能【如何】防寒保暖，当心身体。要是国家领导人出访了，阿拉个议题也跟到仔国外，讲讲迭个国家个风土人情，谈谈访问取得个主要成果，议议两国关系个发展前景。还有谈天气、说笑话个。也有旅游回来介绍景点特色，拿出照片大家传来看个。有个人“功课”做来好，背出了古诗还要解释拨大家听，讲健康小常识也编成仔顺口溜。部队转业干部三句话勿离本行，回顾军营生活，讲解新式武器。当然咾，屋里向个事体么也常庄会得扯起个。
　　五年多山河茄下来，得益交关多。一是日都【每天】听着新信息，学着新知识，眼界宽了，心胸阔了。二是学习个兴趣提高了，口头表达能力也提高了。有辰光大家对一个问题争论得来呒没结论，我就留了回去寻资料、觅证据，得到正确个说法。听别人家讲得来头头是道，就觉着自己勿够，葛末就学学古文，抄抄古诗，摘摘新闻，尽量记牢伊，心脑侪得到了锻炼。三是觉着心情老舒畅个。锻炼好身体，立垃海茄山河正好调节气息，顺便练练站功。经常看到老朋友，觉着自己仍旧生活垃集体当中。山河一茄，轻松身架，烦恼事体，全部抛洒。有辰光身体有眼痛痒，山河一茄，呒没了！
　　茄山河丰富了我个退休生活，还增进了我个身心健康。现在我日里【白天】看报纸勿用戴眼镜，平常上三楼走楼梯人勿吭【气喘吁吁】。我跟一道个老年朋友讲，茄山河适意得来，真个适意。