声音简介
哪桩事体呢？原来张奎年纪轻格辰光是格砌灶头格工匠，好手艺，周围几个村格灶头坏脱，全是请张奎来修格，远近闻名。后来年纪大上去了，讨之隔壁丁家村小姑娘叫丁香。丁香长得漂亮覅去讲伊，而且烧得一手好小菜，夫妻两家头而且非常恩爱。
日脚越来越好过，铜钿赚得越来越多，竟然招邻居妒嫉了，就勒村里里散播谣言，说丁香平常辰光勿规矩，乘张奎出门做生活格辰光，勒门口勾引人家小伙子。
谣言真格害人啊！慢慢传到张奎耳朵里了。一开头勿相信，但是听得多了，三人成虎，张奎就信以为真了。格天实在憋勿牢了，拿之一张休书丢勒丁香面前，休脱侬。勿管丁香哪能解释，也没用。丁香落之眼泪，一步一回头格回转娘家去了。
回到娘家拿事体经过告诉爹娘。爹娘相信囡嗯格为人，勿会做出勿规矩格事体，就到张奎屋里去评理。但是张奎就是听勿进。丁香爹气昏，回去就对囡嗯讲：“阿囡啊，覅怕，清者自清，侬就住勒屋里向，辰光一长张奎肯定后悔，到辰光伊就算跪勒门浪赔礼道歉，我也勿会睬伊格。”
格天，丁香在门前种菜，一钉粑下去刨来一只大罐头，再一细看的，哎呀！里向全是金子啊！有之铜钿，老早旧房子就勿住了，换一个风景好格地方，盖一座大房子，现在讲起来叫“景观房”。
到了丁香爹六十岁生日格辰光，摆之好酒好菜请之勿少相邻来吃饭，做寿。就勒大家全吃好，陆陆续续走勒格辰光，外头来之一个叫花子。丁香爹正好送客人出门么，正好看见。一看认出来了，勿是别人，就是自家格女婿张奎。
张奎原本屋里蛮有点积蓄，哪能没两年就讨饭了呢？原来自从丁香走了之后，张奎无心工作了，还学会了赌铜钿。十赌九骗，屋里点铜钿积蓄全输光，最后连房子也还之赌债了。一天赌台浪伊格邻居赢得开心，得意忘形，就拿自家放谣言污蔑丁香格事体讲出来。张奎后悔莫及，有想过去丁家村拿丁香接转来，但是想想，哪还有面子去见老丈人、丈母娘，就算丁香肯原谅我，我房子也没了，哪能生活呢？所以讨饭过日子。
今朝流落到此地，伊也没想到是老婆新搬过来格屋里。听说此地有人做寿，就来讨口饭吃吃。
丁香爹看见张奎只当没看见，回到房间里告诉老婆跟丁香，说：“小鬼勿习好，做之瘪三了，大家覅去睬伊，也覅拨俚吃物事。”
丁香心里到是真格舍勿得，偷偷到灶披间下之一碗面，交给一个童儿，叫伊送出去拨张奎吃。
张奎一吃格碗面，眼泪就下来了！哪能呢？味道吃出来了，就是自家老婆下格！要紧问童儿：“格家人家阿是姓丁啊？”“是格呀。”“下面格人是啥人？”“阿拉小姐。”对了！“伊人勒啥地方？”“后面灶披间里。”张奎放下碗，往后面灶披间里冲进去，一看没人。丁香下好面就拨爹叫进去了。张奎想想自家就算见到丁香也没面子上去叫伊娘子了！人就往灶头浪撞上去想自杀。幸亏旁边有人一把抓牢，撞昏过去没死。
丁香爹得到消息，想想女婿看来是真格吸取教训了，也就原谅伊了。
夫妻两家头重归于好。张奎也改过重新。现在屋里有铜钿啦，勿再需要靠砌灶头养家糊口，但是张奎还是免费帮助周围格人修补灶头。尤其是自家讨过饭，晓得穷人格苦，每到过年前，晓得穷人没办法过年。夫妻两家头就会准备好勿少物事，勒浪腊月二十四夜里，送到格家人家屋里。
所以后来老百姓为了纪念张奎跟丁香，就拿伊拉两家头格画像贴勒浪灶头浪，格也就是灶王老爷格来历。
音频列表
- 2022-01
- 2021-10
- 2021-09
- 2021-06
- 2021-05
- 2021-04
查看更多
用户评论