立足本国看俄乌（江南古典汉语）_乡土·吴语_免费在线阅读收听下载

标准汉语之一——江南古典汉语

汉藏语系·汉语言·吴方言·太湖片·苏沪嘉小片·

太仓方言大区·嘉定方言区·华亭方言点

（声韵调系统）

立足本国看俄乌

2022年，俄乌战争无疑是吸引全球目光亇大事体，自然引发嘚广泛亇热议。不过，看嘚交关评论，觉着有排网友可能也有眼偏，像煞只是简单亇本嘚对某一方亇主观好恶来评价。当然，网友千千万，各人角度各不相同，並不意外。但是，我伲最好是有能立足于本国利益来分析昰场战争。

窃以为，首先需要关切亇是，昰场战争是否会引发核大战，从而拿全球各国全拖向毁灭。若假爆发核战並波及中国，明显不符合我伲亇利益。毕竟各国有核捆绑战略，一方动用核武器极有可能触发所有有核国家亇核武库，不可不引起警惕。

塱控制㕇常规战争亇情况下，再来看看哪恁评判俄罗斯出兵亇问题。作为饱受俄国人侵略亇中国人来讲，绝对不希望俄乌重新合併为一个“大俄国”亇情况出现。当然，若假俄罗斯打赢，但並不兼併乌克兰，也是可以接受亇结果。拆穿吇讲，各国全不希望身边出现一个强大亇邻居。周围存在统一而强大亇俄国、印度、越南、日本嘞厛，总体对伲全是威胁。俄乌分治、印巴分治，应该更加符合中国利益。俄罗斯、印度若是进一步分裂，对伲亇威胁应该还要降低。但为啥中国民间交关人支持俄罗斯进攻乌克兰？应该讲也是立㕇中国立场上来看亇。因为非常明显亇是，当前中俄两国面对美西方亇遏制，存在共同利益，具有战略互需，可以分担压力。而乌克兰已然成为美西方遏制俄罗斯亇桥头堡，一旦俄罗斯现在就坍脱，中国面临亇压力可能大幅度增加。若然俄罗斯可以朝西突破美西方围堵，甚至彻底打破美国亇霸权体系，嗰么等于削弱嘚我伲当前亇主要威胁，对于统一台湾也有帮助。相信大多数支持俄罗斯打乌克兰亇人全是因为本嘚朴素亇爱国心看见嘚昰层逻辑关系。只是普通民众讲起来比较直白，不像外交部寔恁会打太极。

当然，也有不少人考虑着俄国侵占我国领土亇深仇大恨，反对支持俄罗斯，应该讲相当一部分也是出于爱国心亇。但是，就像有人指出亇伊恁：“合适亇辰光讲合适亇闲话。”当前中俄有战略互需亇情况下要强调中俄历史怨仇並不合适。对于所有伤害过中国亇国家，账无疑要记好。但若是为嘚历史上有过怨仇嘞就一味反对，是否符合我伲亇现实利益撘长远利益嗫？照寔恁想是撘“英法德意俄日美”昰排列强俦全应该绝交！昰排国家何里个朆来欺瞒歇我伲？但是嗫，该应建交还是建交，该应合作还是合作，该应贸易还是贸易，日脚照样要过亇呀！合转来看昰排国家之间也是呀，也上演嘚各种恩怨情仇——英法几百年老冤家，但为遏制德国照样並肩作战；美英打嘚好多年，但利益相符照样联合；日本吃嘚两只原子弹，照样配合美国围堵中俄……完美诠释嘚啥个叫“呒得永远亇敌人，只有永远亇利益”。美英日嘞排国家已经搁置怨仇共同对付我伲，我伲还有人为昔日怨仇嘞反对联手俄罗斯，阿觉着有眼替自家国家“添堵”？

换一只角度看，若然因为俄国人侵占我国领土就本能亇反俄挺乌，倒也大可不必，因为，侵占中国领土亇本来就是以俄罗斯族撘乌克兰族为主要民族、核心人群亇老俄国所为。昰个 “老俄国”，可以指称沙皇时期撘苏联时期。只是后来老俄国分裂之后，曾经亇俄乌利益共同体从中国抢来亇地盘落到嘚俄罗斯境内，乌克兰朆分着而已。我伲要避免畀现在“俄罗斯”“乌克兰”昰两只国号迷惑，某种程度上就是“大俄罗斯”撘“小俄罗斯”，用绰号“熊大”“熊二”或者“大毛”“二毛”可能更加容易让人理解。组成老俄国亇大毛、二毛、三毛、四毛、五毛嘞些儿一俦欺瞒过我伲。只是老俄国分裂之后，大毛、二毛之间矛盾加大，乃么正好二毛撘伲俦远七碰八，呒不直接亇利害冲突，故嘞老俄国有排技术肯转让畀伲，而大毛撘伲俦接壤亇嘞一直防伲一脚㕇塰，某些技术倒也不大肯畀伲。不是话二毛就傍大毛好，一切全是利益关系。

对伲来讲，利用二毛畀亇技术壮大自身，同时利用大毛亇力量分担美国压力，无疑是有利于我伲现实利益亇，大家呒没必要排斥。若然纠结于领土问题一定要反毛，嗰么反大毛也就应该反二毛——佢垯全是当年掠夺我伲亇强盗！无非只是强盗内讧分裂之后二当家朆分着赃物而已！若假只反大当家，不反二当家，昰个逻辑轧实有点不圆满亇，甚至有畀美西方牵嘚鼻头跑亇嫌疑——因为人家既遏制中国，又遏制老俄国亇大当家，但同时却拉拢老俄国亇二当家，佷邋昰个当口还要反大毛、挺二毛，阿觉着不经意间塱壮大我伲当前主要对手亇声势？

当然，虽然我伲目前撘大毛俦有战略互需，但各自国家利益不可能完全相同。昰趟大毛打二毛，虽然有我伲希望看见亇打破美西方遏制亇可能，但是否完全符合我国利益，还有待进一步观察。毕竟，普京决定打，最起码说明大毛决策层认为寔恁做有助于争取大毛亇利益。人家考虑最多亇肯定是人家亇利益，至多有一部分利益撘伲俦正好一致。故嘞对于大毛动武，既覅急嘚喝彩，也覅急嘚谴责，保持一个审慎亇态度，应该是比较稳妥亇。

当然，大毛一动手，就有不少人急不可耐亇拍手叫好，特别是讲着反纳粹亇问题，觉着有必要用武力来解决。的确，乌克兰存在交关问题，无论是腐败还是纳粹化，有排表现的确有眼豁边。甚至有乌克兰纳粹分子窜到香港来煽动暴乱，威胁我伲亇国家安全！若假可以借大毛亇手拿佢垯行脱，也不失为一桩大快人心亇事体。不过，拆穿吇讲，所谓纳粹不纳粹，也只是一个借口而已，关键看符合啥人利益。美西方为嘚遏制大毛，管佷二毛纳粹不纳粹，照样支持，照样纵容！大毛所谓反纳粹，也是因为二毛纳粹化不符合大毛利益。我伲有不少人乐得看大毛打，也是因为二毛亇纳粹势力同样成为美西方亇马仔威胁到中国亇安全。

不过我觉着，不论是俄乌两国内部亇严重问题，还是两国之间亇尖锐矛盾，对我伲亇启示全是极其深刻亇——曾经，甚至是直到现在，有不少人始终邋试图告诉佷： “我伲国家之所以有不少问题，就是因为颜色不对！只要颜色改脱，昰排问题就会迎刃而解，国家发展还要好！”但是嗫，隔壁老熊垯不是已经拿路蹚得清清爽爽啧？一旦颜色改脱，国家崩溃解体，资产大量流失，经济一落千丈，国力持续下滑，腐败照样存在，妇女沦为娼妓，纳粹嘞排恶势力会抬头，本来处于同一国家控制下亇地域矛盾、民族矛盾会上升到尖锐亇国际矛盾並兵戎相见！红色老俄国崩溃三十年之后亇结果大家有目共睹，话嘚还要相信某些敌对势力亇谎言嘞去重蹈覆辙？！现在㧙转来再看看当年俄国人对美西方亇轻信，阿觉着幼稚得可笑？佢话“援助就到”就会来啊？佢话“北约不东扩”就不东扩啧啊？昰种许诺好相信么狗涴就好当饭吃！啥人相信啥人戆！阿末结畀人家踏板借到床口上，极到泾梢梢里极得呒办法嘚么只好发飙、大光火，拔出吇拳头上，还不一定打得赢，阿全自取其辱？！

问题在于，还有交关人看嘚俄国人三十年来不断衰败还不吸取教训，还邋迷信美西方，还邋畀佢垯牵嘚鼻头跑，佷话阿要急煞人？譬如有人指出大毛邋放假消息，话像塔斯社、《真理报》昰排全不可信！结果话锋一转，开始隐射中国。阿觉着有眼滑稽？苏联崩溃之后，大毛、二毛已经全撘美国、印度、菲律宾一样，属于资本主义、白颜色、多党制、普选制，撘中国亇制度不一样啧，为啥话着大毛还要联想着中国而不是二毛、美国？大毛媒体不可信，畀美西方支持亇二毛媒体就可信？美西方媒体就可信？“塔斯社、《真理报》不可信”不是越加应该推论出“美国之音、《纽约时报》不可信”咾？若然要跨制度隐射中国，嗰就说明昰种现象本来就是不分制度亇人类通性，又有啥大惊小怪亇？弄得像大毛撘中国么就是邪恶亇，二毛撘美国么就是正义亇，阿觉着昰种思路就是畀美西方舆论引导亇结果——就是美西方想遏制啥人，佷就去针对啥人！阿戆？佢垯当年许好俄罗斯北约不会东扩，结果嗫，东扩嘚几趟？讲闲话像斥屁一样亇嘞！佷去相信佢垯会对我伲好？阿真人也吃木脱快亇啧！迷信美西方，就像迷信娱乐明星一样，仅仅因为人家有铜钱嘞就认为人家是好亇，阿觉着有眼不成熟？也不看看人家撘佷俦阿是一个利益共同体，人家亇铜钱阿会畀尔用？

佷就看看看美西方㕇台湾问题上哪恁对伲亇么就晓得啧！人家垦思挖脑要阻碍我伲统一，佷还去畀人家谑得立㕇人家立场上针对我伲自家，阿觉着畀人家嫖得方向也呒曼？俄乌战争一定程度上帮我伲预演嘚未来祖国统一战争可能出现亇问题。从截止到乃五月头上亇战况来看，一旦我伲不得不武力统一，美西方是不大可能出兵协助台湾，但我伲必须考虑日本昰个变数。不过美日嘞排替台湾输送武器是蛮有可能出现亇，亏得台岛四面环海，不像乌克兰寔恁陆地边境到块可以渗透。但是一旦我伲像俄罗斯一样朆实现速战速决，就必须对台湾亇抵抗意志撘能力有充分预计。之前不少人估计上昼出兵，下昼就可以发身份证亇想法，固然有乐观、谑头、调节气氛亇作用，但毕竟也难免有麻痹、轻敌亇嫌疑。俄乌战争亇胶着现状应该对伲有极大亇警示作用。俄罗斯打到乃打得寔恁，已经充分暴露嘚佢常规军力亇严重不足，即使最终达成战略目的，也虽胜尤败，可能会弄得像苏芬战争寔恁。一旦失败是越加会带来还要严重亇后果，我伲必须对北方可能出现亇变数作好准备。同样，万一我伲统一战争失败，我伲就有可能畀敌国彻底圈杀脱，中华民族亇伟大复兴可能就此中断，故嘞必须慎之又慎！有辰光不得不感叹：隔壁老熊垯用自家亇鲜血帮我伲拿路全蹚好啧。当然，还一方面，从最近俄军亇蹩脚表现看，既然乌克兰可以邋东欧大平原上攩牢俄罗斯亇钢铁洪流，也就说明万一中俄再次交恶，我伲邋东北大平原上也会有更大亇底气攩牢俄军装甲集群。

乃么有人又要话啧：“一日到夜战争战争战争！我伲要和平！反对战争！”昰个闲话阿对？原则上不错亇，大家期盼和平，尽量避免战争。但是嗫，又是不大全面亇。为啥？我想大家全有目共睹——虽然二战结束后长远呒得世界大战啧，但局部战争时有发生，有亇烈度还相当高！甚至，安理会五常全出兵国外打过仗！说明，还有一样物事比和平越加重要——昰个就是利益。追求和平，远离杀戮，是利益亇一部分，但当和平不足以满足更大利益亇情况下，战争就会爆发。昰个就是我伲不得不面对亇现实世界，切不可理想化。因为世界並未统一，最大亇利益共同体还是国家，国际社会还是丛林世界（误读为“丛林社会”）。地球资源有限，国家之间一定会有各种利益冲突，和平解决固然好，但万一解决不脱，啥人会真亇许好不用武力？英法俄中美，大家全会出国作战保障自身利益，啥人会称让自家利益严重受损还保证不诉诸武力？兔子急嘚还要咬人嘞！

昰趟俄罗斯出兵乌克兰，一定程度上类似于当年中国出兵朝鲜，共同点全是战略缓冲空间畀敌方压缩，甚至威胁到京畿地区，经警告无效后不得不通过军事手段来保障昰个安全空间。虽然打昰一仗肯定要死交关人，但就保障本国长远稳定发展亇总体利益，防止因强敌逼近围困导致本国被侵略、斩首、颠覆而坞入崩溃性亇血雨腥风来讲，代价还是小亇。就像我伲付出嘚相当亇牺牲，㕇朝鲜战场“打得一拳开，免得百拳来”，保障嘚我伲已经长达七十几年亇和平发展环境。只是俄罗斯昰趟是否有能取得昰个效果，还有待观察。但不管哪恁，俄罗斯昰趟出于京畿核心地区亇安全而出国作战，傍英美法嘞排不远万里千里打越南、打埃及、打巴拿马、打南联盟、打伊拉克、打利比亚嘞些儿越加具有道义制高点，也比佢自家当年打阿富汗更加容易得着国际社会理解，连档号称“民主国家样板”亇印度也不肯跟嘚美国制裁俄罗斯。

总亇讲来，利益存在碰磕，呒得绝对和平。每个人全依赖于一个国家而生存，每个国家全可能为本国人群亇长远生存利益采取军事行动。呼吁和平，原则上不错，就是望嘚大家争夺利益亇辰光尽可能覅用暴力，打得额角破碎、血淋带渧毕竟有眼罪过，大家全爷娘养亇。但佷若然真亇是一个纯粹亇和平主义者，嗰么标准应该是一致亇——不管啥人动武，统统应该谴责！不管啥人受难，统统应该同情！覅有排国家打人家么像煞共总眼乌珠大得不看见，像“间歇性死脱”亇恁，还一排国家打人家么马上像煞眼睛射侵得 “啀啦啀啦”叫，说明根本不是在乎和平不和平，而是明亇立㕇垯某些国家亇立场上！有排人对于越南、巴拿马、阿富汗、伊拉克、叙利亚受到亇战争苦难视而不见，听而不闻，但看见乌克兰寔恁就马上假惺惺亇表示“为啥我亇眼睛里常庄包嘚眼泪”！虚伪得不得了！看看也戳心亇！轧实就是“美国杀人呒得问题，俄国杀人就是问题”，根本就並不是在乎所有国家亇战争苦难，就是立㕇美国亇立场上，而美国撘伲俦目前有明显亇利益冲突，昰排人想表达啥，大家全心知肚明！千万覅畀佢垯“鳄鱼亇眼泪水”迷惑！侺若然像俄国人一样也去上佢垯黄狼当么，大毛、二毛亇今朝就会是我伲亇明朝！侺阿要去试试看？！

阿末脚，讲讲语言问题。交关人认为乌克兰语撘俄罗斯语，既然称为两种“语言”，嗰么应该是差别大得呒能通话亇。但轧实语言撘人群一样，是有亲属关系远近亇。一支共同亇原始人群，随嘚迁移、扩散嘞些儿因素，其原始母语也会逐点分化，逐眼变得越来越不一样，形成不同亇方言，或者不同亇语言。但具体分化到哪恁么算一种独立亇语言？並呒得一种绝对量化亇标准。以至于有排称为 “一种语言”亇，内部可能难以通话，譬如我伲汉语——青岛、上海、温州、厦门、南宁……互相听不懂亇。但有排号称 “不同语言”亇，互相可以一定程度通话，听说讲乌克兰语撘俄罗斯语就是寔恁。有观点认为同为东斯拉夫语亇俄乌两语亇区别可能仅相当于汉语官话方言之间亇差别，譬如河南闲话撘四川闲话亇差别。就算差别大点，可能也就像北京闲话撘南京闲话寔恁。乌克兰从老俄国独立，有点类似河南从中国独立出来，乃么河南使用洛阳语音为通用语音，类比于乌克兰语，中国其他地方继续使用北京语音为通用语音，类比于俄罗斯语，大概就是寔恁亇感觉。就像前头我伲话着亇，覅畀“俄罗斯”“乌克兰”两只国名迷惑，轧真就是大俄罗斯撘小俄罗斯——同一支人群——东斯拉夫人，同一个国家起源——基辅罗斯，照名分应该有广泛亇团结基础，也的确紧密结合嘚几百年，组成过一个强大亇老俄国，但最终邋内忧外患中崩溃解体，使得原本一国之内亇地域矛盾、人群矛盾上升到尖锐亇国际矛盾，並邋各方势力亇挑动下兄弟阋墙，同室操戈，实在是可悲可叹，发人深省！