ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་ཚོགས་འདུ་འཚོགས་པ།
ཟླ3ཚེས30ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་ཚོགས་འདུ་འཚོགས་ཏེ《དུས་རབས་གསར་པར་དབུས་རྒྱུད་ས་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་མཛུབ་ཁྲིད་བསམ་འཆར》ལ་གྲོས་ཞིབ་བྱས་པ་རེད། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་འདུ་གཙོ་སྐྱོང་གནང་བ་རེད།
ཚོགས་འདུའི་ཐོག ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག དབུས་རྒྱུད་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གྲུབ་འབྲས་གལ་ཆེན་ཐོབ་པ་དང་། འབྲུ་རིགས་ཐོན་སྐྱེད་རྟེན་གཞི་དང་། ནུས་རྒྱུ་མ་རྒྱུའི་རྟེན་གཞི། སྒྲིག་ཆས་བཟོ་སྐྲུན་དང་ལག་རྩལ་མཐོ་བའི་ཐོན་ལས་རྟེན་གཞི། ཕྱོགས་བསྡུས་འགྲིམ་འགྲུལ་སྐྱེལ་འདྲེན་གྱི་ལྟེ་བའི་གནས་བབ་སྔར་བས་སྲ་བརྟན་དུ་ཕྱིན་ཡོད་ཅེས་བསྟན་ཡོད།
ཚོགས་འདུའི་ཐོག དབུས་རྒྱུད་ས་ཁུལ་གྱིས་ཤར་ནུབ་སྦྲེལ་མཐུད་དང་ལྷོ་བྱང་སྦྲེལ་མཐུད་ཐུབ་ཅིང་། ཐོན་ཁུངས་ཕུན་སུམ་ཚོགས་པ་དང་། འགྲིམ་འགྲུལ་དར་རྒྱས་ཆེ་བ། ཐོན་ལས་ཀྱི་རྨང་གཞི་ལེགས་པ། རིག་གནས་ཀྱི་རྨང་གཞི་གཏིང་ཟབ་པ། འཕེལ་རྒྱས་ཀྱི་གཏིང་ཤུགས་ཆེ་བ་བཅས་ཡོད་པས། དབུས་རྒྱུད་ས་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུར་སྤྱི་ཡོངས་རང་བཞིན་གྱི་དོན་སྙིང་ལྡན་ཡོད། འཕེལ་རྒྱས་ཀྱི་དུས་མཚམས་གསར་པར་སླེབས་པས། དབུས་རྒྱུད་ས་ཁུལ་འཕེལ་རྒྱས་གཏོང་བར་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་དང་། ཏང་གི་ཚོགས་ཆེན་བཅུ་དགུ་པ་དང་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་། གསུམ་པ། བཞི་པ། ལྔ་པ་བཅས་ཀྱི་དགོངས་དོན་ཕྱོགས་ཡོངས་ནས་ལག་བསྟར་བྱེད་པ།བློ་བརྟན་འགྱུར་མེད་ངང་འཕེལ་རྒྱས་ཀྱི་འདུ་ཤེས་གསར་པ་ལག་བསྟར་བྱེད་པ། མི་དམངས་ཀྱི་ཉིན་བཞིན་ཆེ་རུ་འགྲོ་བའི་མཛེས་སྡུག་ལྡན་པའི་འཚོ་བའི་དགོས་མཁོ་སྐོང་རྒྱུ་དེ་རྩ་བའི་དམིགས་ཚད་དུ་འཛིན་ནས། རྒྱལ་ནང་གི་འཁོར་རྒྱུག་ཆེན་པོ་གང་མགྱོགས་བསྐྲུན་རྒྱུ་གཙོ་བོར་བྱེད་པ་དང་། རྒྱལ་ནང་དང་རྒྱལ་སྤྱི་གཉིས་ཀྱི་འཁོར་རྒྱུག་ཕན་ཚུན་སྐུལ་འདེད་གཏོང་བའི་འཕེལ་རྒྱས་ཀྱི་རྣམ་པ་གསར་པ་གང་མགྱོགས་གཏོད་དེ། སྔོན་ཐོན་བཟོ་སྐྲུན་ལས་རིགས་ཀྱིས་འདེགས་སྐྱོར་བྱེད་པའི་དེང་རབས་ཐོན་ལས་མ་ལག་ཏན་ཏིག་ངང་བསྐྲུན་པ་བཅས་བྱས་ཏེ་དབུས་རྒྱུད་ས་ཁུལ་གང་མགྱོགས་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་དང་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་བསྐྲུན་པའི་རྒྱང་སྐྱོད་ཀྱི་ལམ་བུ་གསར་པའི་ཁྲོད་ལེགས་སྐྱེས་སྔར་བས་ཆེ་བ་འབུལ་དགོས་པའི་ནན་བཤད་བྱས་ཡོད།
ཚོགས་འདུའི་ཐོག་ད་དུང་དོན་གནད་གཞན་དག་ལ་ཞིབ་འཇུག་བྱས་པ་རེད།
ཏང་གི་ལོ་རྒྱུས་སློབ་སྦྱོང་སློབ་གསོའི་མིག་དཔེ་འདོན་རྒྱུར་སྐུལ་འདེད་བཏང་བ།
ཟླ3ཚེས30ཉིན་གྱི་སྔ་དྲོར་ལྗོངས་ཐད་གཏོགས་ལས་ཁུངས་ལས་དོན་ཨུ་ལྷན་གྱིས་རང་སྐྱོང་ལྗོངས་ཏང་ཨུད་ཏང་གི་སློབ་གྲྭར“བོད་ལྗོངས་ཀྱི་ལས་ཁུངས་ཀྱི་ཏང་འཛུགས་སྐྱོང་སྐོར་གྱི་འཆད་ཁྲིད”བྱས་ནས་ལྗོངས་ཏང་ཨུད་ཏང་གི་སློབ་གྲྭའི(སྲིད་འཛིན་སློབ་གླིང)སློབ་སྤྱི་གཞོན་པ(ཡོན་ཀྲང་གཞོན་པ)རང་སྐྱོང་ལྗོངས་ཏང་གི་ལོ་རྒྱུས་སློབ་སྦྱོང་སློབ་གསོའི་སྒྲོག་འགྲེལ་ཚོགས་པའི་ཁོངས་མི་སུན་ཤང་ཅུན་གྱིས་ཏང་གི་ལོ་རྒྱུས་སློབ་སྦྱོང་སློབ་གསོའི་སྐོར་ཟུར་ཁྲིད་བྱས་པར་ལྗོངས་ཐད་གཏོགས་སྡེ་ཚན་ཁག་གི་ཏང་ཡོན་ལས་བྱེད་པའི་འཐུས་མི260ལྷག་ཙམ་ཞུགས་ཡོད།
སུན་ཤང་ཅུན་གྱིས་རང་ངོས་ཀྱི་ཞིབ་འཇུག་གྲུབ་འབྲས་དང་ཟུང་འབྲེལ་བྱས་ཁར“ཏང་གི་ལོ་རྒྱུས་སྦྱངས་ནས་དད་སེམས་བརྟན་དུ་གཏོང་བའི”བརྗོད་དོན་གཙོ་བོ་དང་ཏང་གི་ལོ་རྒྱུས་ལ་དམིགས་ནས་ཀྲུང་གོ་གུང་ཁྲན་ཏང་གི་དད་སེམས་གང་ཡིན་པ་དང་། དད་སེམས་ཇི་ལྟར་ཆགས་པར་བྱེད་པ། དད་སེམས་དང་ཀྲུང་གོ་གུང་ཁྲན་ཏང་མིའི་དད་སེམས་ཀྱི་སྟོབས་ཤུགས་མཐའ་འཁྱོངས་དང་འཕེལ་རྒྱས་ཇི་ལྟར་གཏོང་བ། དུས་རབས་གསར་པར་དད་སེམས་བརྟན་པོ་བཅངས་ནས་བྱ་གཞག་རླབས་པོ་ཆེར་སྐུལ་འདེད་ཇི་ལྟར་གཏོང་བ་སོགས་ཐད་གོ་བདེ་ཤེས་སླའི་ཐོག་ནས་འགྲེལ་བཤད་བརྒྱབ་པ་མ་ཟད། ལོ་རྒྱུས་ཀྱི་དོན་དངོས་མང་པོ་དང་ཟུང་འབྲེལ་གྱིས་རྒྱས་བཤད་བྱས་ཏེ་ལོ་རྒྱུས་མེ་ལོང་དུ་བཟུང་བ་དང་ལོ་རྒྱུས་ཐོག་ནས་གནས་ལུགས་བཤད་པར། གཏན་ཚིགས་ཁ་གསལ་ཞིང་དཔེ་མཚོན་ཞིབ་ཚགས་པར་བརྟེན་ཚང་མར་ཡིད་དབང་འཕྲོག་པའི་ཏང་གི་ལོ་རྒྱུས་སློབ་གསོའི་སློབ་ཚན་ཞིག་ཁྲིད་དེ་དེར་ཞུགས་པའི་ཏང་ཡོན་ལས་བྱེད་པ་ཚང་མའི་ངོས་འཛིན་གཅིག་མཐུན་བྱུང་བ་རེད།
ལོ་རྒྱུས་བློ་ལ་བརྟན་པོར་ངེས་ནས་འབྱུང་འགྱུར་གཏོད།
བོད་ལྗོངས་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོ་ཁང་ནི་ཞིང་བྲན་ལམ་ལུགས་མེད་པར་བཟོས་པའི་ལས་འགུལ་སྐོར་གྱི་རྒྱལ་ཡོངས་ཀྱི་དྲན་གསོ་ཁང་གཅིག་པུ་དེ་ཡིན་པ་རེད། དྲན་གསོ་ཁང་དུ་ལོ་རྒྱུས་ཀྱི་ཚད་ལྡན་ཡིག་ཆའི་དཔྱད་གཞིའི་ཡིག་ཚགས་དང་། རིག་དངོས། པར་རིས། སྒྱུ་རྩལ་བརྩམས་ཆོས་བཅས800ལྷག་ཙམ་སྒྲིག་གཤོམ་བྱས་ཏེ། ཀྲུང་གོའི་གུང་ཁྲན་ཏང་གིས་བོད་ལྗོངས་ཀྱི་མི་རིགས་ཁག་གི་མི་དམངས་ཀྱི་སྣེ་ཁྲིད་དེ་རླབས་ཆེན་གྱི་དམངས་གཙོའི་བཅོས་སྒྱུར་བྱས་ནས་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་པའི་ཞིང་བྲན་ལམ་ལུགས་མེད་པར་བཟོས་པའི་ལོ་རྒྱུས་ངོ་སྤྲོད་ཞིབ་ཕྲ་བྱས་པ་རེད།
ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས2021ལོའི་དཔྱིད་རྨོད་དཔྱིད་འདེབས་ཀྱི་དངུལ་རྩའི་ཞབས་ཞུའི་ལས་དོན་བཀོད་སྒྲིག་བྱས་པ།
ཉེ་ཆར། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས་བོད་ལྗོངས་ཀྱི་ས་ཕྱོགས་གང་སར་དཔྱིད་རྨོད་དཔྱིད་འདེབས་འགོ་ཚུགས་པའི་དུས་དང་བསྟུན་ནས། 《2021ལོའི་དཔྱིད་རྨོད་དཔྱིད་འདེབས་རིང་དངུལ་རྩའི་ཞབས་ཞུའི་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ》བཀྲམ་ནས་རིམ་པ་གཉིས་པའི་ཡན་ལག་དངུལ་ཁང་ཁག་ལ་དུས་ཚོད་དམ་འཛིན་གྱིས་དཔྱིད་རྨོད་དཔྱིད་འདེབས་རིང་དངུལ་རྩའི་ཞབས་འདེགས་གང་ལེགས་ཞུ་དགོས་པའི་ཐད་བླང་བྱ་བཏོན་པ་རེད།
བརྡ་ཐོའི་ནང་བསྟན་དོན། དཔྱིད་རྨོད་དཔྱིད་འདེབས་རིང་དངུལ་རྩའི་ཞབས་འདེགས་ཞུ་རྒྱུ་ནི་དངུལ་ཁང་དེས་ཞིང་འབྲོག་ཐོན་སྐྱེད་ལ་རྒྱབ་སྐྱོར་བྱས་ནས་ཞིང་འབྲོག་མང་ཚོགས་ལ་འབབ་འཕར་ཕྱུག་འགྱུར་ཡོང་བར་བྱེད་པའི་གལ་འགངས་ཤིན་ཏུ་ཆེ་བའི་ལས་དོན་ཞིག་ཡིན་པར་བརྟེན། དངུལ་ཁང་ཁག་གིས་ཞིང་ལས་རྒྱུ་ཆ་སྐྱེལ་འདྲེན་དང་། ཞིང་ལས་ཀྱི་རྨང་གཞིའི་སྒྲིག་བཀོད་འཛུགས་སྐྲུན། ཞིང་ལས་གཉེར་སྐྱོང་བྱེད་པོའི་ཐོན་སྐྱེད་བསྐྱར་མ་རྒྱ་སྐྱེད་སོགས་ཀྱི་གཙོ་གནད་ཁྱབ་ཁོངས་ལ་དམིགས་ནས། ཀྲུང་དབྱང་གིས་བོད་ལྗོངས་ལ་གནང་བའི་དངུལ་རྩའི་གཟིགས་སྐྱོང་སྲིད་ཇུས་ཁག་ལག་བསྟར་མཐར་ཕྱིན་པ་བྱེད་དགོས་པའི་བླང་བྱ་བཏོན་པ་རེད།
ཤེས་རྟོགས་བྱུང་བར་གཞིགས་ན། དངུལ་ཁང་དེས་ན་ནིང་ནས་བཟུང“ཞིང་ཕན”རིགས་ཀྱི་དངུལ་བུན་མང་དག་ཅིག་བཏང་ནས་གང་མཁོ་གང་འདེམས་ཀྱིས་ཞིང་འབྲོག་ཐོན་སྐྱེད་གཉེར་སྐྱོང་ཐད་ཀྱི་མ་དངུལ་གྱི་དགོས་མཁོ་སྐོང་གང་ཐུབ་བྱས་ཡོད། “ལོ་ལྔ་ཚན་བཅུ་བཞི་པའི”འགོ་འཛུགས་ལོ་དང་བསྟུན་ནས། འདི་ལོ་དེ་བས་མང་བའི་དངུལ་རྩའི་ཐོན་རྫས་གསར་གཏོད་དང་ཞིང་འབྲོག་མང་ཚོགས་ཀྱི་དགོས་མཁོར་གཞིགས་ཏེ་དངུལ་རྩའི་སྒྲིག་ཆས་སྒྲིག་བཀོད་བྱས་ནས་འཚོ་བ་དང་ཐོན་སྐྱེད་ལ་སྟབས་བདེ་བསྐྲུན་རྒྱུ་དང་སྤྱི་ཚོགས་ཀྱི་འགན་འཁྲི་ཕྲག་ཏུ་ཁུར་ནས་གྲོང་གསེབ་དར་རྒྱས་དང་དབུལ་བྲལ་འགག་སྒྲོལ་གྱི་གྲུབ་འབྲས་སྲ་བརྟན་དུ་གཏོང་བར་དངུལ་རྩའི་ཞབས་འདེགས་ཞུ་རྒྱུ་རེད།
མཐོ་སྒང་གི་ཇག་འཇོམས་དཔའ་བོ་ནམ་མཁའ་རྡོ་རྗེའི་ངག་ནས་ཏང་གི་ལོ་རྒྱུས་ལ་ཉན་པ།
“ངས་ཏང་ཡོན་གྱི་ཚད་གཞིའི་ཐོག་ནས་རང་ཉིད་ལ་བླང་བྱ་ནན་པོ་འདོན་པ་དང་། ང་རྒྱལ་དང་ཁེངས་དྲེགས་ཅི་ཡང་མེད་པར་བྱས་རྗེས་འཇོག་པ་དང་། མེས་རྒྱལ་ལ་དྲིན་ལན་འཇལ་རྒྱུ་ཡིན།” འདི་ནི་ཧ་ཅང་བབ་ཆགས་པའི་སྐད་ཆ་ཞིག་སྟེ། དེའང་ད་ལྟ་དགུང་ལོ70ལ་སླེབས་པའི་ཏང་ཡོན་རྒན་གྲས་ནམ་མཁའ་རྡོ་རྗེ་ཏང་ནང་ཞུགས་སྐབས་ཀྱི་ཆོད་སེམས་ཡིན་ལ། ཁོང་གི་མི་ཚེ་གང་བོའི་སྲུང་བྱའང་རེད།
ནམ་མཁའ་རྡོ་རྗེ་ལོ་གཉིས་ལ་སོན་སྐབས་ཁོའི་ཨ་མ་ཚེ་ལས་འདས་ཤིང་། ལོ་དྲུག་ལ་སླེབས་དུས་ཨ་ཕ་ཚེ་ལས་འདས། དེའ་ཁར་ཁོའི་གཉེན་ཉེ་གཉིས་ངོ་ལོག་ཟིང་འཁྲུག་པས་བསད་པ་དངོས་སུ་མཐོང་བས། ནམ་མཁའ་རྡོ་རྗེའི་སེམས་སུ་ཁོ་རང་ནར་སོན་རྗེས་བཅིངས་འགྲོལ་དམག་མི་བྱས་ནས་ངོ་ལོག་ཟིང་འཁྲུག་པ་རྩ་མེད་དུ་གཏོང་རྒྱུའི་འདུན་པ་སྐྱེས།1970ལོར་ངོ་ལོག་ཟིང་འཁྲུག་པར་རྡུང་རྡེག་གཏོང་ཆེད། མང་ཚོགས་ལ་བརྟེན་ནས་མཐའ་མཚམས་བདེ་འཇགས་སྲུང་སྐྱོང་ལེགས་པོ་བྱེད་པ་དང་། དུས་རྒྱུན་ངལ་རྩོལ་ལ་དགའ་ཞིང་བརྩོན་སེམས་ཆེ་བ། དཀའ་སྡུག་ཐེག་ཐུབ་ཅིང་སློབ་སྦྱོང་ལ་དགའ་བའི་ནམ་མཁའ་རྡོ་རྗེ་ནི་རིམ་པ་རེ་རེ་བཞིན་གདམས་ཐོན་བྱུང་ནས་གཟི་བརྗིད་ལྡན་པའི་ངང་ཕྱུག་ཚང་གྲོང་ཚོའི་མི་དམངས་ཀུང་ཧྲེའི་ཡུལ་དམག་ལྡིང་ཤོག་ནང་ཞུགས་ཤིང་། ཕྱིས་སུ་དགེ་རྒྱས་རྫོང་དུ་སྐད་གྲགས་ཆོད་པའི་་མེ་མདའ་སྐྱེན་པོ་ཞིག་ཏུ་གྱུར།
1971ལོའི་ཟླ6པར། ངོ་ལོག་ཟིང་འཁྲུག་པས་ཡང་བསྐྱར་སྤུ་ཧྲེང་རྫོང་ཧོར་ཤང་ནས་འབྲོག་པར་གནོད་འཚེ་བཏང་སྟེ་ནོར་ལུག་འཕྲོག་བཅོམ་བྱས། ནམ་མཁའ་རྡོ་རྗེ་དང་འཐབ་གྲོགས་བཞི་འཕྲལ་མར་ཧོར་ཤང་དུ་ངོ་ལོག་ཟིང་འཁྲུག་པ་འཚོལ་དུ་སོང་། བསམ་ཡུལ་ལས་འདས་པ་ཞིག་ལ་དགྲ་བོས་སྔ་ས་ནས་འཇབ་སྒུག་བྱས་ཡོད་སྟབས། འཐབ་གྲོགས་གཅིག་འཕྲལ་མར་སྤུ་ཧྲེང་རྫོང་དྲག་ཆས་པུའུ་རུ་རོགས་སྐྱོབ་པ་འཚོལ་བར་ཕྱིན། ངོ་ལོག་ཟིང་འཁྲུག་པས་ནམ་མཁའ་རྡོ་རྗེ་དང་ཁོའི་འཐབ་གྲོགས་གསུམ་གྱི་མཐའ་ནས་བསྐོར་ཞིང་། མདེའུ་སེར་བ་འབབ་པ་བཞིན་ཁོ་ཚོའི་ཕྱོགས་སུ་འཕངས། འཐབ་གྲོགས་གཉིས་སྔ་རྗེས་སུ་མེ་མདའ་ཕོག་ནས་རང་སྲོག་ཤོར་བ་དང་། འཐབ་གྲོགས་གཅིག་གི་ཕོ་བར་མེ་མདའ་ཕོག་ནས་འགུལ་ཡང་མི་ཐུབ་པར་གྱུར་ཞིང་། ནམ་མཁའ་རྡོ་རྗེས་རང་ཉིད་ཀྱི་ངོ་གདོང་དང་རྐང་པ་གཡས་པར་མེ་མདའ་ཕོག་ནས་ཁྲག་བཞུར་བཞིན་ཡོད་པ་མཐོང་། ས་བབ་ལེགས་པོ་ཞིག་རྙེད་སྟབས། ངོ་ལོག་ཟིང་འཁྲུག་པས་གང་འདོད་དུ་ཚུར་རྒོལ་བྱེད་མི་ཕོད་པར་མགོ་འདོགས་ཞུས་ཞེས་སྐད་བརྒྱབ།
ཁོང་གིས་མགོ་བཏགས་མ་ཞུས་པར་འཐབ་འཛིང་དེ་ཆུ་ཚོད4ཡས་མས་ཙམ་བྱས་ཤིང་། ནམ་མཁའ་རྡོ་རྗེ་དང་འཐབ་གྲོགས་ཀྱིས་གོ་སྐབས་བཙལ་ནས་ཕར་རྒོལ་བྱས། སྐབས་དེར་ངོ་ལོག་ཟིང་འཁྲུག་པ་ཞིག་གི་མགོ་བོ་རྡོའི་གསེབ་ནས་ཐོན་པ་དང་། བར་སྐབས་དེ་དང་བསྟུན་ནས་མེ་མདའ་འཕང་བ་ན་ངོ་ལོག་ཟིང་འཁྲུག་པ་ལམ་སེང་སྐྲག་ནས་བྲོས།
1974ལོའི་ཟླ9པར་ནམ་མཁའ་རྡོ་རྗེ་གཟི་བརྗིད་ལྡན་པའི་ངང་ཀྲུང་གོའི་གུང་ཁྲན་ཏང་ནང་ཞུགས། ལོ་ངོ47གྱི་རིང་ལ། ནམ་མཁའ་རྡོ་རྗེས་གྲོང་ཚོའི་ཀྲུའུ་རེན་དང་ཏང་ཀྲི་པུའུ་ཡི་ཨུ་ཡོན་བྱས་མྱོང་བ་དང་། ས་བབ་མཐོ་ཚད་སྨི4200ཟིན་པའི་ཕྱུག་ཚང་གྲོང་ཚོ་རུ་རང་ཉིད་ཀྱི་དམ་བཅའ་བརྟན་པོར་སྲུང་ནས་བསྡད་ལ། སྐབས་དེ་དུས་ཇག་པ་བཅོམ་པའི་ལོ་རྒྱུས་དེའང་ཁོའི་སེམས་སུ་ཉར་བའི་དྲན་པ་ཞིག་ཏུ་གྱུར།
ད་ལྟ་གནས་སྤོ་དབུལ་སྐྱོར་གྱི་སྲིད་ཇུས་ལག་ལེན་བསྟར་བ་བརྒྱུད་ཁོ་རང་སྤྲོ་སྐྱིད་སྡོད་གསར་བཀོད་སྒྲིག་ས་ཚིགས་ཀྱི་ཁང་པར་བསྡད་ཡོད་ལ། ཟླ་རེར་རྒན་གསོའི་དངུལ་ཡང་ཐོབ་བཞིན་ཡོད། ཁོང་གིས་རྟག་ཏུ་བྱིས་པ་ཚོར་བོད་ལྗོངས་སྤྱི་ཚོགས་རྙིང་པའི་ཡ་ང་སྙིང་རྗེ་མེད་པའི་ལོ་རྒྱུས་བརྒྱུད་རྗེས་ད་གཟོད་གཞི་ནས་ཏང་གིས་ང་ཚོར་གནང་བའི་བདེ་སྐྱིད་ཀྱི་འཚོ་བ་ནི་ཇི་འདྲའི་རྩ་ཆེན་དང་ཐོབ་དཀའ་བ་ཞིག་ཡིན་པ་རྟོགས་ཐུབ་ཅེས་བརྗོད་བཞིན་ཡོད།
ས་མཐོའི་ཞིང་འབྲོག་པས་དེང་རབས་ཅན་གྱི་འཚོ་བ་གསར་པར་རོལ།
ཟླ་གསུམ་པར་བོད་ལྗོངས་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོ་དུས་བཀག་ལྟར་ཤར། འཛམ་གླིང་སྐྱེ་བོ་ཀུན་གྱིས་དོ་སྣང་བྱེད་པའི་ཉིན་མོ་དེར་སྡུག་བསྔལ་དང་འཚོ་བ་གསར་པ་ནི་ཉིན་དེའི་གཙོ་གནད་ཀྱི་ཐ་སྙད་ཅིག་ཏུ་གྱུར་ཡོད།
ལོ76ལ་སླེབས་པའི་བོད་རང་སྐྱོང་ལྗོངས་ལྷོ་ཁ་གྲོང་ཁྱེར་སྣེ་གདོང་ཆུས་ཁེ་གསུམ་སྡེ་ཁུལ་གྱི་གྲོང་མི་དགེ་ལེགས་ནི་སྤྱི་ཚོགས་རྙིང་པར་ཞིང་བྲན་ཞིག་ཡིན་པ་དང་། ཞིང་བྲན་བདག་པོའི་བཤུ་གཞོག་དང་གཉའ་གནོན་བཟོད་ཐབས་བྲལ་བར་བརྟེན། དམངས་གཙོའི་བཅོས་བསྒྱུར་མ་བྱས་གོང་བར་གཅེན་པོ་དང་མཉམ་དུ་བྲོས་བྱོལ་གྱི་འཚོ་བ་བསྐྱལ།
“དམངས་གཙོའི་བཅོས་བསྒྱུར་བྱས་རྗེས་ངེད་གཉིས་ལ་ས་ཞིང་དང་། ཕྱུགས་ཟོག ཁང་པ་བཅས་རག་ནས་ལྟོ་གོས་ལ་སེམས་ཁྲལ་མེད་པའི་འཚོ་བ་སྐྱེལ་རྒྱུ་བྱུང་། ད་ཆ་འཚོ་བ་ཉིན་རེ་བཞིན་ལེགས་སུ་འགྲོ་བཞིན་ཡོད་ཅིང་རྒན་གསོ་དང་སྨན་བཅོས་ལ་སྲིད་གཞུང་གི་འགན་ལེན་ཡོད་པས་འབྱུང་འགྱུར་ལ་སེམས་ཁྲལ་གང་ཡང་མི་འདུག”ཅེས་དགེ་ལེགས་ཀྱིས་བཤད།
དགེ་ལེགས་ཀྱི་ལས་དབང་དང་འདྲ་བའི་རྒྱ་ཆེའི་ཞིང་བྲན་ཚོས1959ལོའི་ཟླ3པར་དམངས་གཙོའི་བཅོས་བསྒྱུར་བྱས་པ་དང་བསྟུན་ཏེ་མི་རབས་ནས་མི་རབས་བར་གྱི་བྲན་གཡོག་གི་ལས་དབང་ལ་འགྱུར་ལྡོག་བཏང་ནས། རང་ཉིད་ཀྱི་ལས་དབང་ལ་ཁ་ལོ་སྒྱུར་བ་དང་དེ་བས་མཛེས་སྡུག་ལྡན་པའི་འཚོ་བ་སྐྱེལ་འགོ་ཚུགས་ཡོད།
ལོ32ལ་སླེབས་པའི་སྲི་ཐར་རྡོ་རྗེ་ནི་བོད་ལྗོངས་སློབ་ཆེན་ཀྲུང་གོའི་བོད་རིག་པ་ཞིབ་འཇུག་སུའོ་ཡི་གླིང་སྒྲུང་ཞིབ་འཇུག་མཁས་དབང་ཞིག་རེད། ཞིང་བྲན་གྱི་ཁྱིམ་དུ་སྐྱེས་པའི་གླིང་སྒྲུང་སྒྱུ་རྩལ་པ་དེས་རྒྱལ་ཁབ་ཀྱིས་མངོན་མིན་རིག་གནས་ཤུལ་བཞག་ལ་མཐོང་ཆེན་བྱས་པ་དང་བསྟུན་ནས་མི་ཚེའི་ལམ་བུར་འགྱུར་ལྡོག་ཕྱིན་ཡོད།
སློབ་གསོ་པུའུ་ཡིས་སློབ་གྲྭ་ཆུང་འབྲིང་གནས་ཚུལ་འདི་དག་དང་འབྲེལ་བ་ཡོད་པར་གཏན་འགོག་བྱ་རྒྱུའི་བརྡ་ཁྱབ་བཏང་བ།
རྒྱལ་སྲིད་སྤྱི་ཁྱབ་ཁང་གསར་འགྱུར་ལས་དོན་ཁང་གིས་ཟླ3པའི་ཚེས31ཉིན་འཚོགས་པའི་གསར་འགྱུར་ཡོངས་བསྒྲགས་ཚོགས་འདུའི་སྟེང་། སློབ་གསོ་པུའུ་ཡི་འབྲེལ་ཡོད་འགན་ཁུར་མི་སྣས་བསྟན་དོན། འོས་འགན་སློབ་གསོའི་རྒྱུགས་མི་ལེན་པར་ཐག་ཉེ་ས་ནས་སློབ་གྲྭར་ཞུགས་པའི་གཏན་འབེབས་དང“སྤྱི་དམངས་ཀྱི་མཉམ་བསྡུའི”སྲིད་ཇུས་དོན་འཁྱོལ་གཏིང་ཟབ་ཡོང་བ་བྱས་ཏེ། སློབ་གྲྭ་ཆུང་འབྲིང་གིས་སློབ་མ་བསྡུ་བའི་སློབ་ཞུགས་དང་རྣམ་པ་གང་རུང་གི་སྤྱི་ཚོགས་ཀྱི་འགྲན་བསྡུར་དང་འབྲེལ་བ་ཡོད་པ་གཏན་འགོག་བྱས་ནས་ཁེ་ཕན་གྱི་སྦྲེལ་ཐག་འདི་རིགས་གཏན་གཅོད་བྱ་རྒྱུ་ཡིན་ཞེས་བསྟན་ཡོད།
ཚོགས་འདུའི་ཐོག་རིམ་པ་རྗེས་མར་ལས་ཀའི་ཤུགས་ཚད་རྒྱ་ཆེ་རུ་བཏང་ནས་གཤམ་གྱི་ཕྱོགས་གསུམ་གྱི་ལས་ཀ་གཙོ་བོར་བཟུང་ནས་ལེགས་སྒྲུབ་བྱ་རྒྱུའི་བརྡ་ཁྱབ་བཏང་བ་སྟེ།
གཅིག འགྲན་བསྡུར་རྣམ་གྲངས་ཀྱི་དོ་དམ་ལ་ཤུགས་སྣོན་རྒྱག་རྒྱུ།
གཉིས། ཁྲིམས་འགལ་གྱི་འགྲན་བསྡུར་ལ་ཆད་གཅོད་ནན་མོ་གཏོང་རྒྱུ།
གསུམ། སློབ་མ་བསྡུ་བའི་སྲིད་ཇུས་ལག་བསྟར་ནན་མོ་བྱ་རྒྱུ་བཅས་རེད།
དྲ་གྲོགས་ལྷན་རྒྱས་ཐེངས་རྗེས་མར་སླར་ཡང་མཇལ།
用户评论