画龙点睛
甚以早,有一個画家。渠画人儿画好险画好。当时节,多险多嗰佛殿儿里,沃有渠嗰人儿画起。
有一遍,渠缩金陵安乐寺底转,画了四头龙。個四头龙,画起相像险相像,隔远眙拉去,好比会动嗰,就伉真嗰龙一色。大家人听讲后,沃赶来,就想走来亲眼张一张。
個不眙不要紧也!一眙也,匄吓一跳。
訾那呢?
個四头龙,有眼冇珠嗰?
想不到也?老司头也会脚踏西瓜皮里爻。真真是,叫一世嗰张阁老,还晓不得张阁老姓张;画一世嗰人儿,还画头龙有眼冇珠。
好希,個儿就匄别人打鼻头铳打死,有人就叫渠走逮龙嗰眼乌珠画画起。
对此,渠是头��,抿嘴儿笑笑,讲:“嗐!個还真不是我画落爻,是实在画不得也!眼乌珠只画拉上,龙就会飞去爻道嗰。”
画屏墙里嗰人儿,会翼膀生起飞去爻。俫说话,有何乜人会相信呢?一时间,大家人沃讲渠是大颓翻,吹喇叭,讲天话恁讲起,连個绺讲不牢。
塌拉,渠也实在冇法,喫大家人不落,只好逮其中两头,眼乌珠画起。
狃晓得也?渠個一点只点拉落,天里就䃔嗰一声,雷风闪电,乌云倒海。一下过,大家人就眙着两头龙缩屏墙里,冲拉出,打個滚,飞飞拉去爻。
用户评论