棕绷床、被头箱、痰盂罐
阿仁
灶头上少了铜吊、钵头、灶间里少了庎橱、碗橱,上海人个房间里又淘汰了啥个物事、啥个家生?三四十年前头,上海小青年结婚要备齐“四十八只脚”,搿个是指大小家生。
上海闲话个家生,意思交关。指家具,指工具,指平常日用个器具。“四十八只脚”是指家具。现在上海人个屋里向,除了大橱、衣橱、五斗橱还有一席之地,书橱、装饰橱、被橱、箱橱已经被越来越多个人简化了。辣装修新居或者旧房子个辰光,搿点“脚”就收进了墙壁里向了,变成了各种各样个壁橱。搿样子一来,生活空间可以大出交关,房间也简洁漂亮了。大床、小床是少勿脱个。棕绷床被淘汰了。最多是屋里向个老长辈还勿习惯睏席梦思床,坚持对老掉了牙个棕绷床修了又修,补了再补。弄堂里“阿有坏个棕绷修?藤绷修?”个吆喝声几近绝音,就可以晓得原来家家人家有个棕绷床快要湮灭了。木板床还有?帆布床还有?折叠床还有?竹榻还有?藤榻还有?上海人向昨天告别,还告别了交交关关个老家生。
家生里个被头箱、樟木箱、皮箱、板箱也难见踪影了。老底仔上海到了冬天要盖两条、三条被头,怕冷个朋友还要覆上一条羊毛毯。现在有了空调了,一条鸭绒被就可以一觉到天亮了。老早为新人结婚办嫁妆,大被头、小被头、丝绵被条要讲八条、十条。现在呢?省省哉。到了热天,各式各样个席子也开始退出了历史舞台。蚊帐也消失了。住到了高楼大厦里,蚊子飞得上来吗?纱窗扇扇消灭了帐子顶顶。再讲一句,上海滩个蚊子是越来越少见了。城市里越来越轧,连蚊子也轧勿进来了。呵呵。
小物事当中,最明显被上海人家扫地出门个是痰盂罐了。当年有身价个上海人屋里向少勿了黄铜痰盂罐。客堂间里摆,厢房间里也放。平常人家用糖瓷痰盂。有高脚个,也有矮脚个。当下要复古一记去买只痰盂罐回来,是蛮棘手个生活。提示一下,可以到老城厢个杂货小店去淘淘看。铜质个是肯定挥发人世间了。有搪瓷个,不过质量差、制作粗糙,摆到房间里向是蛮坍台个。小小囡还会用上痰盂罐?不。小朋友告别了尿不湿之后就直接上了大个抽水马桶哉。讲得有点俗了。怀旧到此打住。
山上那朵莲
掰个背景音乐好