做生活、真生活、吃生活
阿仁
普通话里个“生活”到了上海闲话里意思就多起来哉。上海讲“生活”，可以是指工作职业。“新房客做啥个生活？”“伊是教书先生，好像是教数学个。”“生活”也可以是指活儿。“搿个号头侬勒做点啥个生活？”“勿要太吃力噢，帮几个办公室大搬场！”上海人还把生活分为重生活、轻生活、粗生活、细生活，还有是死生活。死生活是形容干活时个工作勿必去想办法、动脑筋，单调刻板，重复劳动。讲人家去做死生活是有点贬低个味道个。讲自家勒做死生活是有点自嘲个意思个。做生活当中，讨生活多半是指寻找活儿干，寻生活多半是指求职、找寻新个工作岗位。覅小看了上海闲话里个做生活，对勿同辰光、勿同场合、勿同对象来讲一句做生活，表达出来个意思常常是会有微妙个变化个。
老上海人还欢喜讲一句“真生活”。前两天上海地区热浪滚滚、酷暑难熬。“气温窜过40度哉，还要上班下班，还要买菜烧菜，真生活、真生活！”真生活是指辣手个顶级状态。要翻译成外国闲话，最恰当个可以是“我的天！”真生活除了用来感叹个表达，还表示是需要认真对待个事体。“要修好搿只电表是真生活，接错一根线头就要闯穷祸个！”对于艰苦个、辛劳个工作和脏活累活也可以形容为真生活个。“拿搿部十吨头大卡车上个水泥包掮到六层头上去，搿个是一桩真生活！生活做清爽之后大家来领加班费，明朝还放假一天！”对于苦差使，老上海人还会用“生活势劲”来比喻。生活势劲专门来指麻烦、讨厌个生活。“搿点生活势劲叫阿拉老头子来做，啥人吃得消！”生活后面加上劲，变成生活劲甚至生活势劲是表明了做生活个朋友有点光火了。听上海人讲闲话也要听话听音，怠慢勿得。
上海滩上还有一句名言，是吃生活。要打人家了，或者拨人家打了，就是吃生活了。上海人动手打架经常是会通告在先。“侬太勿识相了，请侬吃生活！”一言既出，拳脚才会相随。就是挨了揍、吃了亏个也会用吃生活来解说：“民警同志，伊拉几个吃我个生活，千万要主持公道，拿伊拉关进去！”吃生活讲得最多个地方是弄堂里。“小赤佬还勿死回来，弄顿生活拨侬吃吃！”大人打小囡，是吃生活个标准写照。不过，通常个惯例是喊得响、叫得凶，真正吃生活个情节是会放倒下集去执行个。只要听大人闲话，改正毛病，下一集是勿会轻易公演挨打个。吃生活勒上海基本上只是一句空话，吓吓人个，呵呵。
用户评论