广播专辑 弄堂茄山胡124 便利店 烟纸店

广播214 弄堂茄山胡 便利店 烟纸店
2012-08-29 14:55   来源：新民晚报   作者：食家饭   新民网编辑：王玲
 
　　 (一)

　　 【新民晚报·推荐】半夜写稿，泡一壶乌龙，剥只赤豆粽子当宵夜，发觉屋里呒没绵白糖。

　　 夜里凉丝丝个，香樟树个叶子散发出香味道。走到小区门口头，勿到300米个距离，总共有勿下八家二十四小时便利店，结棍喔，上海就是搿点好，买眼东西是真方便。家常过日脚，肉下锅子，发现黄酒用脱，吃香烟寻勿着自来火，小囡半夜三更想吃冰淇林，侪可以垃拉屋里附近个二十四小时便利店统统买着。

　　 (二)

　　 出上海，老少看到其他城市也有迭能个便利。一趟垃拉南方个省会城市出差，还是个市中心个酒店，周边倒也闹猛，商厦、饭店、发屋、小铺并勿少，但就是寻勿到个便利店。我又是个手边勿备点点心、小食、酸奶、水果之类就勿安心个人。惶惶然走了七八条马路，总算寻到一家面包房，买了两只蛋糕算数。上世纪90年代初去香港，别个还好，实在羡慕马路浪向个“七点十一点”。好像啥侪有。勿管住垃拉啥地方，只要寻到最近个“七点十一点”，就觉着虽然离乡，仍垃屋里个安然。

　　 (三)

　　 其实从前个上海，也是有便利店个，上海人叫烟纸店。多数垃拉是转弯角落、弄堂巷口。一个小得勿能再小个门面，卖点日常零碎物品。我记得小辰光弄堂口的烟纸店，是一个老头独家经营。香烟是可以拆开一支支卖个。弄堂里个邻居，要紧需要一包自来火，一刀草纸，侪可以赊账。阿拉小囡向往个，则是夜到收摊前个清仓处理个断棒冰。四分洋钿一根个棒冰，装垃拉保温桶里，如果断了棒头，就会减价出售，只要三分洋钿一根，有常时老头急了收摊，二分洋钿也是买得到个。迭个对小囡来讲，是极大个优惠搭诱惑。

　　 埃个辰光个上海，有一家名气老响个通宵营业个国营便利店，叫“星火日夜商店”。星火日夜商店就跟伊个名字一样，是当时冷落荒芜个深夜里个一点星光。星火商店勿仅供应日常生活所需，还拨拉凌晨进城个菜农提供休息个场所，冬天介一杯热开水，三伏天是一盆冷水毛巾搭清凉油。商店里甚至常备黄鱼车，商店每个工作人员侪会得骑，居民们只要有急需，侪可以得到帮助。星火日夜商店个进货，真正有市场概念。只要顾客问得多，商店就会尽量补充品种。即使垃拉现在，恐怕也勿是每一家超市商店侪具备个。真个勿得勿佩服上海人超前个商业意识、服务意识。上海垃拉中国乃至全世界能始终保持商界翘楚地位，也就一眼也勿奇怪了。

　　 (四)

　　 小时候，屋里附近个徐汇区中心医院对面就有一家星火日夜商店。我是个体弱个小囡，半夜里常有头疼脑热。爸爸抱我去医院吃药打针完毕，热麻弱小个我吃苦头，总归会带我去星火日夜商店买一两块点心。平时自己拿零花钿买焦香个中元蛋糕，生病了，我就发嗲要一块贵一点个鸡心蛋糕，嫩黄嫩黄个，中间镶了一粒瓜子。鸡仔饼搭桃酥侪忒油，我改拣一块苔条饼，上面交关芝麻。一旁常看见有跟我一样，看完急诊面孔浪挂了眼泪水个小囡，捧一小块糕饼或者一根棒头糖，就垃拉店堂融融安静个灯光里吃起来。对一个受了伤病或者针药恐惧个小朋友来讲，星火日夜商店，大概就是代表安全个乐园。

　　 (五)

　　 便利店也好，烟纸店也好，便利个是生活，抚慰个总是人心。像星星之火，何须燎原，只要垃拉夜空中静静明亮，便有温暖，便勿孤单。

　　 编者语：现在个“便利店”搭从前个“烟纸店”最大个差别，是“便利店”个价钿比一般商店贵【ju】，而“烟纸店”物事个价钿比一般商店便宜，而且有个能拆散卖。