粤读时光 9 ：士兵突击里我喜欢的句子

粤读时光，看见生命中嘅光。

我读高中嗰时，历史老师介绍咗一部电视剧俾我哋班，呢部电视剧叫《士兵突击》，呢部电视剧嘅所有演员都系男嘅，而且佢哋都唔系偶像剧入面嗰啲靓仔， 但系唔知点解我好中意呢部电视剧，我睇咗一次之后就沦陷咗。《士兵突击》我觉得其实一个人嘅奋斗史，可能我泪点低，我睇呢部电视剧嗰时，我感动咗好多次。我中意许三多呢个角色，佢有啲似阿甘，做乜嘢都系好似只牛咁，一直向前冲。我觉得佢呢种精神状态一直都鼓舞住我。

有啲人话王宝强生得唔好睇，其实我觉得佢只系生得普通，就好似千千万万嘅普通人咁样。正因为咁样，我特别中意佢。我觉得佢身上有一种草根奋斗嘅光芒。虽然我都好中意俊男靓女，但系我知道普通先系绝大多数人嘅情况，虽然我都好中意贵公子贵女子，但系我知道草根先系90%嘅人嘅状态。正因为我自己都系呢90%嘅草根之一，所以我好开心自己可以睇到其他草根可以发光发亮，因为我自己都希望有一日都可以成为闪闪发光嘅自己。

下面我同你分享一下我好中意嘅一啲台词。

1. 今日好过琴日，呢个就系希望。

人一般都忍唔住同其他人比较，其实最好的方法系自己同自己比较，只要今日好过琴日，咁就会一日一日变好，肯定有希望成为自己想成为嘅人嘅。 

2. 想要同得到之间，仲有两个字，做到。

呢句话提醒我，想要得到自己想要嘅嘢，就要努力行动。

3. 有容乃大，无欲则刚。容嘅系其他人，欲嘅系自己。 

人要有容人之量，有肚量嘅人通常可以识到更加多嘅朋友，亦都可以学到更多嘢。要学识控制自己的欲望。欲望系一只怪兽，如果你唔识控制佢，佢就会控制住你。

4. 人唔可以过得太舒服，太舒服就会有问题。

我觉得我一直都系一个有危机意识嘅人，尤其系经历咗呢次疫情，我就更加相信人生充满好多变数，人应该保持一定嘅应对危机嘅能力。人过得舒服一啲冇问题，但系唔可以太舒服，因为我唔想成为一只温水入面嘅青蛙。可能我系一只一只脚喺温水，一只脚喺冻水嘅青蛙。 

5. 生活就系问题沓住问题，要抬头挺胸去应对。

每个年龄段嘅人都有自己嘅问题，每个阶层嘅人都有自己嘅问题。如果你嘅生活出现咗问题，唔使担心，因为呢个系生活嘅常态，我哋要做就系唔做缩头乌龟，要面对问题，努力谂办法解决问题。

6. 你宜家混日子，睇住将来日子会混咗你。

呢句话提醒人唔好得过且过，仲有一日，你会后悔莫及。

7. 平常心，平常心。

我好中意吴哲，吴哲嘅背景特别好，但系你喺佢身上睇唔到一啲啲嘅骄傲，反而佢对成败有一种淡泊嘅超然感觉，凡事都会要自己以平常心对待。 以平常心面对生活嘅起起伏伏，其实需要一个人有高嘅觉悟。明白成功系偶然，失败亦都唔系绝境。

8. 唔好对一件冇做过嘅事讲冇意义。

好多人想去做一件事，跟住就会谂呢件事到底会唔会成功，如果成功嘅几率好低，我仲去做，系唔系冇意义。但系好多人忘记咗，成功嘅几率都系自己估算出嚟嘅，你点可以肯定自己知道呢件事发生嘅所有条件呢？你点可以预知未来会唔会出现对呢件事有帮助嘅环境呢？你点知未来会发生乜嘢喔。 所以如果我想做一件事，我宜家就会直接去做，根本唔谂呢件事会做成样，都唔谂呢件事有冇意义。呢种行动思维令我更加有执行力，而唔系只系有想象力。

希望呢啲句子都可以俾到一啲启发你啦。

粤读时光，看见生命中嘅光。