【节气】今日白露！秋季如何保护孩子的皮肤，来听听吧

九月份，阿拉迎来了一只新个节气，伊有得一只邪气浪漫个名字，叫做“白露”。《月令七十二候集解》当中有得记载：“水土湿气凝而为露，秋属金，金色白，白者露之色，而气始寒也”。意思就是讲，白露个“白”是西方个颜色、秋天个颜色，万物侪勒勒迭个辰光慢慢叫个开始谢落、成熟。夜快头，因为气温突然下降而凝结成功个露水，为迭个节气增加了邪气诗意个注脚。

唐代诗人元稹有得一句诗：“露沾蔬草白，天气转青高。”白露个辰光，天高气爽，山川清明，暑热消散而秋凉开始，正好是秋意真正变浓个转折辰光。白露秋风夜，一夜冷一夜，搿句闲话是讲白露之后天气开始风凉了，白天介搭仔夜快头温差变大了。秋风带来了凉爽，连带吹走了空气当中个水分，使得环境变得邪气干燥，搿正好就是白露节气个一大特点，也就是平常道理阿拉所讲个“秋燥”。 

一、白露搭仔护肤

秋燥最容易消耗人个津液，迭个辰光容易出现皮肤干燥、干裂、紧绷，有辰光还会得出现脱屑起皮，嘴唇皮干，口鼻咽干咾啥。小朋友个皮肤邪气薄，搭仔大人比起来，伊拉更加娇嫩敏感，所以啊，勒勒秋天，宝宝个皮肤容易流失水分变得干燥。葛末，秋季应该哪能介保护好宝宝个皮肤呢？

1.有大风个日脚尽量勿要带小朋友出门；万一要出去，也要尽量减少宝宝露勒外头个皮肤。勒勒室内，可以勒房间里向摆一盆清水，来保持房间个湿度搭仔温度；或者，摆一只喷雾式加湿器，也是蛮好个选择。

2.秋天介，小朋友呒没必要邪气频繁个汏浴，因为每趟汏浴，会得汏脱小朋友皮肤浪向个天然油脂，让皮肤反而变得干燥了，搿种天然油脂对于保护搭仔滋润宝宝个皮肤是邪气好个。一般每个礼拜汏2-3趟，每趟控制勒10-15分钟之内，就可以了。汏浴水勿可以忒烫，水温勿要超过42摄氏度，尽量用温水，免得热水让皮肤当中个水分流失。还要用儿童汏浴用个香肥皂或者沐浴露，搿种儿童专用产品邪气温和，一般是中性或者稍微偏酸性，呒没刺激，搿能介又清爽又滋润，同时还可以抑制细菌。

3.秋天介要多搨一眼润肤露，揩面汏浴之后，勒勒小朋友个面孔浪、身浪向侪可以搨一眼适合儿童个润肤露，来保持皮肤滋润，锁牢水分。挑选润肤露个辰光，应该选择勿含酒精、香精香料、防腐剂个，呒没刺激性个，含有天然保湿因子个，可以邪气好个保护皮肤水分平衡个润肤霜。同时还要选择一只小朋友专门用个润唇膏，防止嘴唇皮干裂。因为小朋友个嘴唇皮更加细嫩，所以尽量勿要让宝宝舔嘴巴，否则会得让嘴唇皮个水分蒸发，显得更加干，有辰光还会得出现起皮。

4.小朋友个贴身衣裳应该选择全棉个，衣裳勿要忒紧，也勿要毛拉拉个，勿要毛绒类搭仔化纤成分个。假使宝宝个皮肤忒敏感，买得来个新衣裳，先落水多汏两趟，尽量减少衣裳浪向个残留物。

5.水对皮肤有得保湿个作用，让小朋友多吃水，可以适当个补充宝宝流失个水分，还能够调节水搭仔电解质个平衡，有利于新陈代谢。

二、白露搭仔饮食

白露之后燥气越来越结棍，勒勒饮食浪向要注意润燥滋阴、清润平补，多吃眼清淡、容易消化、维生素丰富个物事，像银耳、百合、莲藕、山芋、花菜、胡萝卜、南瓜、芋艿、芝麻、菱角、大枣、蜂蜜咾啥，生津养胃又养肺。

粥汤类食物搭仔柑橘类个应季水果，侪可以帮助小朋友补充水分、营养皮肤个。白露个辰光，早浪向吃碗粥，像银耳粥、芝麻粥、洋山芋粥、红枣粥咾啥，侪可以治秋凉、防秋燥。

生梨、苹果、葡萄、龙眼、橘子、柚子、柿子，侪是适合秋天介吃个水果。

白露辰光勿要吃辛辣、油炸、烧烤之类个热性食物，至少要少吃伐。搿种物事会得助燥伤阴，加重秋燥。当然咾，有眼滋阴益气、养肺润燥个中药，像沙参、太子参、百合、山药咾啥，用伊拉烧茶吃，对缓解秋燥也有一定个作用。

本期节目由上海发布出品。

编辑：宋博文、顾依依

沪语改写：边秦翌

推荐：丁迪蒙

播音：顾敏