好多人都睇过赵薇嘅电影“画皮”，咁你又知唔知其实呢个古仔系出自聊斋嘅呢？今日我就同你用广东话讲下《画皮》呢个古仔。
喺太原府有个姓王嘅书生，有一日佢收留咗个无家可归嘅女仔。佢老婆觉得个女仔来历不明，想送走佢。个女仔好靓，王书生好冧佢，都系留低咗佢。
过咗几日，佢撞到个道士，道士话嗰个女仔系只恶鬼。佢觉得个道士想厄钱，冇理佢。
翻到屋企，佢发现书房嘅门反锁咗，就去个窗度望吓。望咗一眼，就吓到起晒鸡皮。有只青BB嘅恶鬼，坐喺凳上面，揸住支画笔喺块皮上面画画。画完之后，将块皮披喺身上面，变成咗个女仔。
佢吓到鼻哥窿都冇肉，跑翻去揾道士。道士俾咗个银蝇拂佢，叫佢挂喺门上面，话咁就可以吓走只恶鬼。
佢将个银蝇拂挂喺老婆房门口。半夜有人敲门，佢老婆去睇吓。睇到个女仔嬲爆爆咁整烂咗个蝇拂，跟住飞过黎，用手劏开佢老公个心口，一啖食咗佢老公个心，衫裤同床单都染红咗。佢老婆吓到呆晒。朝早，叫人去揾道士。
道士知道咗之后好嬲，即刻跟去帮手。一见到只恶鬼就一剑就斩咗佢个头，一张画皮就跌咗落嚟，画皮上面仲画住眼耳口鼻。道士打开只红葫芦，将只恶鬼吸咗入去。卷起块画皮准备走人。
佢老婆求道士救翻佢老公。道士话佢无能为力，要去揾城郊嘅癫和尚。仲告诫佢，癫和尚讲嘅嘢，一定要照做。
佢老婆揾到癫和尚，求佢救佢老公，癫和尚又闹又打佢，最后仲要佢食咗佢呕出嚟嘅一旧红色嘅痰。佢都照做。不过跟住就点都揾唔到癫和尚。
佢老婆翻屋企，坐喺老公条尸隔离喊，喊到呕咗一大旧嘢出嚟，都未睇得清系乜嘢，就跌咗落佢老公嘅心口度。原来系个嘅红卜卜嘅心。佢老婆嗱嗱声将王书生嘅心口合翻埋，冇几耐，王书生嘅嘴就红翻，手热翻，第二日，就醒翻，冇几耐，就好翻晒啦。
对我嚟讲，《画皮》其实系一个好感人嘅爱情故事，妻子不顾一切拯救佢嘅老公。
但系当我将呢个古仔讲俾一个外国人嗰时，佢得出咗以下三个结论：
写呢个古仔嘅人应该系个女人，告诫男人揾小三冇好下场；
整容嘅女人嘅真面目好可能系好丑陋嘅；
对自己的老婆好啲，因为最后奋不顾身救你嘅人好可能系你老婆。
唔知道你听咗呢个古仔之后，谂到咗乜嘢呢？如果你有唔同嘅谂法，可以喺下面留言喔。
狐鬼神仙，风月无边，下次再见，拜拜！
在微信搜索“我要学广东话”就可以找到我的微信公众号了，最新的音频都会先在微信更新哦。
唔知疲倦嘅鱼
精彩，想听下个古仔，点该唔更新，举起双手期待。