有声书^

财富自由之路1

2020-01-23 17:10:26 984

声音简介

欢迎关注我的微信公众号“我要学广东话”

我大概两年前买咗李笑来老师嘅课程《通往财富自由之路》，但系同大部人一样，我并冇睇完呢个专栏，我将大部分嘅音频都听完咗，但系我并冇睇冇音频嘅嗰啲文章。

今日我重新睇咗李笑来老师嘅课，我睇到佢好强调只字不差阅读佢嘅栏目，甚至建议读者自己录音，咁样就可以强迫自己只字不差咁样阅读。

我忽然之间有个谂法，我自己都冇只字不差阅读嘅能力，我睇书都成日系跳读，不如听取老师嘅建议，自己将呢啲课文录制成音频，借呢个机会训练自己只字不差阅读嘅能力，顺便都可以为大家提供一啲广东话嘅阅读同听力材料。而且听李笑来老师讲嘅课，真系可以获益良多。

今日我会读李笑来老师栏目嘅第一课《开始前嘅正式邀请：请与我一起生活一年》。

下面系栏目入面嘅内容：

《通往财富自由之路》栏目从今日开始正式更新。而喺呢个之前，我哋已经同一万人一齐密集咁每日更新咗几篇文章啦，呢个系因为我哋希望等到呢个栏目正式开始走入更多人视野嗰时，已经储备好咗一啲内容，毕竟市面上讲自己可以教人财富自由嘅人有好多。于是我同“得到”嘅朋友商量，做咗一件老实到有啲傻嘅事——直接将呢个栏目最基本嘅内容当成储备内容发咗出嚟。

为嘅只系令读者知道我哋嘅切入点：

嗰啲终将走过财富自由里程碑嘅人，佢哋嘅大脑入面运行嘅操作系统就系唔一样。

（一）

前期嘅铺垫对我哋嚟讲都系一种好好嘅互动，等我喺正式开始之前，得到咗一啲你得嘅谂法。其中呼声最高嘅，就系出音频。

今日我啱啱好统一回复一下，呢个栏目入面嘅文章唔会有音频，而且可能系你遇到嘅最需要思考量同执行力嘅专栏——从一开始，就冇人应承你，通往财务自由嘅路系轻松嘅，佢都唔可以系轻松嘅。

呢个仲唔够，我想同你深入讨论一下关于音频呢件事。

好多时候，用户并唔知道自己真正需要嘅系乜嘢。

呢个系普遍现象，有几普遍你睇下有几多人呼唤音频版就知道啦。

喺过去嘅咁多年入面，我最仰仗嘅就系自己嘅学习能力——“需要乜嘢，就可以学识乜嘢”，呢个实在系幸运嘅源泉。我嘅微信公众号叫“学习学习再学习”，我嘅信条系“一生只系有一个职业——学生”。咁多年嘅观察同思考，你知唔知道我认为大多数人学习能力差嘅最根本原因系乜嘢啊？

绝大多数人就系做唔到只字不差咁阅读。

所以，佢哋自己硬系读唔明，甚至竟然喺冇读明白嘅情况下认为自己读明白咗（呢种情况更加恐怖，唔系咩？）；到咗用嗰时，先发现自己唔识，然后竟然“坚决唔去认真只字不差咁读书”，系都要使钱报班，听人哋“解读”......但系问题又嚟啦，佢哋既然做唔到“只字不差咁读书”，佢哋就更加做唔到“只字不差咁听讲”，所以到最后仲系搞唔明——“就咁啦”嘅人生就系咁样产生嘅，你仔细咁谂吓，都仔细观察一下自己同身边嘅人，就会发现呢个问题喺我哋周围普遍到得人惊。

都食咗咁多年嘅亏啦，仲唔自知，成日“速读、跳读、扫读”，仲以为自己几有效率，你话嗰啲人可以唔注定蚀底咩？蚀底唔可怕，可怕嘅系蚀底咗仲以为有着数，呢个系双重负载，仲系可能会引发无数负循环嘅双重负载。

只字不差咁阅读，要有几简单就有几简单，与此同时，要几重要就有几重要。

做唔到嘅人，一世有无数个暗亏。佢哋听人哋讲话会漏咗重点，以至于实际上并冇真正理解对方嘅意图。佢哋嘅表达能力亦都千疮百孔，成日发出咁样嘅慨叹：“我都系咁样谂嘅，点解就唔可以好似你咁讲得咁清楚呢？”——算罢啦你，呢个绝对系幻觉。佢哋根本睇唔出、谂唔到自己同另外一啲人嘅巨大差异，最初只系迷惑：“差喺边度呢？”或者“差别点解咁大嘅？”后来就好嬲：“太唔公平啦！”，甚至开始对成个社会产生怨恨.....最后，全然无解。

你如果咁中意音频版，好简单啊，你自己帮自己录一个咪得咯！我觉得咁样好好，因为咁样你就真正做到咗只字不差咁阅读，唔系咩？唔好听人哋嘅音频版，因为咁样你好蚀底，因为系人哋做到咗只字不差咁阅读，而你就一下唔小心又漏咗啲重点（有啲时候，比重细嘅嘢可能权重好高），又失去咗一个锻炼自己“只字不差咁阅读嘅能力”嘅机会。今次，你多一个心眼啦。

反正，我自己遇到好内容嗰时，系肯定会阅读好多好多次嘅，就算系睇戏，我呢种人都系遇到好嘅戏都一定会反复去睇嘅。《肖申克嘅救赎》（其实应该翻译成《肖申克监狱》），我睇咗几十次，并且，睇嗰时唔单止拉埋窗帘，仲要熄埋电脑闩埋部手机。

不过，我前面讲嘅系“呢个专栏入面嘅正式文章”唔会出音频，但系作为一啲实验性嘅试探，等到恰当嘅时机同形式出现之后，我都唔排除制作音频或者其他媒体形式嘅可能性。

（二）

有位读者喺微博上面留言，请大家琢磨一下，其实好有意思：

我已经喺罗胖得到订购咗，希望可以输出更加好嘅内容，对得起付费嘅用户。

以上系原文复制粘贴，句尾加咗个句号。

事实上，我确实知道我所制作嘅内容可以达到点样嘅水准——冇金刚钻就唔好做瓷器嘅工作，呢个系边个都知道嘅道理。

但系，我需要所有订阅呢个栏目嘅人都必须明白：

阅读本身，几乎冇任何价值；

阅读之后嘅思考，思考之后嘅选择，选择之后嘅行动先有价值；

通往财富自由之路好长好长，话唔定要行一世以上（七年就系一世），所以，净系行动本身都唔够......

只有持续正确嘅行动先有可能有积累效果，先可能引发真正有意义嘅变化；

财富自由只不过系一个里程碑，路过佢之后，你依然有好长好长嘅路要行，否则之前嘅路都冇乜嘢意义......

所以，我肯定会做好我应该做嘅嘢，但系，你都必须要做好你应该做嘅嘢——否则，区区199蚊一年嘅花费，你仲好意思将佢叫做“投资”咩？

亦即系话，呢个栏目从一开始就唔应该系一个作者嘅内容输出，都唔应该系一群读者嘅内容消化；呢个栏目从一开始就系一群人嘅共同成长、共同进化。

亦即系话，你所支付嘅，唔单只系199蚊人民币，仲有更加贵，更加宝贵嘅嘢：

喺未来好多个星期入面你所花费喺阅读、思考、决策、行动上面嘅时间同精力.....

我估，你冇乜可能认为你咁多嘅时间精力唔比199蚊仲唔值钱啩？咪玩啦。

但系实际上，我认真观察咗一下，结论同我估嘅差唔多：

好多人俾钱订阅咗之后唔一定真系会去睇——正如好多人将书买翻屋企其实只不过系放喺书架上面做摆设。我睇到好多付费频道嘅文章嘅打开率都只不过得30%左右.....

以下系好多年我喺好多讲演之前经常讲嘅大实话：

时间就好似系一条射线，佢会穿过你所经历嘅一切......你所撞到嘅人、你所睇到嘅事，你嘅言语，你嘅正确、你嘅错误、你嘅幸福、你嘅苦恼.....唔理你中唔中意，唔理你讨唔讨厌，中意佢又好、憎佢又好，所有嘅一切，一但俾时间穿过咗，就从此凝固，从此唔可以改变.....最重要嘅系，从此佢就会成为你生命入面不可抹去嘅一部分......大家可能冇谂过，都冇清醒咁意识到：喺你听我讲话，喺你理解我讲嘅内容嗰时，都过去咗好多分分秒秒，你我早就已经唔小心成为咗各自生命入面嘅一部分，唔系咩？

读到呢度，你同我都一样，唔小心成为咗各自生命入面嘅一部分。我谂，我哋之中嘅任何人，都冇办法唔重视自己嘅生命。

虽然有啲啰嗦（好多年前做老师留低嘅职业病），但系，我仲系要认真咁提醒你：

你必须要有所行动，你必须要参与入嚟，你必须要做好多好多嘅嘢.....反正净系睇系冇用嘅，甚至，如果你“只不过系耐唔耐睇吓”，咁唔单止冇益，甚至有害——一系你会因为自欺欺人而耽误自己，一系你会因为唔小心睇到人哋嘅进步而产生极度嘅焦虑，尤其系当你意识到嗰啲进步自己原本都有可能有嘅情况下——千万唔好等自己沦落到嗰个地步。

（三）

宜家你知道咗，《通往财务自由之路》肯定唔系一个俾咗钱订阅就得嘅栏目。唔止要即刻认真阅读，搞唔好仲可能要阅读好多次，甚至，每隔一段时间仲要重新罗出嚟思考。呢个仲未完.....

呢个栏目嘅更新频率系每个星期一次主更新，大体嘅规划如下：

周日会有个简短嘅预告，通知大家下周嘅主要话题。例如，下周嘅主要话题（都系呢个栏目嘅第一个话题）系：

“你所拥有嘅最宝贵嘅财富系乜嘢啊？”

有时候，佢甚至可能简短到只有一个题目。唔好似今日咁样系成篇文章。但系你要谂吓，你要回答.....麻烦就麻烦一啲，尽量要喺后台留言。

然后，我哋将会开启围绕呢个主题嘅一周之旅——

星期一，我哋会发布一个初版（亦即系最终仲会更新嘅版本），大家睇咗之后，要俾反馈，有时候文章入面直接就有一啲“必答问题”，冇嗰时你亦都最好写读后感之后提交。甚至，你可以提交你自己嘅亲身嘅经历，或者你观察到嘅现象，或者你手机到嘅经典例子，等更加多嘅人睇到更加令人信服嘅论证：

星期二，我哋会整理一个读者反馈，发布出嚟；

星期三星期四两日，我哋会有相应嘅问答文章发布；

星期五，我哋会发布一个“更新版”，某种意义上系一个“众创版本”，好多人参与过嘅版本。可以想象，有时候，呢个版本可能同最初嘅版本大相径庭，亦都可能冇乜变化......

星期六，我哋会公布本周获奖嘅名单。系，参与嘅人系有奖励嘅，虽然可能唔系好大，但系一定会有奖励，唔系嘅话就唔好玩啦。