《蓝了染上纸》
作者：周耀辉（香港）
改编、朗读：麦小姐
[上海话改编]
今朝麦小姐想脱大家分享个，是一篇关于母亲个文章，确切个讲，是一篇写拨已故母亲个纪念文章，题目叫做《蓝了染上纸》，选自散文书《纸上染了蓝》，作者是香港著名填词人周耀辉。搿本书里向收录个，侪是作者关于伊姆妈个点滴回忆，勿过分煽情，却非常真挚。
到底是我成就了文字，还是文字成就了我。
有趟接受采访个辰光，我用搿能个思路向记者回顾了介许多年以来我帮文字个关系。讲到底勿是真个要问问题，而是感叹，感叹关系个纠结，感叹各种关系个纠结。
就好像现在。
编辑辣年底发来邮件，标题是----“字花最后一期稿”，搿能写，意思已经老清爽了。辣之前个两年里向，每隔两个号头，我会发一篇关于我姆妈个文章，搿篇，是最后一篇了。
我电脑里有一只叫“A long long farewell”个文件夹，辣我还呒没决定要做搿个专栏以前，我拿我写辣纸头浪向个字（搿张纸头勿当心染着了点蓝颜色），包括后来我再想起来个、写下来个关于我姆妈个事体，统统摆了进去。
从来呒没真正个告别，只有永远个离开。
所以，当初开始个辰光，我脱《字花》讲好，两年，写十二期。其实我倒呒没认真算过，就是大概觉着，嗯，搿能应该差勿多了。反正也呒没真正个告别。
开始个辰光，就晓得会结束。不过言话翻过来讲，哪怕侬一早晓得是要结束个，但仍旧有勿少讲勿出个再会。我想过好几种结束搿只专栏个方法，最后，我以为自家会用一首词。横竖写词是我比较拿手个，甚至有得几句都已经想好了----
为了我生气个辰光骂侬贪财
为了侬失望个辰光讲情愿呒没生过我
为了一切我呒没告诉侬侬也呒没告诉我个
……
为了我长大之后侬坚持买拨我个蓝棉袄
为了侬抑郁个辰光我坚持侬要吃个饭菜
为了一切我送过侬侬送过我个
……
开始个辰光，就晓得会结束。结束个辰光，总想到开始。就辣我以为自家会用搿首词来做最后一篇个辰光，我又拿文件夹里个文章看了一遍，重头看起，一篇接一篇。然后，搿些我写过个文字，既静，也动，像风吹灰尘一样，将埃些“为了”、“为了”、“为了”，全部吹散，也吹净了。
文字成就了我起码三桩本来呒没打算要做个事体。
第一桩事体。一篇一篇看下去，我发现原来我还欠我爸爸一通电话。“欠”！其实我勿大愿意也勿是板要用到搿个字，但，勿管我认为伊欠我、欠阿拉孤母姐弟多少，始终，当时我跟我阿姐打电话告诉伊姆妈跑脱搿桩事体，最后也答应了伊，等丧事办好，会再打只电话拨伊个。
四年了，搿通电话一直屏辣盖呒没打。我跟我阿姐有常时讲起，侪觉着，应该是要打一只了。但，啥人也呒没动。是勿够勇气[口伐]？是胆子小[口伐]？是常怕会动气[口伐]？还是勿想再起牵起搿根一生一世个神经呢？总之，阿拉日脚照样过，对应该做个事体视而勿见，其实一眼也勿难。
由此，我更加能够体谅我姆妈为啥几十年来可以搿能接受伊个丈夫。
可以四年，勿难四十年。
但我仍旧觉着，应该是要打只拨伊个。乃末，我翻开电话本，也是蓝颜色个，里向有好几页磨得快要落下来了。我辣C个部分寻着了我爸爸多伦多个电话号头。噢~有时差，埃头天还呒没亮，我又拿听筒摆了下来。反反复复了几趟，搿只电话，我还是呒没打出去。
想来想去，干脆写封信[口伐]。信也是老短个：“爸，抱歉，到今朝再写信拨侬，姆妈个丧事办得蛮顺利……”我又加了一句言话：“假使我爸爸周荣柏先生已经过世，麻烦通知阿拉，我是伊个儿子。”
上趟写信拨我爸爸，已经是廿几年前头个事体了。埃歇辰光我预备离开香港到荷兰去，一时无助又横生勇气，我写信告诉了伊。信里向还讲到，我已经三十岁了，是成年男人了，我勿想再为了老早个是非而纠结，希望从今以后可以跟伊像两个男人搿能重新认得重新交往，我只想收藏关于伊个、好个记忆。
伊回信来，讲，勿想再记得了。
葛末搿趟，伊会讲点啥呢？又或者，伊还会得回信[口伐]？
第二桩事体。搿个系列，原来最早我是辣海边写个，是香港岛南面个赤柱。我老希望最后一篇也辣海边写，就当是一种完满。但我现在辣阿姆斯特丹，离赤柱忒远了。葛末，就去北海个小岛[口伐]。我辣埃搭过过好几趟生日了。
冷天色个海岛，呒没多少游客，风倒是交关大。辣沙滩浪向走了一歇，就到边头个小饭店里向去吃传统个荷兰菜了，有豌豆，还有杂菜浓汤。我最欢喜个是当中一片片个香肠。辣汤里向撩香肠，赛过觅宝一样。搿爿小饭店还会搭拨侬几片黑黜黜实结结个全麦面包脱生烟肉，用来送汤。
听说讲，现在越来越少个人会辣屋里自家烧豌豆汤了，要吃末，到饭店里去吃。我想起我刚刚来荷兰个辰光，吃过一趟，是朋友拉姆妈烧个。因为搿只汤，让我想到了我姆妈也是常庄担心我辣荷兰缺少汤水。
对个，是汤水，勿是汤，毕竟阿拉从小辣屋里向吃个汤，勿是浓个厚笃笃个，而是像水一样薄溚溚个，搿碗汤，可能就是广东人个血了。自从姆妈走了以后，我再也吃勿着伊烧个青红萝卜汤、冬瓜盅、白木耳煲猪舌头、炒粒粒、节瓜粉丝还有虾米鱿鱼蒸肉饼了。
我记得辣我准备离开香港个辰光，大概也估计到了自家会想念屋里个家常味道。乃末请伊帮我拿菜谱写下来。姆妈讲，搿哪能写法子呀，摆点啥，摆多少，烧几化辰光，侪是熟能生巧个生活。
假使我埃歇肯用点心蹲辣伊边头好好叫看伊哪能烧菜，边看边记，或许我就会自家照样子烧了，勿至于像现在搿能，介思念姆妈个味道。
还好，思念里虽然有苦涩，也有甜酸脱麻辣。
我姆妈教过我一句言话，伊讲，勿但十指连心，舌头浪向个痛，也是钻心个。
离开了小饭店，我走回到沙滩浪向，逆风而行。我拿自家三年前辣赤柱海边写个几张笔记拿了出来，纸头拨风吹得七歪八牵，只要稍一松手，就飞脱了。只要侬舍得松手。
我又哪能会舍得呢？紧紧个捏辣手里，努力想看清爽高头个字。有一些，我已经陆陆续续用到文章里去了，还有一些，勿晓得几时会用着。
看发看发，我发觉搿张拨我埃条新个牛仔裤染着蓝颜色个纸头，居然蓝得又深了一点。
正辣辣我以为是思念加深了纸头颜色个辰光，一抬头，看看北海，再看看与海水相连个天，满眼个蓝，灰蓝，勿带阳光个，化进一天一水里向，又染到了我个纸头浪向。
我笑笑，拿笔记囥回了袋袋里。
最后一桩事体。还有四百个字，还有四分钟，还有四秒钟。两年来，每隔两个号头，每篇两千五百个字，我安安静静个坐下来，安安静静个写。到底是我辣写我姆妈呢？还是姆妈把牢我个手辣辣写搿些呢？就像小个辰光伊教我写字一样。至少，我是搿能感觉个，感觉伊并呒没离开。
每隔两个号头，就有搿能一两天，文字辣冥冥之中成了秘密个通行证，拿伊召回来。然后，文章写好了，稿子发出去了，伊也就走了。
每隔两个号头，我脱我姆妈聚一趟，又散一趟。两年，十二个来回。A long long farewell。只有离开是永远个。勿去细算，辰光过了快，倒也教人珍惜。有好几次，稿子发脱，我发现自家居然流下了眼泪。
当初，我决定写我姆妈，是为了证明伊个大半辈子呒没白活。
文章写到了尾声，但好像还有交关呒没完成。或许如我所写个，搿能个事体是谈勿上完成勿完成个。不过，我的确有个打算，希望搿些字可以整理成书，书里向还要有伊辣阿姆斯特丹公园野餐吃鸡翅膀辰光拍个照片、丈夫快要离开于是一家门去照相馆拍个照片、伊着了男装脱兄弟姐妹们拍个照片……等等等等，伊个印下来样子。
然后，辣一个诗意朦胧、情绪潮湿个下半天，我拿搿本书带到安葬我姆妈个宾霞洞，烧脱。
然后，我就可以讲搿句我一直想讲讲勿出个言话了：姆妈，来收物事啦。
用户评论