广播专辑 弄堂茄山胡86 辣山里看滑稽
2013-09-16 13:23来源：新民晚报 新民网编辑：田诗雍 作者：王胜中
大约辣1980年辰光，阿拉还辣辣“山里”（安徽小三线）。一日天，厂里通知讲上海人民滑稽剧团要来厂里慰问演出了。山里娱乐活动本来就少，电视也收勿到，收到也是雪花。一听讲滑稽剧团来演出，大家侪老开心个。再讲，我从小就是听无线电里“说说唱唱”节目长大个，所以特别起劲。等到演出搿日，我老早就到厂里食堂里抢位子，抢了前几排个靠台边头个座位。隔壁厂个人也侪赶了过来，礼堂里轧得“塔塔潽”。
迭天节目蛮多，我现在有印象个有三只。一只是俞荣康、毛猛达个独脚戏《草帽歌》。伊拉两个人立辣台浪，人长大，卖相好、唱得好，说得好，轰动全场。还有一只是沈荣海、林锡彪个独脚戏，叫啥名字记勿得了，只记得邪气精彩，笑痛肚皮。林锡彪伊日演出戴一顶西瓜皮个鸭舌帽，面孔也是圆个，真讨人欢喜。还有，好
像是压末一只节目了，人有好几个，主角是徐磊和陶德兴。印象深有两个原因：一是介绍伊拉迭只节目辣全国啥个会演当中得奖了，好像是三等奖，伊拉两家头算小青年个。再有女滑稽忒少，搿日仔好像呒没啥女演员个，只有一个徐磊，记得特别牢。
后来回到上海了。咖吧个阿德哥、奶茶铺个阿美天天看到。不过，是辣电视里看到个，就迭能看电视，也觉着特别亲切。阿德哥更加神气了，阿美胖点了，就是陶德兴出来老少了。难板电视里看到伊，不过人也好像胖交关。沈荣海、林锡彪是出来更加少了。有辰光辣瞎想：阿德哥天天上电视，名气响得刮辣辣，钞票赚得木老老。伊拉几个人电视勿上，勿晓得辣演出个伐？日脚哪能过个？阿拉老婆就讲要侬瞎担心做啥。
搿个辰光，伊拉肯定到整个上海后方基地个厂里侪去慰问演出个，厂侪辣山里，真蛮辛苦个，真要谢谢伊拉来演出！伲厂辣辣安徽旌德县德山里，有好几个“德”字，看来跟阿德哥真有缘，勿晓得阿德哥咾啥还记得三十几年前搿一场演出伐
用户评论