广播专辑 弄堂茄山胡85 七分卖唱梨膏糖

广播专辑 弄堂茄山胡85 七分卖唱梨膏糖

2013-09-23 0933来源：新民晚报          新民网编辑：田诗雍    作者：颜志忠
 
　　一日子有空，白相城隍庙，垃九曲桥南面个一只转角浪向，看到一爿专门卖梨膏糖个小店铺。靠十个平方，前店后坊，现做现卖。圆门柱浪刻一副楹联：“城隍庙今古胜迹，梨膏糖中外闻名”。联，工整；字，挺括。招牌“德甡堂”，黑底金字，古色古香。“德甡堂”垃清朝光绪年间就已经有了，算得上的的刮刮个中华老字号了。门口头一块牌子介绍讲，搿爿店铺是按照埃个辰光个原式原样布置个。
　　老早仔老城隍庙梨膏糖店侪是前店后坊式个，制糖师傅一面现场当众制作，一面高声说唱推销。搿个说唱里向蛮有讲究个，唱出熬各样梨膏糖配用个草药搭仔功效。唱腔独特，邪气好听，老吸引人个。“一包冰糖吊梨膏，两用药味重香料，山楂麦芽能消食，四君子防小囡痨，五制玫瑰加桂花，六放人参三七草……”来来去去个游客老远就盯牢声音围拢来，走进店铺听脱一息，侪要摸脱两钿，店里生意哪能勿兴隆？告咾有“三分卖糖，七分卖唱”个讲法。
　　记得我读初中个辰光，下半日放学路过董家渡，常庄看到卖梨膏糖个。是一胖一瘦两个搭档，场子当中一只木头小箱子，盖头翻开来，高头摆梨膏糖。两家头会得讲好几种方言，说说唱唱讲滑稽。手里个一副铴锣真派用场，又是乐器又是道具。场子里有啥人讲闲话，辣陌生头一记响锣吓伊进去。有人要买梨膏糖，就一手翻转铴锣收钞票，一手从木箱里拿出糖递过去，表演照样连下去勿会断脱。每日天总归要用苏北方言唱一只歌，曲调是固定个，简单来兮，翻过去倒过来就是两个乐句。
　　记得有搿能几句：“小姑娘吃了我的梨膏糖，面如桃花红堂堂；小伙子吃了我的梨膏糖，栗子肌肉块块壮；裁缝师傅不吃我的梨膏糖，领头装垃裤腰上；皮匠师傅不吃我的梨膏糖，钻子钻到大膀上……”每句后头侪要加一个“呜啊呜哩哐，要吃梨膏糖”个过门。
　　老城隍庙搿爿梨膏糖店，有一股古朴气息。转角个红木柜台浪向，廿几只黑漆竹篾盘子摆满各式各样个梨膏糖。梨膏糖分疗效搭仔花色两种。疗效梨膏糖好当药用，可以止咳平喘、生津开胃，用杏仁、桔梗、茯苓、半夏、川贝、山楂、橘红等中草药搭仔白砂糖一道熬成。花色梨膏糖用个是薄荷、松子、胡桃、虾米、姜汁、肉松等材料。店铺里，两个女青年身穿斜襟衫，头顶三角巾，一身蓝印花布，打扮得像村姑，一面熬，一面卖，忙里忙外，生意蛮好。梨膏糖是上海个传统特产，天南海北个游客到仔城隍庙，总归要带眼转去送送亲眷朋友。各只品种价钿侪是一样个，搿样拿眼伊样拿点，摆拉一道称，样样味道侪好吃到。
　　长远勿看见梨膏糖哉，今朝进店堂看看，弄两块吃吃，蛮开心。不过垃拉走出店堂个辰光，又觉着勿大扎劲。心里想，两个“村姑”假使像老早仔师傅一样，一面卖糖一面唱两声就好了。搿能介想法想法，自己也随口唱仔起来：读书小囡吃块火腿梨膏糖，臂膊粗来脚膀壮；后生情侣吃块玫瑰梨膏糖，甜甜蜜蜜进洞房；中年夫妻吃块百合梨膏糖，相亲相爱度时光；阿爷阿婆吃块人参梨膏糖，延年益寿保健康；伤风咳嗽吃块止咳梨膏糖，喉咙适意气勿吭；旅游晕车吃块薄荷梨膏糖，开开心心看风光；心情郁闷吃块姜汁梨膏糖，浑身有劲精神爽；胃口勿好吃块山楂梨膏糖，明朝就想吃蹄髈……呜啊呜哩哐，要吃梨膏糖。