一记头、一枪头、一窜头
阿仁
“一”勒辣上海闲话当中可以算是一个大好佬了。上海人攀谈讲张有交交关关个“一”。就讲眼门前个事体：“新年过得瞎快，一记头就过去哉！”一记头，一下子。一记头还有另外个一层意思是仅仅只有一次。“我搭皮包公司做生意，只做一记头，吃亏只吃一记头。”一下子还有个讲法是一来兴。“搿块排门板一来兴就倒下来了！吓煞人！”差大勿多意思个上海闲话还有：一转头、一来头、一趟头、一汆头、一枪头、一窜头、一哄头、一刹眼……真可谓是叫侬一记头讲勿清爽。
一转头可以表达出各种状况。有一会儿个意思：“宝宝刚刚还勒小弄堂里白相个，一转头就寻勿着了，大概跑到人家天井里去了。”有只有一次个意思：“外婆到小菜场就一转头，今朝明朝个小菜侪统统拎回来了。”有出门兜一圈个意思：“等等侬还勿回来，伊去小区里一转头寻寻侬。”一来头，只做了一次，只干了一趟。“新买来个积木，几个小囡一来头就呒没白相心思了。掼脱真是有点啥勿得。”一趟头，也是仅仅一次个意思。“唉，上当只上一趟头。下一趟想骗我？我就算是戆大一只！”一汆头，烧小菜只勒锅子里一滚就捞出来。一枪头，还是一下子或者一次性个意思。“搿点生活，小张做起来是一枪头就收摊，比老张手脚快多了！”“申花队要拿冠军，就看搿场球，只有一枪头个机会了。”一窜头，是形容速度了。“刘翔一窜头就跑到前头了，实实叫是快！”“小外甥一年勿见，一窜头就长到我胸口了，将来要比伊拉个阿哥还要长大！”一哄头，即是一哄而上、一哄而起。一刹眼等同于一眨眼。转眼之间。“明明是爱司，一刹眼变成功老K了，手脚瞎快！”
还可以举出勿勿少少个“一”，一口气是讲大勿光个。讲一个人，是一介头，是一干子。“叫我一介头去农家乐，亏得侬讲得出，勿要厌气煞脱啊！”讲人多，是一并排，是一排生，是一世界。讲光火生气，是一包气。讲学问本事，是一肚皮。讲家庭人家，是一家门。讲模样相同，是一样生。讲一式一样、一模一样，是一路式。讲意气相投，是一路货，是一票货色。讲言听计从、服服帖帖，则一帖药。讲察言观色，是一面孔。“老板娘一面孔勿适意，看来搿个号头个奖金是要敲脱了。”更加结棍个是一脚去。“老板回来，恐怕要炒我鱿鱼了。一脚去哉！”一脚去，完了。一脚去还表示全部。“还有十几只毛蟹，一脚去，价钿便宜点拨侬。”一脚去，死了。“车子开得介快，当心闯穷祸一脚去！”“一”还讲勿光。下一篇继续。
用户评论