广播专辑 弄堂茄山胡126 集邮迭桩事体

广播216 弄堂茄山胡 集邮迭桩事体

2012-08-15 14:32   来源：新民晚报   作者：蒋宗孚   新民网编辑：王玲


　　 【新民晚报·推荐】上世纪50年代末，垃拉读小学高年级个辰光，我对集邮开始萌发兴趣。

　　 迭个辰光，大家不行【hhan，不流行】集新票，崇尚集信销票。假使侬集齐十八张一套特-13“努力完成第一个五年计划”个信销票，品相要好，邮友侪会刮目相看。所以，一要常搭邮友交换，二可到集邮店买邮票。为省车钿，我常常凭自家两只脚量地皮。集邮公司门市部有“袋票”买，5分洋钿一袋，每袋约10张信销票，运道好个辰光难板也会混有盖销票。因为袋票是“打闷包”出售个，事先勿晓得有啥个邮票，有辰光额角头碰着天花板【运气非常好】，正好有自家缺票，会情勿自禁高兴得跳起来。

　　 我常庄【经常】去两家私营集邮商店，一家叫伟民集邮社，另一家叫华外集邮社。伟民集邮社，垃拉淮海路益民百货公司旁边，一条有过街楼个弄堂里。弄堂口挂了两只长镜框，里向过街楼个墙壁浪也挂有两只长镜框，黑卡纸衬底，贴交关中外邮票，广告宣传效果蛮好。门面勿大，是灶披间改个，墙浪向挂了交关邮票个镜框，柜台浪堆放一叠邮册。老板叫包伟民，白面书生样，耳朵稍微有点聋，但老热情个，噱头也老好，侬有啥要求，伊会想方设法尽量满足侬。所以，勿少邮友尤其中小学生欢喜到伊迭搭【他那儿】去。再讲华外集邮社，垃拉南昌路思南路口，沿马路一开间门面个邮社，明亮透光。一张大玻璃柜台放置了各国邮票，记得上格柜面用插票平放雕刻版制作个精良外国邮票，蛮有气派。店主谈贵生，方脸大耳，胖胖个身材，嘴唇常含一支呒没点燃个雪茄烟，大家叫伊老板，因为伊的的刮刮【确确实实、实实在在】一副老板派头。听到“老板”喊声，伊笑眯眯像庙里个弥陀佛一样。集邮社出售各种中外邮票，勿像南京东路国营集邮公司门市部，只售中国、东欧社会主义国家邮票。

　　 我拥有第一套新票个过程最难忘记。1962年8月8日，为纪念梅兰芳逝世周年，缅怀一代京剧表演艺术大师舞台艺术成就，国家邮政部发行纪念邮票。邮票图案精美绝伦，分别展示梅先生个正面半身生活照搭仔七幅梅先生主演个著名京剧艺术造型个经典剧照。父亲钦佩梅先生，告诉我梅先生是带中国京剧走向世界第一人，远渡重洋巡演轰动美国，获名誉戏剧博士称号；先生名列京剧四大名旦之首，人说“万人空巷看梅郎”。我老想拥有梅先生个邮票：全套八张，面值1.52元。但是时逢三年国家困难时期，一家人家小菜铜钿不过几角洋钿，我思前想后好几天，总归勿好意思向长辈开口要。一天实在摒勿牢【忍不住】了，我耳朵根发烫，趁黄昏头【傍晚】电灯呒没亮个辰光，朝下班回来坐定当个父亲轻声轻气开口，真呒没想到父亲微笑答应。我面孔涨红个窘态即刻舒缓，父爱温馨，铭记心里。终于，我可以打开自家邮册凝神欣赏浓缩垃拉小小邮票浪向个经典艺术形象——穆桂英、梁红玉、虞姬、杜丽娘等人物侪栩栩如生。直到现在，每趟观赏方寸之间梅先生艺术形象，油然想起我当年搿套邮票真来之勿易。现在搿套梅兰芳邮票已经涨到二千多元一套了。

　　 本文沪语精选

　　 不行、额角头碰着天花板、常庄、伊迭搭、的的刮刮、摒勿牢