#原創文#乘風涼（上海話）

今朝來講講乘風涼。我從有記憶開始，到初中預備班，儕住垃虹口區個昆山路，靠近吳淞路浪。旁邊頭是我個小學，昆山路小學，再過去眼有一座基督教個教堂——景林堂，小學個垃末兩年我還勒垃迭隻教堂裡向上過課唻。八 九十年代辰光，因為生活條件嘮啥多種原因，大熱天吃好仔夜飯，大家就儕出來乘風涼了。阿拉乘風涼，要末就是擔檯子咾、躺椅咾掇到樓底個上街沿浪或者馬路邊浪向，坐下來一邊搖扇子，一邊鄰舍之間就好談談山海經了。假使啥人家今朝大方一記捧隻西瓜出來嚜，葛末左右隔壁人家就儕有口福了。要去遠眼地方乘風涼嚜，就要沿牢仔吳淞路一直朝南走，過脫三角地菜場再走眼路，儂就好看到外白渡橋，葛末外灘就要到快了。勒垃外灘乘風涼，覅忒寫意噢！吹吹江風，講講故事，哀個辰光對岸個東方明珠還嘸沒造起來唻！何裡搭像現在介現代化啊？當然也有人弗走吳淞路個，沿牢仔昆山路朝反方向走，一直走到昆山路頭就是四川北路了，葛末又好shopping又好蕩馬路，儕隨便儂咯！好了今朝就講到此地，謝謝各位個收聽，阿拉下趟會。