乡土·吴语

不会本地语，阿算本地人？（吴语·嘉定话  原文+音频）

（为此著输入国际音标不便当，外加发布辰光可能出现显示问题，本文表示北京言话吤读音只有能用北京言话拼音，表示嘉定言话吤读音只有能用嘉定言话拼音，臵嘞相同吤字母表示吤音位不同，譬如同样拼写为liu，北京言话拼音方案撘嘉定言话拼音方案表示吤韵母不同。绽外，交关北方言话不用或者不大用吤汉字用逍遥笔打出来之后呒能发布到土豆网，臵嘞只有能用部件拼装吤方法表示，有兴趣可以到东方语言学网下载大字符集逍遥笔打出来之后垃汉典网查询，汉典网可以显示所有汉字。）

随著世界越来越开放，地区间人口流动越来越频繁，本地人、外地人吤身份意识空前强烈。但与此同时，为著各个区域吤本地言话也陡然退化，本地人撘外地人吤界线实际上已经越来越模糊啧。乃么有个问题就此产生：不会本地语，阿算本地人嗫？

常庄听见有人怨：“哪恁全是吤外地人？！全是吤外地人！”确实，一排经济发达地区会吸引交关外来人口流入。必须要肯定，外地人对本地区发展作出著交关贡献，特别有交关本地人不肯做但又需要甚至依赖吤行当全邋靠外来建设者承担垃塱。但是，当外地人过多吤辰光，本地人会有一种明显吤感觉，就是家乡不像家乡。本地吤文化，特别是语言，会受到压缩。本来一口浓浓吤乡音可以塱故土畅通无阻吤，现在一歇儿一个听不懂，一歇儿一个听不懂，原来全是外地人，从心理上讲肯定是会有眼不适意吤。就像若然到中国吤外国人多到我伲已经呒能尽情吤垃塱中国讲中国言话啧，嗰佷心里会哪恁想嗫？除脱著经济，人毕竟还有文化归属吤需要。再加上流动人口过多客观上也会导致资源、交通、治安嘞铤一系列问题，也确实加剧著本地人吤昰种身份意识。

乃么话起身份，佷主要靠啥个去辨别嗫？拆穿著讲，还不是语言？交关人常庄话到何上去碰着吤全是外地人，侺哪恁判断吤呐？问佢何上来吤嗫还是看佢户口簿？还不是听佢讲言话吤！跑来跑去听见人家不讲本地言话吤么就是外地人咾——就算人家拿着著本地户口。听见人家讲本地言话吤么自然就是本地人咾——哪怕佢因为某种原因户口也迁著出去啧。若假儿呒不相貌上吤显著差别，嗰么区别人群吤标志性特征自然非语言莫属。

乃么问题又来啧。侺哪恁晓得【弍两】个不讲本地言话吤就一定是外地人呐？讲不定人家就是不讲本地言话吤本地人嘞！侺为啥就寔恁武断法子嗫？不过反转来也证明啧，人群吤文化认同主要靠吤就是语言，人家不讲本地言话，佷就朆拿人家当本地人看喂！但问题又来啧，现在交关“三代本地，根正苗红”吤本地囡本地言话已经讲不大来甚至彻底不会话啧。佷若是认得吤，熟悉吤，甚至知根知底吤，嗰场时还会撘佢作个证明：“嚎，昰个阿啥【土耷】吤囡呀，撘我俦一宅上吤！”但佷话晓得佢底细吤人多嗫还是不熟悉佢吤人多？佢塱本地寔恁大吤范围里，几十万、几百万人口里啥人晓得佢？佢撘一个塱本地长大吤外地囡有啥不一样嗫？若干年后垃某一条街上乡还不是畀不明真相吤路人当成功外地人？

回想我老早塱外头读书吤辰光，有场时会碰着同样是嘉定出来吤学生子，有吤是正正式式吤嘉定本地人，有吤是从小跟爷娘从外地来嘉定定居吤。照佷讲起来嗰正式吤嘉定本地人足贯亲一眼吤咾！但问题不是寔恁吤，蛮多嘉定本地同学根本就不讲嘉定言话，只讲“北京言话”，撘号称外地搬来吤同学垃表现形式上完全呒啥两样——全对嘉定么熟悉吤，但嘉定言话么不讲吤。佷话亲切，嗰至多就是大家全嘉定出来吤，对嘉定昰个地方有点熟悉咾，从语言上根本就呒啥亲切可言——老乡见老乡，不用乡音，竟然还要用外地言话沟通！从昰方面还不及【弍两】个肯撘我俦用崇明言话、松江言话、上海市区言话嘞啥沟通吤同学，毕竟大家全是用本地言话交流吤，即使不熟悉对方吤区县、乡镇，但有能互相通话吤本地言话无时不刻不塱传达一个共同吤信息——我伲全是一块荡人。

但朝下去，本地言话作兴真吤要听不着啧。现在所谓吤真正意义上吤本地人歇【弍两】日极有可能不复存在。现在街路上碰着吤伊排“北京言话”内透内透吤小青年，侺阿敢话佢就是外地人？跑到学堂里去，【弍两】吤全只会用“北京言话”交流吤学生子，侺话话看何里个么是本地囡，何里个么是外地囡？而昰种现象，倒常常还是伊排一日到夜垃塱嚼“本地人嘞外地人”吤大人造成吤。有交关人，一方面对外地人是恨尽毒绝，常埭埭邋怨嘞骂“哪恁全是吤外地人？！全是吤外地人！”一方面竟然不许自家吤囡庶讲本地言话，嗰寔恁一来，侺吤囡庶歇【弍两】日不就是伊排畀佷自家骂吤“外地人”啧？跑到外头啥人会来查佢吤出身？就像佷骂人家外地人吤辰光阿去查人家吤出身？侺哪恁晓得畀佷骂着吤【弍两】个“外地人”就不是像尔【土耷】（疑为tah畀n同化成nah）吤囡一样只是不讲本地言话吤本地人嗫？！

臵嘞，若然佷还垃塱用语言去甄别本地人嘞外地人，说明佷骨子里是认同“语言是人群标志性特征”吤，嗰么佷若是望著自家吤囡庶歇【弍两】日还是畀人家当本地人看吤，就应该行佢学会本地人吤标志性特征——本地言话。若假佷认为不会本地言话也是本地人吤，嗰就也完全呒不必要去甄别本地人嘞外地人啧，所有垃塱本地生活、工作吤人全应该一视同仁吤看成功本地人。

疁·浏河长江

2015-2-1       礼拜日

甲午年  腊月十三