最长个夜,搭至亲一淘畅饮
勒海苏州,“冬至大如年”。
对大多数人来讲,冬至是一个节气;但不过对苏州人来讲,冬至是一个节,地位要比春节还要高点。周遵道个《豹隐纪谈》里就用“肥冬瘦年”该个词来形容苏州人过冬至,比过年还要丰厚隆重。
为啥勒苏州,冬至会得有实梗个地位呢?该个可以望前头追溯到吴地个发源辰光——
相传勒海商周时期,周太王有三个儿子,大儿子泰伯、老二仲雍为仔顺从爷个心意让贤拨三弟季历,一淘跑到仔当时辰光个荆楚蛮荒之地,断发纹身,自号勾吴。孔夫子也赞泰伯让贤“可谓至德”。
勾吴,就是当时辰光个江南地区。泰伯奔吴带得来仔文明个起源,也带得来仔周代个历法。周历拿十二地支搭十二个号头相配,冬至个月份就称为“建子之月”,作为一年个开端。搿勒,冬至就是周历新年。
苏州人过冬至之“大”,勒海祭祀先祖个庄严肃穆,勒海至亲团聚个天伦之乐,也勒海桂花冬酿围炉暖锅个丰盛家宴。
勒海苏州,冬至是过节个日脚。
《苏州府志》有云:“‘冬至’前一日曰‘至夕’,祭祀,虽暖必炽碳,各以食物相馈。”至夕,就是冬至夜。赛过大年夜庆祝春节一样,苏州人过冬至,总归是勒过冬至夜个。但不过冬至过节,倒弗板定勒海冬至夜。
老法头,家族祭祀是一家门个大事体,礼节也往往庄重繁复。
到仔现代,作为一个从小生活勒苏州个本地人,我每年经历个“过节”,倒侪是充满烟火气个寻常生活。每趟过节总归要忙脱一日天,搿勒伲一径勒离冬至最近个周末过节。
过节前,要确定个就是祭祖的菜品,也要端正好香烛锡箔等祭拜用品,到仔正日,还要老早去菜市场买好鲜鲜菜,再顺带便勒卤菜店称点卤菜。过节菜朆祭完是不好碰个,烧个辰光也弗能尝,搿勒咸淡就侪靠经验则。
布筵席、陈香烛、拜三拜以后,再化锡箔,火隐脱灰变成功金黄颜色个灰个辰光,再算祭好。
然后修作好,拿菜蒸热端上来,就是家宴哉。一年当中,逢年过节吃得最好。苏州人所谓个“过节”讲个就是实梗个家祭之日。
勒海苏州,冬至是一杯飘仔桂花个冬酿酒。
冬至夜,别个可以无不,酒是板要有个。该个酒还弗能是一般个酒,要用当年十月里个新米酿酒,加糖桂花,一般勒冬至节前头上市。该个就是冬酿酒,又叫冬阳酒、分冬酒,入口香甜清冽、还有桂花个芬芳。
冬酿作兴是指秋冬之佳酿,而冬阳个名字由来就更长,搭冬至个关系也更紧密。
冬至该个节气有其独特个地位,记忆力好个朋友作兴还记得地理课浪学过个“二分二至”四个节气搭昼夜长度变化之间个关系:北半球,冬至是一年当中,昼最短、夜最长个日脚。
东汉蔡邕就勒海《独断》当中写得着“冬至,阳气起,君道长,故贺”。冬至吃冬阳酒,就有庆贺阳气生、白日渐长个意思哉。
勒海苏州,冬至是搭家人团聚个温暖。
最长冬至夜,苏州人过个就是至亲相聚、围炉夜话。勒海物质条件匮乏个年代,姑苏城里有实梗一句熟语:“有铜钿吃一夜,呒铜钿冻一夜。”
如今苏州人个冬至夜饭,鱼肉鲜虾、热炒冷盘、荤素俱全,再配上一壶水浴温热个桂花冬酿,侪是吃一夜。讲究点个人家,还要吃暖锅,还有人家要做冬至团,着新衣服走亲眷,送送礼。
假使有人问,苏州个冬至是啥个?
我会讲,是过节,是团圆,是冬酿酒,是金孟远个一首竹枝词——
冬阳酒味色香甜,团坐围炉炙小鲜。
今夜伲郎须一醉,笑言冬至大如年。
欢迎关注杂格咙咚,最懂苏州的声音。
同名微信公众号、微博、QQ群
听友257473153
一年没更了,真的好好听
木木想环游世界
真是太美了,夜里一杯茶听着这些,惬意
xiaoxingxing1840
什么时候更新呢
杂格咙咚 回复 @xiaoxingxing1840:
过年啦~最近更新会慢一点~