广播专辑 弄堂茄山胡204 从前一手好字很关键

从前一手好字很关键  
 
赵韩德  
 
　　从前伲镇上个人家，对小囝个教育，呒没多少道道。啥个奥数、奖牌、证书、起跑线之类，直直叫是闻所未闻。但对一桩事体，却邪重视，就是小囝个写字。如果自家小囝写个是一笔“蟹爬字”，爷娘勿仅冒火，往往还要赏其“毛栗子”或头塔。

　　所以初二时候，伲个班主任暨语文老师，勒家长会上对伲爷说，侬儿子迭位小同学各项成绩都勿错，作文也蛮好（此时伲爷听得有点神抖抖），就是字“太蹩脚”。伲爷为之一震。伊心事重重个回家，呒没按当时个惯例让我头上挨毛栗子，反倒语重心长个搭我讲了个故事。伲爷个故事有几个“关键”，伊讲解放前要勒拉社会上谋个体面职业，一要衣衫整洁懂礼貌，二是必须有一手好字。好字胜过衣衫。

　　比如镇上大家侪非常敬重个黄老师——就是“正谊小学”教美术搭手工个黄老师（搭伲爷同年）。黄老师小辰光家境贫寒，其爹又跛脚。但迭位老爹脚跛脑子勿跛，晓得要让儿子出道谋生甚至“坐写字间”，识字和写字是必须个。摆香烟摊个老爹节衣缩食让儿子读几年私塾（正规学堂上勿起）。而写字（主要是小楷）老师，也是跛老爹自家寻个。

　　跛老爹勒热闹繁华个洋泾古镇上摆香烟摊，常常有位老先生来买“青鸟牌”。老先生一年四季着长衫。大概怕冷，老戴一顶旧旧个“罗宋帽”。伊是清末秀才，学问全洋泾闻名。跛老爹殷勤搭徕，终于勒香烟摊上拜识了老先生，为儿子找到顶尖个小楷老师。伲爷搭仔黄老师是发小，当年曾与黄老师一起去过秀才老先生屋里，洋泾镇临大街个一幢木头房子个两楼，对面是著名茶楼“来今雨轩”。老先生家楼梯呒没光线，脚高脚低个摸索上去。屋里大窗临街，明亮，红木八仙桌上一枚砚台一个烟缸一包青鸟牌，四根红木长凳。老先生埋勒藤椅里看线装书。

　　黄老师到仔做学徒个年龄，大概十五六岁。跛老爹凭勒拉香烟摊上积累个人脉，曲曲折折个托来托去，终于托人拿黄老师带到了本地大佬倌陈桂春面前。

　　老早，浦东人有事侪会找“大佬倌”。本地隔段辰光就会冒出一个“大佬倌”——称不上族长，亦呒有官职，更勿曾推选。大佬倌是哪能样出来个，本地人勿晓得也勿深究。反正总会冒出一个大佬倌，为伊拉出头，为伊拉作主。上世纪三四十年代，浦东地面，陈桂春是赫赫有名个大佬倌。

　　现在陆家嘴金融贸易区高楼鳞次栉比，畅亮个大道宽阔如砥，车如流水马如龙，绿茵草坪大树林，呒有民居。但其中独独留一座上世纪二十年代建造个中西合璧个大宅第，红砖黑瓦，器宇非凡，迭个就是陈桂春故宅。后来成了吴昌硕纪念馆。

　　黄老师两手空空，兜里就一张精心书写个《黄庭经》。

　　陈桂春对求伊个穷人蛮客气，笑嘻嘻摸摸黄老师头，接过《黄庭经》眼睛一瞄。慢慢个讲：“我看，荐侬到正谊小学做个教书先生倒蛮好。”搿样子黄老师个人生道路就定了。伲爷说，小黄老师当时月薪十几个大洋，真了勿得！

　　故事讲完，伲爷朝我看，意思是侬小子打算如何？

　　写蟹爬字个初二生说爷，既然侬搭黄老师是从小要好个淘伴，葛就让我去跟黄老师学写字好？

　　迭样，黄老师成了我个毛笔字老师。我临个第一部小楷帖，就是《黄庭经》。