《一粒米》
演唱：严雪亭
一粒米，啥希奇？一粒米哪亨好算大事体？大不可小算要晓得，一粒米格当中有大道理。倷勿要看轻一粒米，何妨拿把算盘来算仔细，有一位老贫农，想出一个好主意，为了使年轻的一代要珍惜一粒米，俚拿出一两米，叫小孙子一粒一粒搭我数仔细。共总是一千八百三十七粒半，一数数出仔格大问题。我伲全国人民，如果每人每天节约一粒米，或者每人每天浪费一粒米，一进一出数目大得来斜斜气。我伲全国人口有六亿五千万，如果每人每天节约一粒米，一日天就是三万六千四百零三斤，一年算起来一千二百九十六万多斤米。拨勒五千人格工厂当口粮吃，吃仔七年还多一些些。拨勒农村里一个生产小队当口粮吃，阿要几化日脚可以吃完俚？好吃一百六十年，阿爹吃到孙子手里，还勿曾吃完什梗一粒米，倷说道阿希奇来勿希奇？倘然折合人民币，拿来买机器，一粒米好买四十多部小型拖拉机，倷说阿希奇来勿希奇？一滴一滴水汇成东海阔，一粒一粒沙堆得像泰山齐。如果每人每天节约一粒米，可以堆得仓库高来白云低。我伲劳动人民爱的是勤俭，恨的是浪费，深晓得一粒米来处勿容易。抢收抢种多辛苦，车水耘耥勤积肥，点点汗珠粒粒米，故而珍惜用粮是大事体。我伲厉行节约要从小处来着手，勤俭建国覅忘记；请大家切莫看轻一粒米。
用户评论