比上勿足比下有余
沈一珠
有辰光特别起劲,一早爬起来,烘面包、炒鸡蛋、煎培根……
面包浪挞一层酸叽叽个奶酪,烧一杯奶茶或者咖啡,搿两天还有新鲜枇杷、樱桃上市,配勒旁边,腔调摆足输赢,恨勿得拿日脚过得像辣辣云浪向飘。
有辰光也会特别呒没劲道,从床浪向爬起来,揩好面,刷好牙齿,然后就坐辣一边发呆,看太阳光从脚馒头移到脚趾头。
觉着肚皮饿,就跑出去寻末事吃。搿天就寻着一爿新开点心店,名字有眼一本正经,像煞是国学学堂。进去,坐下来,听到服务员正好跟一个爷叔辣辣讲闲话:“生煎呒没了,调锅贴好口伐?”
“价钿一样口伐?”
“一样个。”
“搿末,就调好口来。”
阿拉点勒小馄饨、小笼。小馄饨味道一般性,呒没高汤,不过,量比较多,模子也大,吃得饱;小笼蛮赞,一只只看上去挺挺刮刮,筷子搛上去皮子勿会破;馅子勿摆酱油,汁水老鲜洁,呒没肉夹气。
吃饱肚皮,面孔好看交关。
最后算一算账,一共用脱21块。应该是一顿比上勿足比下有余个早饭。
跟交关人一样,阿拉也欢喜“比上勿足比下有余”迭句闲话。
Fei_ah