第1讲 最紧要sell得

▍音频讲稿。

第一讲：最紧要sell得。

《最紧要sell得》十堂课教识你点sell嘢，点sell自己！ 

大家好！ 我系Victor黎俊文，从事理财服务行业十几年，拥有丰富嘅前线销售、营销团队管理、专业培训经验。 我会毫无保留咁同你分享，多年嚟累积到嘅成功同失败经验，以及一啲鲜为人知嘅销售秘诀。 听完你就会知道，我点解可以一年去十次八次旅行，仍然做到行业最顶尖果1%嘅销售人员。 你亦都会知道点解，我可以系2020年，新冠疫情全球漫延之际，都可以喺头四个月业绩比去年同期增长一倍。 你更加会掌握到适用于各行各业嘅销售之道，保证易学、易用以及有趣味性，否则原银奉还。 嗯，唔知你听完我嘅课程简介，有冇引起你嘅兴趣，继续听落去呢？ 或者更直白啲，你有冇比我sell到？

无错！ 我已经开始传授紧销售秘诀比你喇！ 仲唔快啲攞纸笔或者打开手机记事簿做笔记？

销售系一个非常重要嘅技能，识得sell嘢嘅人，收入会高得多，成就会大好多，事业，甚至人生会畅顺得多。 不过你唔好误会误会喎，我系讲紧识得sell嘅人，唔系剩系讲紧做销售嘅人。 你可能会话，讲咩呀？ 有分别咩？ 当然有分别！ 大家一听销售，可能只会諗起传统嘅销售人员，包括时装店、电器铺、美容院嘅Sales、或者系街头截住你做问卷，甚至无端端cold call打电话比你嘅销售员。 当然，佢哋系典型从事销售工作嘅人，每日最重要嘅工作就系令你打开银包，拎张信用卡出嚟碌。但系你又有冇諗过，我哋每个人、每日都做紧唔同程度、唔同形式嘅销售。 狭义嘅销售当然系sell产品同服务比顾客，从而产生业绩，为公司带来利润。 但广义嘅销售系你用任何方式影响他人嘅思想、行为同决定。 呢个太重要喇，我讲多次，你用任何方式影响他人嘅思想、行为同决定都系进行紧「销售」。 举个例子，你同屋企人讨论紧去边度旅行，阿爸阿妈就想返乡下寻根、阿妹就想去韩国追星，你就想去日本扫货，买最in嘅潮服。 你要点样喺呢个三国演义当中达到目标，令大家都跟你去日本呢？ 呢个时候你需要出色嘅销售技巧，sell吓阿爸阿妈可以去日本浸浸温泉，听讲对佢哋嘅肩周炎好有帮助。 Sell吓阿妹，你钟意果位韩星咁啱去日本开粉丝见面会，话唔定你可以同佢合照添。 咁样sell吓sell吓，各取所需之下，日本之旅一定手到拿来啦。 再举多个例子，你要踏出社会工作，当然要搵工面试。 虽知道公司HR收到嘅CV好似电话簿咁厚，一日闲闲哋要见一百几十人，你要点样先可以脱颖而出，夺得职位呢？ CV就系你第一个销售嘅机会，所以千其唔好听某啲人教你CV唔驶贴相，履历表有咁简洁得咁简洁，仲要限制系两页之内。 作为过来人，我可以好肯定话比你听，如果你CV上有张醒目嘅靓仔或靓女相，我想见你嘅意欲一定大增。 如果你真系有好多威水史、攞好多奖、参加好多社会公益活动，你一叠十版八版嘅CV寄我嚟，甚至连埋一啲相关照片、证书、奖状，我会好想见吓你，睇吓系咪真系好有料。 相反，如果你嘅CV除咗学历之外，就剩系得个人兴趣一栏呢，我就一定摆系最底，见到无人见先见吓啰。 所以你未见HR之前，面试过程已经开始咗喇。

到见到HR，先敬罗衣后敬人就必定架喇。 着得专业、大方、光鲜整齐，就系将「你」呢个产品包装好，sell出去的第一步。良好嘅面试技巧，适当地sell下自己嘅优点系必须的。 你如果怕怕丑丑、客客气气，唔敢讲自己有咩优点、有咩抱负、又唔主动sell下自己对呢个行业几咁有热情，几愿意为公司付出，你就会不断地听到「返去等消息啦！ 」嘅客气回覆。

所以话销售绝对唔系销售员嘅「专利」，要sell嘅嘢亦唔止见得到嘅产品，同感受得到嘅服务。 老板要sell员工为公司拼搏、sell股东、投资者公司前景看好，可以放心投资。 员工要sell上司，自己表现比隔离果个出色，希望可以搭直升机，扶摇直上。做父母嘅要sell个仔俾心机读书，考间好大学，搵份好工，娶个好老婆。做仔嘅要sell父母买部新手机俾自己。老公要sell老婆俾佢周末同班friend去睇波。老婆要sell老公买个名牌手袋。其实人人都系销售员，人人都要识得sell。 因为呢个世界你唔系sell嘢，就系buy嘢。你唔系影响别 人，就系被别人影响。越 sell 得嘅人成就越大，当今世上最伟 大嘅领袖都系伟大嘅销售员。乔布斯、马云、奥巴马全部都系世界上最TOP嘅销售员，将销售呢种艺术升华到另一个层次，让人心甘情愿为佢哋奉上钞票或者选票。如果你都想sell人于无形、喺不知不觉间影响对方嘅思想、行为同决定；如果你都想成为人生胜利组，生活得更成功、更富有、更快乐；你必须要掌握呢套武功，成为销售高手。

不过先旨声明，坏消息系你唔能够斋听我讲，就成为到销售高手，呢个世界上无咁便宜嘅事。 所有技巧相关嘅事情，都要经过学，以及习两个阶段，学咗无练习、无实践，等于无学过。 而好消息系，只要你掌握到当中嘅技巧同窍门，反复练习，不断精进自己，任何人都可以好似我咁sell得。 我嘅责任系同你分享所有成功同失败嘅经验，让你碰少一啲钉，走少一啲弯路。 好喇！ 事不宜迟，马上开始。