广播专辑 弄堂茄山胡78 冷了弄只盐水瓶焐焐

广播171 弄堂茄山胡 冷了弄只盐水瓶焐焐
2013-12-30 10:24 1来源：新民晚报        新民网编辑：田诗雍    作者：侯宝良
　　记得有趟天气特别阴冷，眼眼叫还小区停电，碰到小学同学到阿拉屋里来白相。空调、取暖器侪勿好开，我呒没办法只好拿出两只“老古董”级别个玻璃“盐水瓶”，充仔开水，一人一只来取暖焐焐手，一同学看到仔讲：“蛮好嘛，老里八早侪是搿能介焐手个，侬还记得有年冷天到阿拉屋里开小组辰光还人人一只，阿是老适意个！”拨伊搿能一讲倒让我回忆起当时个情况。
　　好像小辰光个天气要比现在冷得多，学堂里一般只上半天课，还有半天总归分小组垃拉同学个屋里一道做功课、做游戏咾啥个。碰到特别冷个天气，条件好点个家长会充只汤婆子或热水袋拨大家焐焐手再做功课，不过粥少僧多大家焐勿过来。到迭个小朋友屋里就情况勿一样了，因为伊拉大阿姐垃拉医院里做护士，屋里有交交关关个“盐水瓶”。搿种物事现在拨一次性个塑料袋吊针替代后看勿见了。搿种一只500毫升个瓶外径10几公分、20几公分高低，瓶口小又有橡皮塞头，老密封个，用来冲热水取暖勿要忒好哦。做功课前头阿拉先焐焐手，再摆进棉袄里个肚皮搿搭位置，坐垃小矮凳浪连大腿侪热烘烘个，过歇就觉着身浪暖热多了，大家勿再“苟头缩颈”，做功课也爽快了。做完功课大家手捧盐水瓶一道做游戏、唱歌，勿要太开心噢。
　　回想想老早仔个冷天辰光，勿像现在有介许多个电暖设备，就算焐焐“盐水瓶”也是一种享受了。