广播专辑 弄堂茄山胡298 上海人叫“阿姐”

上海人叫“阿姐”  
 
　　文/秦来来
　　上海人称呼人家，老有讲究嗰。

　　有种男人家，三四十岁，勿认得嗰，打招呼个辰光叫一声“爷叔”，勿会有问题嗰。但是，三四十岁个女人家，侬要是叫伊一声“阿姨”，伊会勿适意，“啥，我介老了？”弄勿好还会搭侬板面孔。

　　对搿种女人家，上海人会叫伊一声“阿姐”。

　　阿姐是尊称，原来是自家兄弟姐妹之间个排行；闺蜜之间，也叫阿姐，排行老大，叫一声“大（du）阿姐”。

　　不过，辣社会浪向，或者讲勿大熟悉个人群里向，迭个“大”字，辣阿姐前头勿好随便加嗰。

　　欢喜看滑稽戏个人侪晓得，《72家房客》里向个二房东、《海上第一家》里向个大阿姐，就是搿种“大阿姐”。嘴巴一张，“哪能哪能”就挂了嘴巴浪；立了路浪，一只脚就抖得像装仔弹簧；讲起闲话来，欢喜神气活现划划大拇指；碰着事体，总归欢喜抢了前头。

　　搿种是旧社会里个“白相人嫂嫂”。

　　阿姐前头加一个“老”字也不灵光嗰，人家也要勿开心。现在大家生活越来越好，额角头浪皱纹越来越少。有种女同志，看看三四十岁，伊自己讲五十多岁，拿出身份证一看，实际已经六十多岁了。

　　再看看社会浪向，六十多岁还辣“上班”帮儿子、女儿做“保姆”，七十多岁天天夜里到公园里向跳广场舞，八十多岁拿仔一本护照乘仔飞机倒时差，九十多岁走起路来抖法抖法还要跑到外头散散步……现在个女同志勿显老，也勿服老。

　　假使拿“阿”字拿脱，只留“大（du）姐”也勿来事，因为老底子个上海人，拿屋里个佣人叫“大姐”，拿呒没结过婚嗰就叫“小大姐”。

　　葛末，“小大姐”倒过来，“大小姐”有搿种叫法口伐？有嗰。老早有眼身价个人家，伊拉屋里向个女小囡，底下人或者辣社会浪，大家侪叫伊“小姐”；假使屋里女小囡多一眼，就按年龄排序叫“大小姐”“二小姐”……

　　当然现在“小姐”个意思已经走样了，马路浪碰着一个小姑娘，侬叫“小姐”，人家会勿开心嗰。

　　上头搿眼称呼侪是按年龄大小来划分，还有一种按味道是“甜”是“苦”来划分，亻那大概呒没听到过。

　　1943年，黄宗英主演个喜剧《甜姐儿》辣卡尔登剧场（长江剧场旧址）开演，一炮而红，风靡上海滩。伊娇美柔媚个大小姐形象深入人心，“甜姐儿”从此也成了伊个雅号。当时伊辣舞台浪向一身马装个打扮，成了当年时髦女子追逐个时尚，有点富家女还带仔裁缝师傅、拿仔量衣裳个皮尺来量伊个戏装。侬讲“痴”口伐？

　　1947年7月，导演陈鲤庭导演个《幸福狂想曲》正式开机，电影里男主角由赵丹饰演，演女主角嗰就是“甜姐儿”黄宗英。

　　呒没想到，好事多磨，《幸福狂想曲》开拍后不久，黄宗英因为急性盲肠炎住进医院开刀。三个礼拜以后，黄宗英重返摄影棚；两三天以后伤口发炎，再次进医院。当时报纸纷纷报道：黄宗英旧病复发，“甜姐儿”变成“苦姐儿”。

　　搿是赵丹与黄宗英第一次合作，伊拉辣电影里演一对恋人，结果假戏成真，搿趟合作后来让伊拉两个人之间有了一段幸福姻缘。