岳松起身好小心咁将书房门关埋，又嚟到窗口前面推开一条罅。一阵冷风飘入嚟，冻到佢打咗个冷震，一连几个乞嗤，大气都唔够胆唞啊，心虚咁企咗一阵。侧住耳听唔到隔篱房有动静啦，咁先至放心喺柜底摸出包烟，抽出一支点着，深深嗍咗一啖。过咗一阵，慢慢吐出几缕烟，面上先至露出陶醉嘅表情。
忽然间。睇见电脑屏幕狂闪几下，跟住就黑屏喇，吓到面无血色，台电脑係乔敏专属嘎，如果因为自己上网中毒，整坏咗，世界末日未嚟，但係专属佢岳松嘅世界末日绝对可以用秒嚟计，情急之下成额汗啊。
连忙跑过去手震震咁点住鼠标，希望有奇迹出现。人生总係如此措不及防，所以喺措不及防之际，屏幕又着返啦，出现咗淘宝商铺界面，一个笑口噬噬嘅店小二双手抱拳作揖，旁边仲有行字，“亲，店小二已经恭候多时啦！”
“我亲你老味啊，搜个问题入个淘宝，吓我个半死，有冇搞错啊！”岳松口噏噏，准备关咗个界面重新搵度娘商量下。
忽然屏幕弹出一个对话框，裏面写住，“行过错过唔好误过，就算唔买入嚟睇下都係好嘎。”
岳松迟疑咗下，係裏面输入问度娘嘅同一句话发过去，对方好快就回复，显示一个大大嘅鬼脸，然后下面写住令岳松心狂跳嘅一句话，“信我者得永生，冇乜嘢係瘦不了嘅，更冇乜嘢係大不了嘅，包你满意。”
岳松用力搓咗下块面，面上露出奇怪嘅表情，哩个问题佢问咗度娘无数遍，亦都将度娘列举嘅办法同秘方试晕晒啦，宜家仲係咁嘅衰样。今日问度娘入淘宝，而且淘宝哩个掌柜竟然话包你满意，真係撞鬼囉。
不过岳松抱住姑且一试嘅心情係对话框度输入一句话，“我係想信你啊，但係你确定真係可以令我满意咩?”
“呵呵，你先将生辰八字畀我！”对话框出现咁样一句话。
“呵，你要我生辰八字做咩啊？”
“信我者得永生，如果唔信，就拜拜！”
岳松心谂，就算将生辰八字畀佢，有冇少条毛嘅，于是乎就喺对话框输入咗自己嘅生辰八字，但係等咗半日都冇下文，激死啊，连续打几个问号过去都冇回音，最后实在唔耐烦干脆掟两个炸弹同一督屎畀对方，将鼠标放到页面关闭符号上面。
忽然手指传嚟一阵刺痛，连忙抖咗两下，烧尽嘅烟头跌咗落地，佢都顾唔上关界面，喇喇临踎低将烟头执起。用又粗又笨嘅手指将散落地面嘅烟灰，一啲啲小心翼翼咁执翻起嚟，又仔细睇咗下，咁先至放心行到窗边，将手入面嘅嘢抌出去。
用户评论