手帕“复古”看进步
杨建明
早浪向一出门就被火辣辣个太阳晒得满头大汗。我辣辣公交车站候车，忽然看到一位老年乘客从口袋里抽出一块手帕擦汗，动作交关利落。搿让我眼前一亮，自然勾起了我对手帕个记忆。顾名思义，手帕就是一片用来揩汗揩手个布片。现在大多数人勿欢喜用手帕，就是因为手帕个用场被纸巾代替了。
记得好多年前，使用手帕是很桩再平常勿过个事体，勿管男女老少，绝大多数人身浪向侪带有手帕，百货商店里也有专门卖手帕个柜台，可见手帕个普及性。当年手帕也勿是啥贵重物品，但由于相当实用，所以被交关青年男女谈朋友用作定情信物，可见当年爱情个纯朴。要晓得，伊个辰光手帕还暗含有一层特殊个意思，能送异性朋友一条手帕，往往说明双方感情勿一般，尽管当年单纯个我勿没搿方面个经历。
有趣个是，阿拉小辰光手帕还是一种玩具，从儿歌《丢手帕》就可以了解了。是呀，当年白相手帕是多么开心个事体，既健康又环保，勿像现在一些小朋友一天到夜白相电脑手机游戏，眼睛侪看坏忒了。
记得阿拉小辰光用手帕勿需要每天汏，有辰光甚至十天半月勿汏也勿会老龌蹉，勿是当年勿讲卫生，而是手帕没有龌蹉到要经常汏个程度，除非大热天出汗狭其多个日脚。现在看来是一桩勿可思议个事体，而在当年却是理所当然个事体，侬想想看，伊个辰光油水交关紧张，吃饭吃粥吃咸菜萝卜干，嘴巴浪向能有油腻口伐？伊个辰光阿拉屋里向，姆妈每次从菜场买菜回来，侪要买转来一两块腐乳和半斤萝卜干，但就算是乳腐，吃个辰光，一块乳腐也要分成四份以上，至于炒菜嘛，锅子里向就放一眼眼油，阿拉吃菜也觉勿到嘴巴上下油勿油，即使嘴唇边浪向有眼油，也会用舌头舔得清清爽爽。偶尔有零食吃，黏辣手指上个零食碎屑也会用嘴巴吮舔光。排除了搿些因素，侬讲手帕能龌蹉到啥地方去呢？
现在大家个生活水平大大提高了，手帕反而销声匿迹了，原因就是大多数人侪用既方便又卫生个一次性纸巾，勿欢喜用手帕了。亲眷朋友到餐馆里吃饭，想吃啥就点啥，一边吃饭一边嘎山胡，一顿饭吃下来勿晓得要用脱多少张纸巾。这也是阿拉经济生活发展变化个小小缩影。
不过，我乐观猜测，总有一天手帕又会重新流行起来。要晓得，生产纸巾是需要消耗木材做原料个，为了减少木材使用量，保护生态环境，也许大家个觉悟会大大提高，又会自觉用起手帕，迭种生活习惯个“复古”可以看作社会文明个进步。侬讲是口伐？
用户评论