广播专辑 弄堂茄山胡407 辣七宝做南翔小笼

辣七宝做南翔小笼  
  
　　文 / 侯宝良
　　有一天去女儿屋里白相，茄山河个辰光讲到我小辰光特别欢喜吃南翔小笼个事体。当年我有一个要好同学住辣南翔，经常去伊拉屋里白相，有辰光就会一道去吃小笼馒头，一来二去，倒是对南翔小笼有了一眼了解。


　　据说南翔小笼有一百多年历史，讲究皮薄、馅丰、汁多、味鲜、形美，肉馅用鸡汤煮肉皮加精肉做成，馒头皮勿用“发面”用“呆面”，考究点个做法还要混合多种面粉制作，一两面团做10只，每只上面收口个褶子一般要有14到16个，确保皮薄勿漏汁。至于吃法，也有讲究，按照老吃客个讲法就是：轻轻提、慢慢移，先开窗、再吸汤。我吃个辰光欢喜先用调羹舀点醋，再拿小笼包放辣调羹里，所谓：“调羹垫底往里靠，即使破底勿跑汤，轻吸慢吮细细品，有鲜又酸味道好”。


　　女儿听我讲得起劲就提议一道到南翔去吃正宗南翔小笼，伊请客。想想有十几年呒没去过南翔了，而且现在有地铁直达，交通便当，我倒也来了兴致，就客随主便，一道走一趟。


　　一出南翔地铁站，发现搿搭做小笼馒头个店家实在勿少，随便走走，到处可以看到“正宗南翔小笼”个招牌。阿拉几家头选了一家店走进去，一看价目表，小笼品种有好几种，普通小笼包一笼八只十几元，蟹粉小笼包一笼三十元。女儿各种品种全部点了一遍，笑嘻嘻讲要让老爸鉴赏眼下迭眼小笼是勿是还保留原汁原味。


　　一歇歇热气腾腾个蒸笼一只只端上桌，里向一只只小笼馒头样子看起来蛮讨人欢喜，我左手调羹右手筷子，左右开弓，先轻轻叫咬一口，再稍微一吸，尝了尝汤汁。吃小笼馒头嘛，就是在乎搿口汤，所以上海人又叫伊“汤包”。大概是久违个缘故，感觉勿错，细细品味又觉得好像还缺点啥？女儿面露疑虑：“老爸，搿里总勿会开大兴口伐？”我还辣考虑，刚巧老板听到女儿个闲话，过来搭讪：“各位，小店个味道哪能？”我随口讲：“现在搿个季节，放点笋末更好！”“老先生真是老吃客，勿过眼下竹笋是时鲜货，成本挡勿牢啊。”小老板实话实讲，阿拉几家头倒也吃得蛮开心。


　　过脱几天，阿拉老夫妻两家头去超市买物事，路浪向看到一家小吃店个玻璃窗浪还有南翔小笼个招贴，正好也到了吃中饭个辰光，妻子就讲：“搿搭也有南翔小笼，侬个嘴巴比较刁，去吃吃看，同正宗南翔小笼差多少。”进去一看，店里吃客勿少，6元一笼8只，价钿蛮实惠，就一人点了一笼。等小笼端上来一尝，皮薄馅大汤多，汤汁里隐隐还有笋香。我勿由称赞了几句，呒没想到拿老板引了出来，更巧个是，搿位老板居然就是当年住辣南翔个老同学。


　　几十年勿见个老同学意外见面，顿时聊了起来，从当年一道吃南翔小笼讲到伊现在开店做南翔小笼。伊讲：“要做好传统个食物就勿能辣配料浪向马虎。只要细节做到位，辣七宝做个南翔小笼一样‘正宗’。”