广播专辑 弄堂茄山胡473 山药牛腩清汤

山药牛腩清汤


沈一珠


 前两天拿本书乱翻，哪本书哪个章节侪忘记脱了，看到一句闲话，倒是记牢了，大约模意思是：好吃个物事，是迭个世界浪最美好个存在之一。


 虽然，美食不会开口，不过，伊可以拨人个身心带来慰藉。


 忽然想到，迭句闲话或许就是现在网络浪各种美食节目特别受欢迎个原因。


 到网络浪寻纪录片《掬水月在手》，讲个是叶嘉莹先生个故事。结果，只寻着一分多钟个预告片，里向有句闲话，也记牢了，讲，无论叶先生碰着啥为难事体，诗总可以渡伊过去。


 呆一呆，想想，其实食物也一样。当侬有能力体味食物个甜酸苦辣，就呒啥过勿去个事体了。


 有个朋友告诉我，有一趟，伊勿高兴烧饭，想出去吃一顿。伊先生勿想出去吃。不过，伊先生老绅士地表示，支持伊一家头出去吃。


 结果，伊就硬硬头皮，一家头出去，寻了一家饭店坐下来。服务员问，几个人？伊怕人家觉着伊一家头到饭店吃饭有点怪，所以，就告诉服务员，朋友稍微晚点来。


 伊讲，搿天，搿顿饭，吃得食不甘味。


 呒没听到搿位朋友讲，搿天伊到底吃了点啥。所以，我想，朋友搿天肯定关注个是别人，或者关注个是人家对伊个感受，唯独没有关注食物本身。


 我想跟伊讲，下趟再一家头出去上馆子，侬可以拿注意力全部放到品尝美食浪向，感觉可能会好交关，试试看。


 天气冷了，又到冬令进补个辰光。


 想起从前一个暖男同事告诉我，牛肉清汤顶养人了，每个礼拜，伊总会为屋里人炖一大镬子牛肉清汤。


 至于哪能可以烧出一镬子煞辣势清个牛肉汤，伊个窍开是，牛肉一定要用清水浸一段辰光，血水漂得越清，牛肉汤水就越清。再加点山药，补益脾肺。


 所以，一碗牛腩山药清汤，看上去清清淡淡，却顶是健脾胃、养气血个养生汤。


 材料：牛腩1斤；铁棍山药半斤，葱、姜、盐各适量。


 做法：牛腩清水浸1至2个钟头，汏清爽；水里焯一焯，备用；山药汏清爽，削皮，切成块备用。


 葱、姜及牛腩摆进高压锅，加适量水焖30分钟左右；再转到汤锅里，加适量清水，大火烧开，加入山药块，烧到山药熟透，加点盐调味，就可以盛出来吃了。