广播专辑 弄堂茄山胡510 外婆有张老照片

外婆有张老照片
文/管弢


 外婆屋里五斗橱个玻璃板下，有一张10寸“彩色”照片，照片里个人是我表姐，当年也就十来岁个样子，伊笑得像朵花，满头硬邦邦个鬈发是


 冷烫精个杰作，表情动作直接拷贝挂历浪个女明星——侪是埃息辰光个流行元素。搿张照片是姨夫用黑白胶卷拍嗰，用毛笔蘸颜料着色，一笔笔画出来个彩色照“骗”。因其稀有，成了外婆炫耀个宝贝。


 想当年，白相照相机绝对属于高消费，所以有照相机个人家邪气少。姨夫有一架方头方脑个120海鸥相机，主要满足阿拉一家门旅游聚会个需求，有朋友聚会请伊帮忙，伊也欣然接受，过过“摄影师”个瘾。上世纪八十年代，市面浪可以买到彩色胶卷了，姨夫个相机也更新换代，再也用勿着画照“骗”了。


 虽然有了彩色胶卷，但价钿勿便宜，再加拍照以后还要到照相馆冲印，彩色胶卷个冲印费比黑白胶卷贵，所以姨夫每趟按快门之前侪要仔细斟酌，抓拍、偷拍、纯风景个“空镜头”侪是不可能个奢望。照片里一般是家庭成员两三人一组合，以同一座假山、同一棵树、同一片草地为背景，区别只是人和表情。


 我和表姐是小字辈，所以勿但单人照最多，还有“偷拍”特权。当时一盒胶卷标明能拍36张，但胶片个实际长度往往会多出一点，36张拍满以后往往还能卷片按快门，但具体能多拍几张却是勿一定嗰，所以拍照个辰光就留了一点悬念，要到最后冲印成照片才能揭晓。


 可以讲彩色胶卷辣当年是一种“稀缺资源”，阿拉明知相机已经拍满36张，还是愿意尝试多拍几张，目的只是为了留下更多岁月个足迹。36张计划内个照片通常侪是人像，大家表情严肃、姿势端庄、目光一致，画面浪向有一种紧张感。倒是最后“偷”来个照片，画中人呒没心理负担，难免喜形于色，动作放肆一点个，表情夸张一点，结果最后两三张“偷”来个照片往往最出彩。


 虽然当年拍照个机会少，但翻开相册，每一张照片背后个“故事”侪留辣阿拉个记忆深处，比如：辣啥地方拍、啥人拍、为啥拍等等。每一个细节侪好像自带彩色光环，哪怕已经过去交关年数，还是会出现辣阿拉个脑海里，让人津津乐道。


 现在数码产品大量普及，随时、随地、随手就能拍照，就像吃饭喝茶一样普通。只要动动手指，旅游、居家；工作、生活；动物、植物；美食、美景……无数画面就会定格辣屏幕浪，拍得随意、拍得任性，然后通过网络存进看不见摸不着个“云”里向。多种美图类App也应运而生，相片后期制作能力节节高升。只要愿意，美白一下肌肤、修正一下腰身、拉长一下大腿……分分钟搞定，人像可以嵌进完美模板，照“骗”进入全民升级时代。


 或许是因为数码照片拍起来太随意，对大多数人来讲，辣按下快门个一刹那，迭个场景个存在感就差勿多释放干净了，马上就会有新场景、新内容等侬去拍。阿拉利用现代技术，力争减少岁月流逝，努力填满记忆里个盲点，勿晓得最后真正珍藏到阿拉记忆里个东西，到底有勿有增加？是勿是更加清晰、更加完整？是照片还是照“骗”？